Vokuenda kuanyamo avali a sulako, Yesu o litumbika calua kupange woku kunda. Anga hẽ ya kala otembo yoku tepulula upange waye woku kunda oco a puyuke? Sio, momo Yesu amisako lupange waye woku kunda poku “linga ungende valupale lo vovaimbo osi [o ko Galilea], oku longisa volosunangonga viavo kuenda oku kunda olondaka viwa Viusoma, loku sakula ovovei aiñi aiñi.” (Mateo 9:35) Ovina a lete viu vetiya oku amisako lupange waye woku kunda. Pole, o ka ci tẽlisa ndati?

Osimbu Yesu a kasi oku linga ugende, o mola omanu va sukila oku kuatisiwa londaka ya Suku kuenda oku lembelekiwa. Ovo va kasi ndolomeme ka vi kuete ungombo okuti, va talisiwa ohali loku sakalaisua. Yesu o va kuatela ohenda kuenda o sapuila olondonge viaye hati: “Ocili, oku ungula kualua, pole, olonalavayi vitito. Omo liaco, pingi ku Cime coku ungula oco a tume olonalavayi koku ungula kuaye.”—Mateo 9:37, 38.

Yesu wa kũlĩha ovina omanu vaco va sukila. Eye o kovonga 12 kovapostolo vaye kuenje o va tepa vavali vavali okuti va linga ovimunga epandu viakundi. Yesu eca kokuavo olonumbi viokuti: “Ko ka endi konjila ya vakualofeka kuenda ko ka iñili volupale laumue luo Samaria; pole, kuendi kolomeme via nyelela vionjo ya Isareli. Osimbu wendi kundi ndoco: ‘Usoma wo kilu u kasi ocipepi.’”—Mateo 10:5-7.

Ovo va ka kunda Usoma una Yesu a tukula vohutililo a longisa. Olondaka viokuti ‘Usoma wo kilu u kasi ocipepi,’ vi lomboloka okuti Osoma ya  nõliwa la Suku, okuti Yesu Kristu yi kasi pokati kavo. Pole, nye ci ka lekisa okuti olondonge via Yesu olonumiwa Viusoma waco? Yesu o va ĩha unene woku sakula omanu va vela, oku pindula omanu va fa okuti ka va ci lingi loku pinga olombongo. Oco hẽ ovapostolo va ka kuata ndati ovina va sukila ndeci okulia kueteke leteke?

Yesu o sapuila olondonge viaye oco ka vi ka linge eliangiliyo liovina va sukila kungende wavo woku kunda. Ovo ka va sukila oku ambata ulu, opalata ale osipi vovipete viavo. Ovo ka va sukilavo onjeke yoku ambatela okulia kungende, ovowalo avali, ale olohaku. Momo lie? Yesu o va likuminya hati: “Onalavayi yi sesamẽla okulia kuayo.” (Mateo 10:10) Olondonge vi ka sanga omanu vana okuti va tava kesapulo liavo kuenje omanu vaco va ka eca kokuavo ovina vi sukiliwa. Yesu o popia hati: “Vonjo yosi wiñili, omo vu kala toke eci vu tunda kocitumãlo caco.”—Marko 6:10.

Yesu wa ecavo olonumbi kolondonge viaye ndomo vi pondola oku kunda esapulo Liusoma komamu va sangiwa kolonjo viavo, poku popia hati: “Eci wiñili vonjo yimue, lami vakuanjo yaco. Nda va tava kesapulo, ombembua yene yi siale lavo; pole nda ka va tava, tiukili lombembua yene. Wosi ka yongola oku vu yekisi ale oku yeva kesapulo liene, tundi vonjo yaco ale vimbo liaco kuenje litutumuli oneketela kolomãhi viene.”—Mateo 10:12-14.

Citava okuti, olupale lumue ale imbo limue ka li tava kesapulo liavo. Nye ci pondola oku pita lolupale luaco? Yesu o lombolola okuti, ci pondola oku koka ekanga linene, poku popia hati: “Ocili, ndu sapuili siti, Keteke Liekanga ci leluka vali oku lekisa ohenda kofeka yo Sodoma lo Gomora, okuti olupale luaco lu sule.”—Mateo 10:15.