Jesuseʼ tsʼoʼok kaʼapʼéel jaʼab joʼopʼok u kʼaʼaytaj. Baʼaleʼ maʼ tu tuklaj wa kʼaʼabéet u jeʼeleliʼ. Baʼaxeʼ «joʼopʼ u xíimbaltik tuláakal le kaajoʼob yéetel le mejen kajtaliloʼoboʼ, táan u kaʼansaj tu sinagogailoʼob, táan u kʼaʼaytik u maʼalob péektsilil le Reinooʼ yéetel táan u tsʼakik le máaxoʼob yaan jejeláas kʼojaʼanil yéetel muʼyajil tiʼoboʼ» (Mateo 9:35). ¿Baʼax péeks u maas tsʼáa u yóol kʼaʼaytaj? ¿Bix ken u beetil?

Le táan u bin u kʼaʼaytajoʼ, tu yilaj kʼaʼabéet u yáantaʼal le máakoʼob u meyajtoʼob Diosoʼ yéetel u kʼaʼabéetil u líiʼsaʼal u yóoloʼob. Letiʼobeʼ beyoʼob tamanoʼob loobiltaʼanoʼob yéetel kʼiʼitpajaʼanoʼob minaʼan máax kanáantkoʼobeʼ. Letiʼeʼ tu chʼaʼaj óotsilil tiʼob, le oʼolal tu yaʼalaj tiʼ u disipuloʼob: «U jaajileʼ, le joochoʼ yaʼab, baʼaleʼ le máaxoʼob ku joochoʼoboʼ junpʼíitoʼob. Le oʼolaleʼ, kʼáat óolteʼex tiʼ u Yuumil le kool ka u túuxt uláakʼ máakoʼob utiaʼal le joochoʼ» (Mateo 9:37, 38).

Jesuseʼ u yojel baʼax jeʼel u yáantkoʼobeʼ. Le oʼolal tu tʼanaj u doce apostoloʼobeʼ ka tu túuxtoʼob kaʼakaʼatúulil kʼaʼaytaj. Letiʼeʼ tu yaʼalajtiʼob: «Maʼ a bineʼex tuʼux kajaʼan le j-táanxel luʼumiloʼoboʼ, yéetel maʼ a wookleʼex tiʼ mix junpʼéel tiʼ le kaajoʼob yanoʼob Samariaoʼ, baʼaleʼ xeeneʼex chéen tu yiknal u kajnáaliloʼob Israel, máaxoʼob beyoʼob tamanoʼob saatloʼobeʼ. Le táan a bineʼexoʼ kʼaʼayteʼex lelaʼ: ‹U Reinoil kaʼaneʼ tsʼoʼok u náatsʼal›» (Mateo 10:5-7).

Le Reino tu yaʼalajtiʼob ka u kʼaʼaytoʼoboʼ letiʼe tu yaʼalaj xan ka kʼáataʼak ich oracionoʼ. Jesuseʼ tu yaʼaleʼ «u Reinoil kaʼaneʼ tsʼoʼok u náatsʼal», tumen  letiʼ, le máax yéeyaʼan utiaʼal reinaroʼ, way Luʼum yaneʼ. Baʼaleʼ ¿baʼax kun eʼesik u apostoloʼobeʼ ku tʼaanoʼob tu jaajil tiʼ le Reinooʼ? Jesuseʼ tu tsʼáaj poder tiʼob utiaʼal u tsʼakikoʼob gratis le kʼojaʼanoʼoboʼ yéetel u kaʼa kuxkíintikoʼob le kimenoʼoboʼ. ¿Bix túun ken u kaxtil le apostoloʼob baʼaxoʼob kʼaʼabéettiʼob, jeʼex le janaloʼ?

Jesuseʼ tu yaʼalaj tiʼ u disipuloʼob maʼ u biskoʼob mix baʼal ken xiʼikoʼob teʼ kʼaʼaytajoʼ. Maʼ u biskoʼob oro, plata yéetel cobre tu bolsaʼob. Maʼ unaj u biskoʼob baʼal u jaantoʼobiʼ, uláakʼ u nookʼoʼob wa u jeel u xaanaboʼob. ¿Baʼaxten? Jesuseʼ tu yaʼalaj: «Le máax ku meyajoʼ u náajaltmaj u yoʼoch» (Mateo 10:10). Le máaxoʼob kun kʼamik le maʼalob péektsiloʼ letiʼob kun tsʼáaik le baʼaxoʼob kun kʼaʼabéettaltiʼoboʼ. Jesuseʼ tu yaʼalajtiʼob: «Tiʼ jeʼel baʼalak najil ka ookkeʼexeʼ, pʼáateneʼexiʼ tak ken jóokʼkeʼex tiʼ le kaajoʼ» (Marcos 6:10).

Jesuseʼ tu yaʼalajtiʼob xan bix unaj u tsikbaloʼob yéetel u yuumiloʼob naj: «Ken ookkeʼex teʼ najoʼ, saludarteʼex le máaxoʼob yanoʼoboʼ táan a tsʼíiboltkeʼex ka yanak jeetsʼelil tiʼob. Wa ku náajmatkoʼobeʼ yanaktiʼob le jeetsʼelil ka tsʼíiboltkeʼexoʼ; baʼaleʼ wa maʼ tu náajmatkoʼobeʼ pʼáatak tiʼ teʼex le jeetsʼeliloʼ. Wa yaan tuʼux maʼ ta kʼaʼamleʼex mix tu yuʼubaʼal le baʼax ka waʼalikeʼexoʼ, le ken jóokʼkeʼex teʼ naj wa teʼ kaajoʼ, tíiteʼex u luʼumil a wookeʼex» (Mateo 10:12-14).

Maʼ xaaneʼ mix juntúul máak tiʼ junpʼéel kaaj kun kʼamik le maʼalob péektsiloʼ. ¿Baʼax túun kun úuchul tiʼ le kaajoʼ? Jesuseʼ tu yaʼaleʼ yaan u taal junpʼéel nojoch juicio tu yóokʼoloʼob. Letiʼeʼ tu yaʼalaj: «Tu jaajil kin waʼalikteʼex: Tu Kʼiinil le Juiciooʼ maas jeʼel u chʼaʼabal óotsilil tiʼ u kaajiloʼob Sodoma yéetel Gomorra ke tiʼ le kaaj tuʼux maʼ kʼaʼameʼexoʼ» (Mateo 10:15).