Yesu osebedo ka yalo gi kinda ahinya kuom higni ma dirom ariyo kama. Be koro onego oduok kindane mar yalo chien? Ooyo. Oyalo e okang’ momedore kuom “wuotho e taonde gi gwenge duto [mag Galili] kopuonjo e sunagokegi, kendo koyalo wach maber mar Pinyruoth, kendo kochango kit tuoche duto kod kit midekre duto.” (Mathayo 9:35) Gik moneno miyo obedo gadier ni tij yalo onego otim e okang’ momedore ahinya. Kata kamano, ere kaka obiro chopo mano?

Sama Yesu wuotho koyalo, oyudo joma onego oho chunygi gi wach Nyasaye. Ngima jogo ni kama rach kendo gike mana ka rombe ma onge jakwath. Yesu kecho jogo, kendo owacho ne jopuonjrene niya: “Adier, tij keyo duong’, to jotich e ma nok. Omiyo, kwauru Ruodh keyo mondo oor jotich e keyone.”​—Mathayo 9:37, 38.

Yesu ong’eyo gima biro konyo. Oluongo jootene 12 kae to oketogi e grube auchiel mag joyalo moting’o ji ariyo-ariyo. Bang’ mano, ochikogi kama: “Kik udhi e ndara mar ogendni mamoko kendo kik udonj e taon moro amora mar Samaria, to kar mano sikuru ka udhi ir rombe molal mag od Israel. Sama udhi, yaluru ka uwacho niya: ‘Pinyruodh polo osekayo machiegni.’”​—Mathayo 10:5-7.

Pinyruoth ma onego giyal wachne e ma Yesu nowuoyoe e lamone mar ranyisi. Sama giyalo ni “Pinyruodh polo osekayo machiegni” mano nyiso ni Yesu Kristo ma e Ruoth ma Nyasaye oseyiero, nitie. Kata kamano, ere kaka ji biro yie  ni adier jopuonjrene gin joma oor mondo oyal wach sirkal mar Pinyruodhno? Yesu miyogi teko mar chango joma tuo kendo chiero joma otho, ka gitimo kamano ma onge chudo moro amora. To ere kaka jootego biro yudo dwarogi mag ringruok, kaka chiembgi mapile?

Yesu nyiso jopuonjrene ni kik giting’ gik ringruok sama gidhi e tijgi mar yalo. Ok onego giting’ dhahabu, fedha, kata mula e gikgi mag ting’o pesa. Ok onego giting’ kata mana ofuko mar chiemo, kata lewni ma iye, kata wuoche. Nikech ang’o? Yesu singonegi kama: “Jatich owinjore oyud chiembe.” (Mathayo 10:10) Joma gidhi yudo morwako wach ma giyalo biro konyogi gi gik ringruok ma gichando. Yesu wachonegi niya: “Ka udonjo e ot moro amora, beduru kanyo nyaka ua.”—Mariko 6:10.

Bende, Yesu nyisogi weche monego giluw sama gichopo e od ng’at ma gidwaro yalone wach Pinyruoth. Owachonegi kama: “Sama udonjo e ot, mosuru joodno. Ka odno owinjore, to kuwe maru mondo obed kuome; to ka ok owinjore, to kuwe maru mondo oduognu. Kamoro amora ma ng’ato ok orwakoue kata ok owinjoe wecheu, sama uwuok e odno kata e taondno, teng’uru buch tiendeu.”​—Mathayo 10:12-14.

Taon, kata gweng’ mangima nyalo tamore winjo wach ma giyalo. Ang’o ma biro timore ne taon kata gweng’ ma kamano? Yesu nyiso ni kum mager biro yudo joma kamago. Olero niya: “Adier awachonu ni, kum mar piny Sodom gi Gomora nobed ma berberie moloyo mar taondno e Chieng’ Bura.”—Mathayo 10:15.