Ko oti ne talai malosi atu a Iesu mō se lua tausaga. E mata, ko oko nei ki te taimi ke faifai malie tena galuega kae malōlō malie aka? Ikai, ne fakalauefa atu ne Iesu tena galuega talai mai te faimalaga atu “i fa‵kai ‵lasi mo fa‵kai fo‵liki katoa [o Kalilaia], o akoako i olotou sunako kae talai atu te tala ‵lei o te Malo kae faka‵lei a vaegā masaki katoa.” (Mataio 9:35) A mea kolā ne lavea ne ia, ne fakatalitonu atu ki a ia me e ‵tau o fakalauefa atu te galuega talai. Kae ka fai pefea ne ia te mea tenei?

I taimi e faimalaga ei a ia, ne lavea ne Iesu a te ma‵nako o tino ki faka‵leiga mo fakamafanafanaga i te feitu faka-te-agaga. E fai latou e pelā me ne mamoe kolā e seai se lotou tausi mamoe, ko pa‵ka kae ko tuku tiaki. Ne alofa malosi tou tagata ki a latou kae fai atu ki ana apositolo: “E tonu, e uke a fuataga e ‵tau o tau, kae e mu‵tana a te kau faigaluega. Tela la, fakatagi atu ki te Matai o te galuega ke uga mai ne tino ga‵lue e tokouke ki te katiga o saito.”—Mataio 9:37, 38.

Ne iloa ne Iesu a te fesoasoani telā e ‵tau o tuku atu. Ne fakatonu atu a ia ki ana apositolo e toko 12 kae ‵vae aka ne ia latou ki ‵pea taki tokolua, telā ne maua i ei a potukau e ono o tino talai. Ne avatu ei ne ia a fakatonuga manino ‵lei ki a latou: “Sa olo ki tino o fenua fakaa‵tea, kae sa olo foki ki fa‵kai o Samalia; kae olo atu fua ki mamoe ko ‵galo o te fenua o Isalaelu. Olo o talai atu penei: ‘A te Malo o te lagi ko pili mai.’”—Mataio 10:5-7.

A te Malo telā e ‵tau o talai atu ne latou ko te Malo telā ne faipati a Iesu ki ei i te ‵talo fakaakoako. ‘Ko pili mai te Malo’ ko tena uiga, me ne nofo atu i konā i te taimi tenā a te Tupu telā ne filifili aka ne te Atua, ko Iesu Keliso. Se a te mea e  fakamaoni mai i ei me i ana soko ko sui ‵tonu eiloa i te pulega a te Malo? Ne tuku atu ne Iesu te malosi ki a latou ke faka‵lei a tino ma‵saki kae faka‵tu aka foki a tino ‵mate, telā e seai eiloa se ‵togi mō mea katoa konei. Ka tausi atu la pefea a te kau apositolo ki olotou manakoga totino, e pelā mo olotou mea‵kai?

Ne fai atu a Iesu ki ana soko ke mo a ma fakatoka ne mea faka-te-foitino mō te lotou malaga talai. E se ‵tau o ave ne latou ne aulo, siliva, io me ne tupe kopa i olotou taga. E se ‵tau foki o ave ne taga mea‵kai mō te malaga, io me ne gatu tala, io me ne taka. Kaia? Ne fakatalitonu atu a Iesu ki a latou: “E ‵tau o maua ne te tino faigaluega ana meakai.” (Mataio 10:10) A latou kolā e maua atu kae talia ne latou te otou fekau, ka fesoasoani o tausi atu ki manakoga tāua o soko. Ne fai mai a Iesu: “I so se fale e ulu koutou ki ei, ‵nofo i konā ke oko eiloa ki te taimi e tiaki ei ne koutou te koga tenā.”—Maleko 6:10.

Ne tuku atu foki ne Iesu a fakatonutonuga ki te auala ke taku atu ei te fekau o te Malo ki tino, ana muna: “Kafai e ulu atu koutou ki se fale, fakatalofa atu ki tino i loto i ei. Kafai e talia ne latou, ke i luga i a latou te filemu, kae kafai e se talia ne latou toe faka‵foki mai la te filemu ki a koe. So se tino e se talia ne ia koutou io me e se faka‵logo ki otou pati, tuetue atu la a ‵pefu i otou vae māfai e olo koutou kea‵tea mai te fale io me ko te fa‵kai tenā.”—Mataio 10:12-14.

Ne mafai foki o se talia ne se fa‵kai lasi io me se fa‵kai foliki kātoa te lotou fekau. Se a te mea ka tupu ki se vaegā koga penā? Ne fakaasi mai ne Iesu a te ikuga fakamataku. Ana muna: “Au e fai tonu atu ki a koutou, ka māmā atu a te fakasalaga o Sotoma mo Komolo i te Aso Fakamasino i lō te fa‵kai tenā.”—Mataio 10:15.