49-تاراۋ
عاليلەيادا ۋاعىزدادى جانە ەلشىلەرىن ۇيرەتتى
ماتاي 9:35—10:15 مارقا 6:6—11 لۇقا 9:1—5
-
عاليلەياعا تاعى دا ۋاعىزداۋ ساپارىمەن باردى
-
ەلشىلەرىن ۋاعىزداۋعا جىبەردى
يسانىڭ بەلسەنە ۋاعىزداعانىنا ەكى جىلداي بولدى. ەندى قارقىنىن باسەڭدەتىپ، ٴسال بوساڭسۋىنا بولاتىن شىعار. الايدا ول عاليلەيانىڭ باسقا جەرلەرىندە دە ۋاعىزداۋعا كوپ كۇش سالدى. «بارلىق قالالار مەن اۋىلداردى ارالاي ٴجۇرىپ، ٴماجىلىسحانالاردا ٴتالىم بەردى، پاتشالىق تۋرالى ىزگى حاباردى ۋاعىزدادى، ٴتۇرلى اۋرۋ-سىرقاۋلاردى ساۋىقتىردى» (ماتاي 9:35). بايقاعان ٴجايتتاردان ۋاعىز ٸسىنىڭ كەڭ كولەمدە اتقارىلۋ كەرەكتىگىن ٴتۇسىندى. مۇنى ول قالاي ىستەمەك؟
يسا ەل ارالاپ ٴجۇرىپ، حالىقتىڭ رۋحاني كومەككە جانە جۇبانىشقا مۇقتاج ەكەنىن كوردى. ولار باعۋشىسى جوق قويلارداي ازىپ-توزعان، بەيشارا كۇيدە ەدى. يسا ولاردى اياپ كەتىپ، شاكىرتتەرىنە: «جينايتىن ەگىن كوپ، ٴبىراق جۇمىسشىلار از. سوندىقتان ەگىننىڭ يەسىنەن ونى جيناۋعا جۇمىسشىلار جىبەرۋىن وتىنىڭدەر»،— دەدى (ماتاي 9:37، 38).
يسا حالىققا قالاي كومەكتەسۋ كەرەكتىگىن بىلەدى. ول 12 ەلشىسىن شاقىرىپ الدى دا، ولاردى ەكى-ەكىدەن ٴبولدى. سوسىن وسى التى توپتى ۋاعىزداۋعا جىبەرىپ جاتىپ: «باسقا ۇلتتاردىڭ جەرىنە بارماڭدار، ساماريالىقتاردىڭ ەشبىر قالاسىنا كىرمەڭدەر، تەك يسرايل ٷيىنىڭ جوعالعان قويلارىنا بارىڭدار. جول-جونەكەي «كوك پاتشالىعى تاياپ قالدى!» دەپ ۋاعىزداڭدار»،— دەگەن نۇسقاۋ بەردى (ماتاي 10:5—7).
شاكىرتتەر ۋاعىزدايتىن پاتشالىق — يسانىڭ ۇلگىلى دۇعاسىندا ايتقان پاتشالىعى. ال «كوك پاتشالىعى تاياپ قالدى!» دەگەن ٴسوز قۇداي تاعايىنداعان پاتشا يسا ٴماسىح ولاردىڭ اراسىندا ەكەنىن بىلدىرەدى. ولاي بولسا، شاكىرتتەر وسى ۇكىمەتتىڭ وكىلدەرى ەكەندەرىن قالاي دالەلدەمەك؟ يسا ولارعا اۋرۋلاردى ساۋىقتىراتىن، ولگەندەردى تىرىلتەتىن قۇدىرەت بەردى. مۇنىڭ ٴبارىن ولار تەگىن ىستەۋ كەرەك. ٴبىراق ەلشىلەر كۇندەلىكتى اس-سۋ سياقتى قاجەتتىلىكتەرىن قالاي قامتاماسىز ەتپەك؟
يسا شاكىرتتەرىنە ۋاعىز ساپارىنا ۇلكەن دايىندىق جاساۋدىڭ قاجەتى جوق ەكەنىن ايتتى. ولار بەل قالتالارىنا التىن، كۇمىس نە مىس اقشا سالىپ الماۋى كەرەك. ٴتىپتى جولعا تاماق سالعان دوربا، قوسىمشا كيىم مەن ساندال دا الماۋ كەرەك. نەگە؟ «ويتكەنى ەڭبەك ەتكەن ادام ٸشىپ-جەۋگە لايىق»،— دەدى يسا (ماتاي 10:10). شاكىرتتەر اكەلگەن حاباردى ريزاشىلىقپەن قابىل العان ادامدار ولارعا قاجەتتىنى بەرەدى. سوندىقتان يسا: «بارعان جەرلەرىڭدە قاي ۇيگە تۇسسەڭدەر، قايتا جولعا شىققانشا، سوندا قالىڭدار»،— دەدى (مارقا 6:10).
يسا پاتشالىق جايلى حاباردى ٷي يەلەرىنە قالاي ايتۋ كەرەكتىگىنە دە قاتىستى نۇسقاۋ بەرىپ، بىلاي دەدى: «ۇيگە كىرگەندە، ونداعىلارمەن امانداسىپ، تاتۋلىق تىلەڭدەر. ەگەر سول ٷي لايىق بولسا، وعان تىلەگەندەرىڭ ورىندالسىن، ال لايىق بولماسا، وزدەرىڭە قايتسىن. كىم سەندەردى قابىلداماسا نە ايتقاندارىڭدى تىڭداماسا، سول ۇيدەن نەمەسە قالادان شىعاردا اياقتارىڭداعى شاڭدى قاعىپ تاستاڭدار» (ماتاي 10:12—14).
بۇكىل قالانىڭ نەمەسە اۋىلدىڭ جۇرتى حاباردان باس تارتۋى مۇمكىن. مۇنداي جاعدايدا ولارمەن نە بولماق؟ يسا ولارعا قاتاڭ ۇكىم شىعارىلاتىنىن ٴتۇسىندىرىپ: «سەندەرگە شىندىعىن ايتامىن، سوت كۇنى سول قالانىڭ جازاسىنان گورى سودوم مەن عومورا ەلىنىڭ جازاسى جەڭىلىرەك بولادى»،— دەدى (ماتاي 10:15).
