Yesu ambulwile chikuma hamyaka yivali. Kutala olu lwapwile lwola lwakuzelendenda mumulimo wenyi tahi? Nduma, Yesu aputukile kwambulula chikuma mujimbu hakuya “mujinganda josena namumembo osena [amuNgalileya], nakunangula vatu mujisunangonga javo, nakwambulula mujimbu wamwaza waWangana, nakuka misongo yosena nakuviza chosena vavijilenga vatu.” (Mateu 9:35) Vyuma amwene vyamulingishile ambulule chikuma mujimbu natwima. Uno ateselemo ngachilihi mulimo kana?

Omu Yesu atambukilenga, amwenenga vatu vaze vasakiwile kuvakafwa nakuvavendejeka. Vayanjile nakulimwanga mwomwo vapwile nge mikoko vakuzeneka kafunga. Avevwilile keke, kaha alwezele tumbaji twenyi ngwenyi: “Mulimo wakwaha unatoho, oloze vaka-kuzata vanapu vavandende. Shikaho mulombenu Mwenyamulimo wakwaha mangana atume vaka-kuzata vayenga mumulimo wenyi wakwaha.”—Mateu 9:37, 38.

Yesu atachikijile vyuma navivakafwa. Akungulwile vaposetolo jenyi 12, avapangile vavali vavali, kaha avatumine kuya nakwambulula. Avahanyine jindongi ngwenyi: “Kanda namuya mujila yavaka-mafuchi ekako, kaha nawa kanda namwingila munganda yavaSamaliya numba yimweko. Oloze yenunga kaha kuli mikoko vakujimbala vakuzuvo yaIsalele. Kahomu namuya, ambululenunga ngwenu: ‘Wangana wamelu unapandama kwakamwihi.’”—Mateu 10:5-7.

Vambulwilenga vyaWangana uze Yesu ahanjikile mukulomba chenyi. Eyo, ‘Wangana wapandamine kwakamwihi’ mwomwo Yesu Kulishitu uze vatongwele kuli Kalunga kupwa Mwangana kwapwile. Vyuma muka vyasolwele nge tumbaji twenyi  vemanyinyineko Wangana kana? Yesu ahanyine tumbaji twenyi ngolo jakuka vaveji nakusangula vafu, chakuzeneka kufwetesa vatu kana. Kaha vaposetolo vahashile ngachilihi kulizakama vavene kuvyuma vyakumujimba?

Yesu akanyishile tumbaji twenyi kuwahisa vyuma vyakumujimba vyakumbata hakuya nakwambulula. Kavatelelele kumbata ulu, palata, chipwe unengu mujingonga javoko. Kavatelelele nawa kumbata lipakumuna lyavyakulya haungeji wavo, chipwe uvwalo ukwavo, chipwe mendelo yikwavoko. Mwomwo ika? Yesu avafwelelesele ngwenyi: “Muka-kuzata atela kumuhana kulya chenyi.” (Mateu 10:10) Vatu vaze navevwilila kumujimbu watumbaji vakiko navavazakama kuvyuma vyakumujimba. Yesu ambile ngwenyi: “Mweshomwo muzuvo namwingila, twamenu vene muze palanga nomu namukafuma muchihela kana.”—Mako 6:10.

Yesu ahanyine jindongi kuli tumbaji twenyi jamwakuhanjikila navatu vyamujimbu waWangana. Ambile ngwenyi: “Omu namwingila muzuvo, menekenu vatu vakuzuvo kana. Kachi nge vatu vakuzuvo kana vatela, kaha kuunda chenu namuvavulukila chipwenga hali vakiko. Oloze nge kavatelako, kaha kuunda chenu chikinduluke cheka kuli enu vavene. Weshowo mwakana kumitambula, chipwe kwivwilila kumazu enu, hakufuma muzuvo kana, chipwe munganda kana, kalitotomonenu lukungu kumahinji enu.”—Mateu 10:12-14.

Vatu vamunganda yosena chipwe mwimbo vahashile kukana mujimbu wavo. Kachi nge vatu vamunganda kana vanakane, vyuma muka navikasoloka kuli vakiko? Yesu ahanjikile ngwenyi kusopesa chachinene nachikeza hali vakiko. Ambile ngwenyi: “Chamuchano vene nangwamba kuli enu ngwami, kuzangamisa navakazangamisa nganda kana haLikumbi lyaKusopesa nachikatohwa chikuma kuhambakana chalifuchi lyaSotome naNgomola.”—Mateu 10:15.