Mvu miole miviokele kala tuka Yesu kayivanina emvimba mu salu kia longa. Nga yayi i ntangwa kafwete kulula o vema muna salu kiandi? Vana fulu kia kulula o vema, Yesu owokese e salu kiandi kia longa. Wele ‘muna mbanza ye mavata mawonso [ma Ngalili], wele longi muna masambilu mau yo samuna e nsangu zambote za Kintinu yo wuka yimbevo ya mpila zawonso ye mayela ma mpila zawonso.’ (Matai 9:35) Mana kamwene mamfididi mu wokesa e salu kiandi kia samuna e nsangu zambote. Kansi, aweyi kesadila e salu kiaki kiawonso?

Ekolo kekangalanga, Yesu omwene vo wantu lusadisu ye lufiaulwisu lwa mwanda bavuidi o mfunu. Bavua zavunwa yo mwangana nze mameme makondwa mvungudi. Ubafwididi e nkenda, ovovese alongoki andi vo: “Kieleka, e mbongo yayingi muna kutika, kansi e nsadi mike. I dianu vo, nudodokela Mfumu a mpatu katuma asadi muna mpatu andi.”—Matai 9:37, 38.

Yesu ozeye e diambu dilenda kubasadisa. Otumini alongoki 12, ubavambwidi mu buka sambanu, bele nwole-nwole muna salu kia samuna e nsangu zambote. Ubakanikini vo: “Ke nwendi kwa esi zula ko, ke nukoti muna mavata ma esi Samaria ko; kansi, nwenda kaka kwa mameme mavila ma nzo a Isaele. Wau nukwenda, nulonga vo: ‘E Kintinu kifinamene.’”—Matai 10:5-7.

E Kintinu kia Nzambi bekwenda longa, i dimosi muna mambu o Yesu kavovela muna sambu kia Se dieto. “E Kintinu kia zulu kifinamene” kadi Yesu Kristu una yau kumosi, yandi i Ntinu wasolwa kwa Nzambi. Ozevo, nkia mambu mesonga e vo alongoki andi yau kikilu besunzulanga e Kintinu kiaki? Yesu ubavene e wisa kia wuka yimbevo yo fula nkutu mafwa, kansi e salu kiaki ke kilombelwa nzimbu ko. Antumwa aweyi belungisila e nsatu zau, nze dia kwau kwa lumbu ke lumbu?

Yesu ovovese ntumwa zandi vo, ke banati lekwa ko muna nkangalu wau wa samuna e nsangu zambote. Ke banati wolo ko, palata ngatu nsongo muna nkutu zau. Ke bafwete nata kimpakala kia madia ma nkangalu ko, yovo yinkutu yole, ngatu nsampatu zole. Ekuma? Yesu ubavovese ye ziku kiawonso vo: “O nsadi ofwene vewa madia.” (Matai 10:10) Wantu ana beyangalela e nsangu za alongoki, yau belunga-lunga e nsatu zau. Yesu ovovele vo: “Konso nzo nukota, nukala mûna yavana nuvaika muna fulu kiokio.”—Maku 6:10.

Yesu osongele diaka alongoki andi una bafwete sunzulwila e nsangu za Kintinu kwa wantu. Ovovele vo: “Avo se nukota muna nzo, nukayisa o wantu bena mo. Avo muna y’akwa luzolo lwambote, yambula luvuvamu lweno lwakala mo; kansi avo ke mwina akwa luzolo lwambote ko, yambula luvuvamu lweno lwanuvutukila. Konso ona olembi kunutambula yovo lembi wá mambu meno, vava nuvaika muna nzo yayina yovo mbanza yoyo, nukubula e mbundukutu muna tambi yeno.”—Matai 10:12-14.

Valenda kala ye mbanza yovo vata dia mvimba ke ditambula nsangu zau ko. Adieyi dibwila e mbanza yovo vata diodio? Yesu osongele vo fwaswa difwaswa. Ovovele vo: “Kieleka inuvovese wo vo, muna Lumbu kia Lufundisu, mbanza yoyo ivewa tumbu kisundidi kia esi Sodomo ye Ngomora.”—Matai 10:15.