Hesus tabatin mas o ménos dos aña ta prediká intensivamente. Akaso tabata tempu pa e baha man i bai mas trankil? Al kontrario, el a oumentá su aktividat di prediká. El a kuminsá un otro “gira den tur stat i pueblito [na Galilea]” i tabata “siña hende den nan snoanan, prediká e bon notisia di Reino i kura tur sorto di malesa.” (Mateo 9:35) I loke el a mira a konvens’é ku ainda mester a hasi mas den e trabou di prediká. Pero kon lo el a logra esaki?

Tabata asina ku unda ku Hesus a bai, tabatin hende ku tabatin mester di yudansa spiritual i konsuelo. Nan tabata manera karné sin wardadó, soyá i deskuidá. Hesus a haña duele di nan i a bisa su disipelnan: “En bèrdat e kosecha ta grandi, ma trahadó ta poko. P’esei, roga Doño di e kosecha pa manda trahadó pa kosechá.”—Mateo 9:37, 38.

Hesus tabata sa kiko e mester a hasi pa haña mas trahadó. El a yama e 12 apòstelnan huntu i a parti nan dos dos, formando asina seis tim di predikadó. Kaba el a duna nan instrukshon kla: “No bai serka hende di e nashonnan, ni drenta stat samaritano; mas bien, sigui bai serka e karnénan pèrdí di e kas di Israel. Segun ku boso ta bai, prediká i bisa: ‘E Reino di shelu a yega serka.’”—Mateo 10:5-7.

E Reino ku nan mester a prediká tokante dje tabata esun ku Hesus a menshoná den su orashon di Nos Tata. ‘E Reino a yega serka’ den e sentido ku e Rei, ku Dios a nombra, esta, Hesukristu, tabata presente. Pero kon Hesus su  disipelnan por a proba ku di bèrdat nan tabata representante di e Reino? Wèl, Hesus a duna nan poder pa kura hende i pa asta lanta hende for di morto. I tur e kosnan akí nan tabata hasi sin kobra nada. Kon anto nan por a perkurá pa nan nesesidatnan di tur dia, por ehèmpel pa nan pan di kada dia?

Hesus a bisa nan pa no bai ku nada riba nan gira di predikashon. Nan no mester a bai ku moneda di oro, di plata ni di koper. Nan no mester a bai ku ni sikiera saku di kuminda ni paña ni un par di sandalia èkstra pa nan biahe. Dikon nò? Hesus a sigurá nan: “E trahadó meresé su kuminda.” (Mateo 10:10) Pues, e hendenan ku lo a aseptá e mensahe lo a yuda perkurá pa e nesesidatnan básiko di e disipelnan. Hesus a bisa: “Unda ku boso yega, keda na kas di e hende ku risibí boso te ora boso bai for di e lugá ei.”—Marko 6:10.

Fuera di esei, Hesus a instruí nan kon nan mester a aserká e doñonan di kas ora di prediká e mensahe di Reino. El a bisa nan: “Ora boso drenta un kas, kumindá e hendenan di kas i deseá nan pas. Si e kas ta digno di esei, laga e pas ku boso a dese’é bini riba dje. Ma si e kas no ta digno di esei, laga e pas bini bèk riba boso. Kaminda hende no risibí boso ni skucha boso palabra, ora boso ta sali for di e kas òf stat ei, sagudí e stòf for di boso pia.”—Mateo 10:12-14.

Sí, henter un stat òf pueblo lo por a rechasá nan mensahe. Pero kiko esei lo a nifiká pa e stat òf pueblo ei? Hesus a bisa ku esei lo a resultá den un huisio severo i desfaborabel pa e hendenan. El a splika: “Di bèrdat mi ta bisa boso: Riba Dia di Huisio lo ta mas soportabel pa e tera di Sódoma i Gomora ku pa e stat ei.”—Mateo 10:15.