Jesusqa ishkë watapanam më tsëchö yachatsikurnin këkashqa karqan, peru manam tsërëkurtsu mas wallka tiempullana yachatsikunan y jamanampaq hörana kanqanta pensarqan. Tsëpa rantinqa, Gobiernupita alli willakïkunata willakur y imëka nanatsikïyoqkunata y qeshyayoqkunata kachakätsirmi, Galilëapa ‘llapan markankunapa y caserïunkunapa’ “Diosta adorayänan wayikunachö yachatsikur” karqan (Mateu 9:35). Alli willakïkunapita mas nunakunataraq yachatsinan alläpa precisanqantam rikarqan. ¿Imatataq rurarqan llapankunata yachatsinampaq?

Yachatsikur ëwëkarmi, Diospa kaqchö yanapayänanta y shoqayänanta wanaq mëtsika nunakunata rikarqan, pëkunaqa mana alli tratashqa y mitseqninnaq üshakunanömi këkäyarqan. Jesusqa alläpam ankuparqan. Tsëmi qateqninkunata kënö nirqan: “Ëllïpaq cosëchaqa mëtsikam, peru peonkunaqa wallkaqllam kayan. Tsënö këkaptinqa, cosëchapa Duëñunta rogakuyë cosëchanman peonkunata kachamunampaq” (Mateu 9:37, 38).

Mas nunakunata yanapëta munarmi, Jesusqa 12 apostolninkunata ishkaqtayan kacharqan, y kënö nirqan: “Ama ëwayankitsu juk nacion nunakunamanqa, y ama Samariapa mëqan markankunamampis yëkuyankitsu; tsëpa rantinqa, oqrakashqa üshakunanö këkaq Israel nacion kaqkunallaman ëwayë. Ëwarnin, kënö nir willakuyanki: ‘Ciëluchö Gobiernuqa këllachönam këkan’” (Mateu 10:5-7).

Padrenuestruchö Jesus mañakunqan Gobiernullapitam yachatsikuyänan karqan. Dios akranqan rey karnin, y pëkunawan këkarmi, Jesusqa  tsë Gobiernuqa “këllachönam këkan” nirqan. Peru ¿imanötaq qateqninkunaqa tsë Gobiernupita yachatsikuyänampaq autoridäyoq kayanqanta rikätsikuyanman karqan? Jesus qonqan poderwan qeshyëkaqkunata kachakätsir y wanushqakunata kawaritsirmi, y tsëtaqa qellëta mana mañakushpam rurayänan karqan. Peru ¿imanöraq mikuyänampaq, vistikuyänampaq y wakin wanayanqankunataqa tariyanman karqan?

Jesusqa yachatsikur ëwayänampaq imatapis mana alistayänampaqmi pëkunata nirqan. Manam öruta, ni plätata, ni cobrita apayänantsu karqan. Manam mirkapa puritsina pikshata, ni röpakunata, o juk par mas llanqillatapis apayänantsu karqan. ¿Imanir? Porqui Jesus ninqannöpis, “peonqa mikïnin chaskinanmi” (Mateu 10:10). Qateqninkunaqa, yachatsikuyanqanta wiyakïta munaqkunatam tariyänan karqan y pëkunam wanayanqanchö yanapayänan karqan. Tsëmi Jesus kënö nirqan: “Mëchöpis juk wayiman yëkurqa, tsëchö quedakuyë tsë markapita ëwakuyanqëkiyaq” (Marcus 6:10).

Jina wayin wayin yachatsikurnin imanö parlapar qallayänampaq kaqtapis yachatsirqanmi. Kënömi nirqan: “Wayiman yëkurirqa, tsëchö täraqkunata saludakuyanki. Tsë wayichö chaskiyäshuptikiqa, yamë kayänanta munayanqëki pëkunachö katsun; peru mana chaskiyäshuptikiqa, yamë kayänanta munayanqëki qamkunaman kutimutsun. Mëchöpis chäyanqëkichö pipis mana chaskiyäshuptiki ni wiyayäshuptikiqa, tsë wayipita o tsë markapita yarqurir chakikikunapita polvuta tapsikuriyë” (Mateu 10:12-14).

Itsapis juk caserïu o juk entëru markapis wiyakïta munanmantsu karqan. Tsëqa, ¿imaraq pasanman karqan tsëchö täraq nunakunata? Feyupa castigashqa kayanampaq kaqtam Jesusqa nirqan. “Juiciu Junaqchöqa Sodömawan Gomörrapitapis tsë markaqa mas feyupa castigashqam kanqa” nirqanmi (Mateu 10:15).