Yesu wasapula bininge mu kintu kya myaka ibidi. Le pano ke kitatyi kya kuleka’byo nansha kukōkolokwa? Kutupu, ino po pene Yesu watandabula mwingilo wandi na “kupita mu bibundi byonso bikatampe ne bityetye [bya Ngadilea], ufundija mu mashinankonka abo ne kusapula myanda miyampe ya Bulopwe koku ubelula misongo ya miswelo yonso ne bulema bwa miswelo yonso.” (Mateo 9:35) Bintu byaamona bibamupe bukomo bwa kusapwila’ko bininge. Ino le usa kwibilonga namani?

Paenda mu lwendo, Yesu wamone bantu bakimba kubelulwa ku mushipiditu ne kusengwa. Badi pamo bwa mikōko yampikwa mukumbi, mipobolwe biseba ne kusumbulwa. Webakwatyilwa lusa ne kusapwila bandi bana ba bwanga amba: “Bine, mwangulo i mukatampe, ino bengidi i batyetye. O mwanda, abijai Mwinē mwangulo atume bengidi mu mwangulo wandi.”​—Mateo 9:37, 38.

Yesu uyukile bine bisa kukwasha’ko. Waite batumibwa 12 webatume babidi babidi, pa bisumpi bisamba bya basapudi. Webape buno bulombodi bwivwanike amba: “Kemwakyendai mu dishinda dya ba mizo, nansha kutwela mu kibundi kyo-kyonso kya bene Samadia; ino endai enka ku mikōko mijimine ya njibo ya Isalela. Pomwenda, sapulai amba: ‘Bulopwe bwa mūlu bubafwena pabwipi.’”​—Mateo 10:5-7.

Bulopwe bobasapula i bobwa bwesambīlepo Yesu mu milombelo ya kulondela’ko. ‘Bulopwe bwadi ke bufwene’ mu buluji bwa amba Yesu Kidishitu, Mulopwe utongelwe na Leza udi’po. Penepa i bika bilombola’mba bana bandi ba  bwanga bo babundile buno Bulopwe? Yesu webape bukomo bwa kubelula misongo enka ne kusangula bafwe, kadi bino byonso ku bitupu. Penepa batumibwa bakamona namani bisakibwa byabo, kimfwa bidibwa bya difuku ne difuku?

Yesu wasapwila bana bandi ba bwanga kuleka kusela bintu bya ku ngitu mu luno lwendo lwa busapudi. Kebafwaninwepo kusela olo, ndalama, nansha mukuba mwa kupotela bintu. Kadi kebasakilwapo mufuko wa bidibwa wa mu lwendo nansha kivwalwa ne bikwabilo bya ntentekelo. Mwanda waka? Yesu webakulupija’mba: “Mwingidi ufwaninwe kupebwa byakudya byandi.” (Mateo 10:10) Bantu basangela musapu bobakatana bo bakakwasha bana ba bwanga mu bisakibwa byabo bya kyalwilo. Yesu amba: “Konso komutwela mu njibo, shikatai’mo enka ne byomukataluka pa kifuko’pa.”​—Mako 6:10.

Yesu waleta ne bulombodi butala pa mwa kufikila ku njibo na musapu wa Bulopwe amba: “Kitatyi kyomutwela mu njibo, imunai ba mu njibo. Shi njibo’ya i mifwaninwe, nankyo ndoe yomweisakila ikale ponka; ino shi ke mifwaninwepo, nabya ndoe yenu ijokele komudi. Konso kekwimutambulapo muntu nansha kwivwana binenwa byenu, nabya pa kutamba mu yayo njibo nansha mu kyakyo kibundi, kūkulai luvumbi ku mayo enu.”​—Mateo 10:12-14.

Bikokejika kibundi kituntulu, kikatampe nansha kityetye kyapela musapu wabo. Penepa kikafikilwa na bika? Yesu amba nankyo kikafikilwa na butyibi busumininwe. Washintulula’mba: “I bine nemulombola’mba, mu Difuku dya Butyibi, ntanda ya Sodoma ne Ngomola ikapēlelwa kūminina kutabuka kyakyo kibundi.”​—Mateo 10:15.