Apostolonakapar sum wakichtʼasajja, Jesusajj panin paninwa yatiyanipjjañapatak khitäna. Ukampis janiw ukak lurkänti, yatiyir sarasajj kuna jan walinakansa uñjasipjjañapäna uksa qhanañcharakïnwa. Jesusajj sänwa: “Nayajj ovejanakarjamaw qamaqenak taypir khitapjjsma [...]. Jaqenakat wal amuyasipjjam, tribunalanakaruw katuyapjjätam, sinagoganakapanwa jawqʼjapjjarakïtam. Cheqpachansa gobernadoranakana reyinakana nayraqataparuw naya laykojj apapjjätam” sasa (Mateo 10:16-18).

Jesusan arkirinakapajj uñisiñat arknaqataw uñjasipjjañapäna. Ukatwa Jesusajj jan llakisipjjañapatakejj akham säna: “Jupanakar katuyapjjätam ukhajja, kunjamsa parlapjjäta, kunsa parlapjjäta ukanakat jan llakisipjjamti, parlañ horasanjja yanapajj utjaniwa. Janiw jumanakakejj parlapkätati, jan ukasti Awkiman espiritupaw jumanakar parlañ yanaptʼapjjätam” sasa. Ukatjja saskakïnwa: “Jaqenakajj jilapuraw jiwañar apjjaruyasipjjani, awkis ukhamarakiw wawaparojj jiwañar apjjaruyani, wawanakas awkip taykap contraw saytʼapjjani, jupanakarojj jiwañaruw apjjaruyapjjarakini. Sutij laykojja taqe jaqenakaw uñisipjjätam, ukampis khititejj tukuykam aguantkani ukaw salvatäni” sasa (Mateo 10:19-22).

Niyakejjay Diosan arunakap yatiyañajj wali wakiskirïchïnjja, libre yatiyaskakiñatakejj arkirinakapajj wali amuyumpiw yatiyapjjañapäna, ukatwa Jesusajj akham ewjjtʼäna: “Jan waltʼayañatak mä markan arknaqapjjätam ukhajja, yaqha markar sarjjapjjam. Qhanakwa sapjjsma, janïraw Israelan markanakapsa muytapkätati, ukhaw jaqen Yoqapajj purinini” sasa (Mateo 10:23).

Jesusajj 12 apostolonakaparojj sumwa yatichäna, ewjjtʼäna, chʼamañchtʼarakïna. Ukampis Jesusan arunakapajj janiw jupanakatak mayakïkänti. Jan ukasti Jesusajj jiwayatäsin jaktañapäna uka qhepat yatiyapjjañapäkäna taqe jupanakatakïnwa. Jesusajj akham sänwa: “Taqe jaqenakaw uñisipjjätam” sasa. Ukhamajj janiw apostolonakarojj Galileankir jaqenakakejj uñisipjjañapäkänti. Ukhamarus apostolonakajj mä qhawqha tiempokiw Galilean yatiyapjjäna. Uka tiemponjja, apostolonakajj janiw gobernadoranakana reyinakana nayraqatapar apatäpkänti, janirakiw familiaranakapas jupanakarojj jiwañar katuyapkänti.

Ukhamasti Jesusajj jutïr urunakatwa parlaskäna. Jupajj akham sasaw apostolonakapar säna: ‘Janïraw taqpach markanaksa muytapkätati, ukhaw jaqen Yoqapajj purinini’ sasa. Ukham sasinjja, Rey Jesucristojj Diosan Juezapjam jutkani  ukhakamajja janiw aka oraqpachana Reinot yatiyañ tukuyapkätati sañwa munaskäna.

Diosan arunakap yatiyasajja, apostolonakajj uñisitaw uñjasipjjañapäna, uk yatipjjänwa. Jesusajj sänwa: “Mä yateqerejj janiw yatichiripat sipans jukʼampïkiti, janirakiw mä esclavos patronapat sipans jukʼampïkiti” sasa. Jesusarojj Diosan Reinopat yatiyatapatwa uñisipjjäna, apostolonakaparojj ukhamarakiw uñisipjjañapäna. Ukatwa Jesusajj säna: “Cuerpor jiwayirinakarojj jan ajjsarapjjamti, jupanakajj janiw almarojj jiwayapkaspati, jan ukasti khititï cuerpompir almampir Gehenan jiwaykaspa ukar ajjsarapjjam” sasa (Mateo 10:24, 28).

Jesusajj wali yateqaskayawa, jupajj jiwañarojj janiw ajjsarkänti, jiwañkamaw aguantarakïna, janiw wali chʼamani Jehová Diosatsa jitheqtkänti. Taqe Chʼamani Diosakiwa mä jaqerojj ‘almapsa’ apaqaspa (mä arun wiñay jakañ apaqaspa), jan ukajj wiñay jakasiñapatak jiwatatsa jaktayaspa. Uk yatiñajj apostolonakar wal chuymachtʼpachäna.

Jehová Diosajj qhawqsa servirinakaparojj munasi uka toqet Jesusajj akham sänwa: “¿Janit pä gorrión jamachʼinakajj jukʼa valorani mä sencill qollqer aljaskejja? Ukampis uka jamachʼinakatjja, janiw mayas alajjpachankir Awkiman jan uñjkatajj oraqer purkaniti. [...] Ukhamasti jan ajjsarapjjamti, jumanakajj walja gorrión jamachʼinakat sipansa jukʼampi valoranïpjjtawa” sasa (Mateo 10:29, 31).

Jesusan discipulonakapajj yatiyapjjañapäkäna ukajja, familianakwa jaljtayañapäna, yaqhepajj iyawsapjjañapänwa, yaqhepasti janiraki, ukatwa Jesusajj akham säna: “Jumanakajj jan amuyapjjamti sumankañsa aka oraqer apankirista ukhamjja” sasa. Ukhamajja familian maynitï Biblian cheqa yatichäwinakap yateqchi ukhajja, janiw ajjsarañapäkiti. Jesusajj sänwa: “Khititejj awkiparu jan ukajj taykaparu nayat sipansa jukʼampi munaski ukajja, janiw nayatakjamäkiti; khititejj yoqaparu jan ukajj phuchaparu nayat sipansa jukʼampi munaski ukajja, janirakiw nayatakjamäkiti” sasa (Mateo 10:34, 37).

Ukampis yaqhepanakajja, Jesusan discipulonakaparojj sumwa istʼapjjañapäna. Jesusajj sänwa: “Khititejj aka jiskʼanakat mayniru nayan discipulojätap layku thaya umaksa mä vasor wajjtʼki ukajja, janiw bendicionap aptʼaskaniti” sasa (Mateo 10:42).

Apostolonakajj wakichtʼatäpjjañapatakejja Jesusajj sumwa yatichäna, ewjjtʼäna, chʼamañchtʼarakïna. Ukhamatwa jupanakajj “uka cheqankir jiskʼa markanakar sarapjjäna, taqe cheqanakanwa suma yatiyäwinak yatiyapjjäna, usutanaksa qollapjjarakïnwa” (Lucas 9:6).