Yesu wasapwijile bingi pa myaka ibiji. Nanchi watatwile kwingila uno mwingilo na muleele nyi? Kechi byo byo aubile ne, aye “wapitañenenga mu mizhi yonse ikatampe ne icheche [ya mu Ngalilea] na kufunjisha mu mashinagoga ne kusapwila mambo awama a Bufumu ne kubuka bikola byapusana pusana ne bulema bwapusana pusana.” (Mateo 9:35) Bintu byo amwene pa luno lwendo byamulengejile kwingila na mukoyo mwingilo wa kusapwila. Pano wakonsheshe kwingila byepi bulongo uno mwingilo?

Konse Yesu ko ayilenga, wamwenenga bantu bakebewenga bukwasho ne lutekenesho bifuma mu kufunda bukine. Bano bantu bajinga nobe mikooko yabula kafunga, basubakenenga ne kupelelwa. Wibobijile lusa kabiji wabujile baana banji ba bwanga amba: “Mwingilo wa kunowa wabaya, pakuba ba mingilo bakepa. Onkao mambo, lombai Mwine mwina mwingilo wa kunowa atume ba mingilo mu mwingilo wanji wa kunowa.”—Mateo 9:37, 38.

Yesu wayukile kyafwainwe kwibakwasha. Waichile batumwa 12 ne kwibabanya babiji babiji kulenga mabumba atanu na jimo a basapwishi ne kwibakambizha’mba: “Kange muye ku bantu ba mu bisaka bikwabo nangwa kutwela mu muzhi wa bena Samaliya ne; pakuba anweba yainga ku mikooko yalubilamo ya bena Isalela. Kabiji byo musakuyanga musapwilenga amba: ‘Bufumu bwa mwiulu bwafwenya pepi.’”—Mateo 10:5-7.

Buno Bufumu bo basapwijilenga ke bobwa Yesu bo ebafunjishe kulombapo mu lulombelo lo afunjishe baana banji ba bwanga kulondela. ‘Bufumu bwafwenyenye pepi’ mambo Mfumu Lesa ye atongola aye Yesu Kilishitu wajinga  ponka. Nga baana banji ba bwanga bafwainwe kuba byepi pa kuba’mba bamweshe’mba kine bajinga bantomesha ba buno Bufumu? Yesu wibapele bulume bwa kubuka bakolwa ne kusangula bafu. Kabiji wibakambizhe kwingila ino mingilo kyatutu. Pano batumwa bafwainwe kutana kwepi bintu bikebewa nabiji kajo ka pa juba pa juba?

Yesu wabuujile baana banji ba bwanga kubula kusenda bintu pa lwendo lwabo lwa kusapwila. Kechi bafwainwe kusenda mali a ngolode nangwa a siliva nangwa a mukuba mu bikwama byabo ne. Kabiji kechi bafwainwe kusenda fukuta wa kajo nangwa bivwalo bibiji nangwa makwabilo ne. Mambo ka? Yesu wibalayile’mba: “Yense wa mwingilo bamupa kajo.” (Mateo 10:10) Bantu bo batainenga banemekele byambo byo basapwijilenga bapelenga baana ba bwanga bintu bikebewa. Yesu wibambijile’mba: “Mu nzubo monse mo mukatwela, mukekale monka kufikatu ne kimye kyo mukafumamo mu yewo muzhi.”—Mako 6:10.

Kabiji Yesu wibapele mikambizho pa bya kusolomoka bena mazubo na mambo a Bufumu. Waambile’mba: “Umvwe mwatwela mu nzubo, imunai mwina nzubo. Umvwe nzubo yafwainwa, mutende wenu ekalemo; kabiji inge kechi yafwainwa ne, mutende wenu emubwelele. Yense ukabula kwimutambwila nangwa kuteleka ku byambo byenu, pa kufumako ku yoyo nzubo nangwa muzhi, mukakunte lukungu ku maulu enu.”—Mateo 10:12-14.

Inge kya kuba’mba muzhi yense bantu bakana mambo a Bufumu, ki ka kikebamwekela? Yesu waambile’mba awo muzhi bakamuzhachisha bingi. Walumbulwile’mba: “Kine nemwambila namba, bantu ba mu mizhi ya Sodoma ne Gomola bakebobila lusa lukatampe mu Juba ja Kije kukila yewo muzhi.”—Mateo 10:15.