Yesu onnatepa oweiwa mmuteko woolaleerya mu iyaakha piili. Apwanne ela elukuluku ya ovukula muteko awe ni wiichuuwa? Moohiyana, Yesu onnaaceererya muteko awe woolaleerya moorweela wa ‘wetxetxa ipoma ni ilapo sothene [so Kalileya], ahusihaka musinagoga alaleyaka Mutxhaka wa omwene, ni àpenusaka atxhu wa iretxa ni masoso aya othene.’ (Mateu 9:35) Echu onooneiye ennamulekecha wi ti woochuneya waaceererya muteko awe woolaleerya. Nyenya oni awerye hai waakhwaniherya yeela?

Va mukwahani, Yesu onnawoona achu anachuna ohakararya ni nikhaviheryo, eparipari enavahaaya. Awo ari ntoko ipucepuche ihirino mukukhula, oovovonya naari oomwaryeya ni oovolola. Owo onnatepa waathananela nave onnaloca wa amuhuserya awe: “Ematxa yòtepa wunnuwa, nto anamalapa àri vakhani. Munvekeleke mwanene a ematxa wi àrumihele anamalapa mmatxani mwawe.”—Mateu 9:37, 38.

Yesu onnasuwela yeeyo eni ekhaviherye. Owo onnawiichana arummwa khumi napiili nave onnaakawa apili apili, epakeyaka makhuuru mathanu nammoha a oya mmuteko woolaleerya. Owo onnaahusiha mookwakwaleya: “Muhitxhareke iphiro s’amalapo, nari muhivolowe ipoma s’Asamariya. Haweni, mwapatxerye iputxeputxhe sorimela sa Isarayele. Munaviranyuwo mulaleyeke muriki: ‘Omwene wa wirimu ori vakhiviru.’”—Mateu 10:5-7.

Omwene awo analaleeryaaya ti yoowo Yesu aalonceiye mu nivekelo na ntakiheryo. ‘Omwene ori vakhiviru’ nthowa nawi Mwene othanliwe ti Muluku, Yesu Kristu, ori vaava. Tiheeni enooniherya  wi amuhuserya awe chiryene aneemelela olamulelo Woomwene? Yesu onnaavaha owerya wa waapenusa areca ophiyeryatho waaviiha alipa ookhwa, soothene iha mahaleene. Vanonto, arummwa yahaala wiivakulela hai, hiiha ntoko yoolya aya ya nihiku nnihiku?

Yesu onnaaleela amuhuserya awe ohipaka marehereryo aya mmukwaha yoola woolaleerya. Awo hanaphwanela okusa ewooro, eparata naari ekoopre mmurupani mwaya. Ophiyerya wi awo hanaphwanela okusa murupa wa soolya naari soowara piili naari isapatho. Ntakhara heeni? Yesu onnaaroromeliha: “Namalapa onnaphwanela nlivelo nawe.” (Mateu 10:10) Achu amuhuserya anaphwanyaaya yaawo anathamalela muchaka aya anahaala waavaha ichu soochuneya. Yesu onaaleela: “Mwaphiyà mmawani, vate muneranyu mwakheliwevo, mukhale vava, ophiyerya nihiku muneranyu nvinyevo nipuro nenlo.”—Marko 6:10.

Yesu onnaahusihatho mukhalelo aneeraaya yaaphwanyihe alipa vaate muchaka Woomwene, mu oloca: “Mwavolowaka mpa mulotxele empa yeyo. Nave empa yeyo yaphwanelelà, onamukuruwelamo muretxele; nto, yahiphwanelelà, muretxele anyu onamokòkelani. Mwahakheliwà ni yahiwà masu anyu, mwavinyakavo va empa yeyo, nari epoma, mutathelevo ntxhupi na inani sanyu.”—Mateu 10:12-14.

Waahaala okhala wooweryeya achu a epooma naari muceche woothene okhooca muchaka aya. Eyo yaataphulela eheeni vooloca sa mapuro yaawo? Yesu onnaloca wi saahaala okhumelelawo ipahu sa mathorihelo. Owo onnathariha: “Eparipari kinnolèlani: nihiku nothoriha Muluku oni amorele ikharari atxhu o Sódoma ni o Gomóra opwaha epoma yeyo.”—Mateu 10:15.