Hi Jesus maduruto nga nagsinangyaw ha sulod hin mga duha ka tuig. Panahon na ba nga umundang hiya ngan magpahayahay? Ha kabaliktaran, ginpahaluag pa niya an iya pagsangyaw nga buruhaton pinaagi ha ‘paglibot ha ngatanan nga syudad ngan baryo [han Galilea], pagtutdo ha ira mga sinagoga, pagsangyaw han maopay nga sumat han Ginhadian, ngan panambal han magkalain-lain nga sakit han mga tawo.’ (Mateo 9:35) An iya mga nakita nakakombinse ha iya nga kinahanglan pahaluagon pa an pagsangyaw nga buruhaton. Pero paonan-o niya ito bubuhaton?

Samtang nagbibiyahe hi Jesus, nakita niya nga kinahanglan hibaroan han mga tawo an kamatuoran basi hira mabuligan ngan maliaw. Sugad hira hin mga karnero nga waray paraataman, nga gin-anitan ngan ginpabay-an. Nalooy hiya ha ira salit iya ginsidngan an iya mga disipulo: “Oo, damu an aranihon, kondi gutiay an mag-arani. Salit pakimalooy kamo ha Agaron nga magpadara hin mga mag-arani ha iya aranihon.”—Mateo 9:37, 38.

Maaram hi Jesus kon ano an makakabulig. Iya iginpatawag an 12 nga apostol ngan ginpadis-padis hira, unom ka padis hira nga magsarangyaw. Katapos, iya gintagan hira hin klaro nga instruksyon: “Ayaw kamo pagkadto ha diri-Judio nga mga nasud, ngan ayaw kamo pagsulod ha syudad han mga Samaritano. Lugod, padayon nga pamilnga niyo an nagkawara nga mga karnero ha panimalay han Israel. Ha paglakat niyo, pagsangyaw kamo: ‘An Ginhadian han langit hirani na.’”—Mateo 10:5-7.

An Ginhadian nga ira igsasangyaw amo an ginhisgotan ni Jesus ha modelo nga pag-ampo. ‘An Ginhadian hirani na’ kay an ginpili han Dios nga Hadi, hi Jesu-Kristo, kaupod nira. Pero ano an magpapamatuod nga an iya mga disipulo tinuod nga mga representante hito nga Ginhadian? Gintagan hira ni Jesus hin awtoridad nga tambalon an mga may sakit ngan banhawon pa ngani an mga patay, ngatanan ini ira bubuhaton nga waray bayad. Pero, paonan-o nira susuportaran an ira mga panginahanglan, sugad han ira pagkaon ha kada adlaw?

Gintugon ni Jesus an iya mga disipulo nga diri mangandam han ira materyal nga mga kinahanglanon para hini nga pagsangyaw. Diri hira magdadara hin bulawan, silber, o tumbaga ha ira surudlan hin kwarta. Diri liwat nira kinahanglan hin surudlan hin pagkaon, reserba nga bado, o sandalyas. Kay ano? Hi Jesus nagpasarig ha ira: “Kay an magburuhat takos tagan hin pagkaon.” (Mateo 10:10) An mga tawo nga makarawat han ira mensahe amo an mabulig basi maitagana an ira nangunguna nga mga panginahanglan. Hi Jesus nagsiring: “Bisan diin nga balay kamo sumulod, didto la kamo tubtob ha pagbaya niyo hito nga lugar.”—Marcos 6:10.

Gintagan liwat hira ni Jesus hin instruksyon kon paonan-o makikiistorya ha tagbalay mahitungod han Ginhadian, ha pagsiring: “Pagsulod niyo ha balay, kumustaha an tagbalay. Kon takos ito nga panimalay, mahingada unta hito an kamurayawan nga iyo iginpapahayag, pero kon diri ito takos, magpabilin unta ha iyo an kamurayawan. Ha bisan diin, kon waray kumarawat ha iyo o waray mamati ha iyo mga pulong, paggawas niyo hito nga balay o syudad, ipadpad an tapotapo ha iyo mga tiil.”—Mateo 10:12-14.

Posible pa ngani nga diri karawaton han bug-os nga syudad o baryo an ira mensahe. Ano an mahitatabo ha sugad nga lugar? Hi Jesus nagsiring nga mabug-at gud nga sirot an ipapadapat hito nga mga lugar. Hiya nagsaysay: “Ha pagkamatuod, susumatan ko kamo: Ha Adlaw han Paghukom, mas makuri an sirot hito nga syudad kay ha Sodoma ngan Gomorra.”—Mateo 10:15.