Yesu wangupharazga mwaphamphu kwa vyaka pafufupi viŵi. Kweni wanguŵanaŵanapu cha kuti wapumuwi pamwenga kuti waleki ntchitu yakupharazga. M’malu mwaki, iyu wangusazgiyaku uteŵeti waki ndipu “wangwamba kwenda mumatawuni ngosi ndi mumizi yosi [ya Galileya], kusambiza mumasinagogi ngawu ndi kupharazga uthenga wamampha wa Ufumu, kuchizga matenda ngamtundu wewosi ndi masuzgu ngamtundu wewosi.” (Mateyu 9:35) Vo Yesu wanguwona vingumuchitiska kuti wakapharazgi muvigaŵa so vinyaki. Kweni kumbi watingi wafiskengi wuli ntchitu yeniyi?

Wachiyenda, Yesu wanguwona ŵanthu wo akhumbikanga kuŵawovya kuti aziŵi uneneska kweniso kuti apembuzgiki ndi uneneska wenuwu. Yiwu ŵenga nge mbereri zambula mliska, akulimukalimuka kweniso akujowoleka. Iyu wanguŵalenge lisungu ndipu wangukambiya akusambira ŵaki kuti: “Nditikuneneskiyani kuti ntchitu yakuvuna njikulu kweni antchitu mbamana. Mwaviyo, pemphani Mweneku wa ntchitu yakuvuna kuti watumizi antchitu anandi ku ntchitu yaki.”—Mateyu 9:37, 38.

Yesu waziŵanga vo vatingi viwovyengi pa ntchitu yeniyi. Iyu wangudana akutumika ŵaki 12 ndi kuŵagaŵa ŵaŵiŵaŵi, ndipu wosi angukwana magulu 6. Pavuli paki, wanguŵapaska ulongozgi wakuti: “Mungalutanga mumisewu ya ŵanthu amitundu yinyaki cha, ndipu mungaserenga mutawuni yeyosi cha ya Asamariya; kweni nyengu zosi mulutengi kuchipenja mbereri zakusoŵa za nyumba yaku Isirayeli. Muchiluta mukapharazgengi kuti: ‘Ufumu wakuchanya waŵandika.’”—Mateyu 10:5-7.

Ufumu wo akutumika ŵenaŵa achipharazganga wenga wo Yesu wangukamba mupempheru lakuwoniyapu. Yiwu apharazganga kuti ‘Ufumu waŵandika’ chifukwa Yesu Khristu yo ndi Fumu yo Chiuta wakusankha,  wenga nawu pa nyengu yeniyi. Kumbi ntchinthu wuli cho chalongonga kuti akutumika ŵenaŵa amiyanga nadi Ufumu waku Chiuta? Yesu wanguŵapaska nthazi zakuchizgiya wo atamanga kweniso kuyuska akufwa kwambula kulipirika chechosi. Kumbi akutumika atingi asaniyengi wuli vinthu vakukhumbika pa umoyu nge chakurya?

Yesu wangukambiya akutumika ŵaki kuti angapinganga chechosi cha achiluta kuchipharazga. Wanguŵakambiya kuti angapinganga cha vinthu nge golidi, siliva pamwenga mkuŵa muvikwama vawu vandalama. Akhumbikanga so cha kupinga thumba la chakurya cha pa ulendu pamwenga malaya ngaŵi pamwenga sapatu zakusinthiya. Ntchifukwa wuli wanguŵakambiya viyo? Yesu wanguŵasimikiziya kuti: “Wantchitu watenere kulonde phosu.” (Mateyu 10:10) Ŵanthu wo atingi akavwiyengi uthenga wo apharazganga ndiwu atingi akaŵapaskengi vinthu vakukumbika akutumika ŵenaŵa. Ndichu chifukwa chaki Yesu wangukamba kuti: “Munyumba yeyosi yo mwamusere, mukaje mwenimo mpaka po mutuliyengeku kweniko.”—Mariko 6:10.

Yesu wanguŵapaska so ulongozgi wa mo angachifikiya ŵeneku anyumba ndi uthenga wa Ufumu. Iyu wanguŵakambiya kuti: “Muchisere munyumba, tawuzgani ŵanthu a munyumba yo. Asani nyumba yo njakwenere, chimangu cho mutiyikhumbiya chiŵi panyumba yo; kweni asani njambula kwenere, chimangu chinu chiwere kwaku yimwi. Kwekosi ko munthu wakana kukulondiyani pamwenga kuvwisiya mazu nginu, phatani fuvu kumaphazi nginu muchituwa munyumba yo pamwenga mutawuni yo.”—Mateyu 10:12-14.

Kumbi ntchinthu wuli cho chatingi chichitikiyengi tawuni pamwenga muzi wo wakana kuvwisiya uthenga wo akutumika apharazganga? Yesu wangukamba kuti tawuni yo yakhumbikanga kuyeruzgika. Iyu wanguti: “Nditikuneneskiyani, pa Zuŵa la Cheruzgu, cheruzgu cha tawuni yo chazamukuŵa chikulu kuluska cha Sodomu ndi Gomora.”—Mateyu 10:15.