Jesusqa mana saykʼuspa iskay watasta jinaña Galileapi willasharqa. Jinapis astawanraj willanan karqa. Chayrayku payqa “tukuy llajtasta, tukuy ranchostawan muyumorqa, sinagogasninkupi yachachispa, Diospa Gobiernonmantapis sumaj willaykunata willaspa. Tukuy laya onqosqastataj sanoyacherqa” (Mateo 9:35). Payqa repararqa astawanraj willamunan kasqanta. Kunantaj imaynatachus chayta ruwasqanta qhawarina.

Jesusqa runasmanta khuyakorqa, imaraykuchus mana michejniyoj ovejas jina mitharasqas, tʼaqa tʼaqallataj kasharqanku. Chay runasqa Diosmanta yachakuyta, sonqochasqa kayta ima necesitarqanku. Chayrayku Jesusqa nerqa: “Cheqamanta cosechanaqa ashkha, oqharejkunarí pisilla kanku. Chayrayku cosechaj Dueñonmanta mañakuychej cosechanman oqharejkunata kachamunanpaj”, nispa (Mateo 9:37, 38).

Jesusqa runasta yanapariyta munaspa 12 apostolesninta wajyarqa. Paykunatataj iskaymanta iskay willaj rinankupaj sojtaman tʼaqarparerqa. Chantá paykunaman nerqa: “Ama rinkichejchu mana judío kajkunaj ñannintaqa, amallataj yaykunkichejchu samaritanospa llajtasninkumanpis. Astawanqa Israel llajtallaman riychej, paykunaqa chinkasqa ovejas jina kanku. Rishaspataj willamuychej: ‘Cielopi kaj Gobiernoqa qayllapiña kashan’, nispa” (Mateo 10:5-7).

Apostolesqa Diospa Gobiernonmanta willananku karqa, Jesustaj chayta padrenuestropi  mañakunankuta nerqa. Jesucristo kay jallpʼapi kashasqanrayku “Cielopi kaj Gobiernoqa qayllapiña kashan” nispa willananku karqa. Chantapis Jesús paykunaman atiyta qorqa willanankupaj, onqosqasta sanoyachinankupaj, wañusqastapis kausarichinankupaj. Tukuy chayta ruwasqankumantataj, mana qolqeta mañanankuchu karqa. Imajtinchus ni imata pisichikunankuchu karqa.

Jesusqa apostolesninman nerqa, willaj rishaspaqa ama qʼepita apakunankuta. Chantapis nillarqataj: “Ama qolqe chʼuspaykichejpi apaychejchu qorita, qolqeta, nitaj cobretapis. Nillataj ñanpaj apakuychejchu wayaqata, [...] waj jukʼutasta”, nispa. Jesús chayta nerqa, Diospa Palabranta tukuy sonqo japʼikojkuna paykunata yanaparinankuta yachasqanrayku. Jesús nillarqataj: “Llankʼaj runaqa mikhuchisqapuni kanqa”, nispa (Mateo 10:10). Chantapis nerqa: “Mayqen wasillamanpis yaykuspaqa, chaypi qhepakuychej chay llajtamanta ripunaykichejkama”, nispa (Marcos 6:10).

Jesusqa apostolesninman yachacherqa: “Uj wasiman yaykuspaqa, chaypi tiyakojkunata napaykuychej. Paykunachus uyariyta munasunkichej chayqa, ‘allin kausay kachun’ nisqaykichejqa paykunata yanapachun. Mana uyariyta munasunkichej chayqa, ‘allin kausay kachun’ nisqaykichejqa qankunaman kutinpuchun. Sichus pipis mana wajyarisunkichejchu, nitaj parlasqaykichejtapis uyarisunkichejchu chayqa, chay wasimanta chayri chay llajtamanta llojsipushaspa, chakisniykichejmanta jallpʼata thalarakuychej”, nispa (Mateo 10:12-14).

Jesusqa nerqa, wakin wasispi, wakin llajtaspipis apostolesninta mana uyarinankuta. Chantapis nillarqataj mana uyarejkunapaj sinchʼi castigo kananta. Pay nerqa: “Cheqatapuni niykichej: Chay llajtapaj Juicio Pʼunchayqa aswan sinchʼi kanqa, Sodoma, Gomorra jallpʼasmanta nisqaqa”, nispa (Mateo 10:15).