Yésu a nti baôma bé biniigana bilam inyu téé likalô mu kiki ba nke iba iba. Ndi a ntelbene bé ha, ni loñgeñem, a mbéhe bo le b’a bana baoo, a nkal bo le: “Nuna-ki! Me yé ep bé, n’a ba kiki mintômba ipôla ngwo njéé . . . Jon yoña yihe ni bôt ba binam, inyule b’a kena bé i bikééhene, ba bép ki bé disôô i mandap map ma bibégés. B’a kena ki bé i bisu bi bangomin ni bikiñe inyule ni yé banigil bem.”​—Matéô 10:16-18.

Banigil ba Yésu ba yé le ba boma ngolba keñi, ndi Yésu a nlédés bo ngéda a nkal bo le: “Ngéda ba nkena bé i bisu bi ngomin, ni tôñ bañ inyu jam n’a pot ni lelaa n’a pot jo, inyule jam n’a pot l’a tina bé i ngeñ i; inyule bé ndik bé bon n’a pot, ndi n’a pot ni ngui i mbuu u Ison nan.” Yésu a nke ni bisu i kal le: “Mut a’ boñ le manyañ a wo, isañ a boñ man wé nlélém jam, yak bon b’a kolba bagwal bap, ba boñ ki le ba wo. Bôt bobasôna b’a oo ki bé inyule ni yé banigil bem, ndi nu a nhônba ipam lisuk a’ tohlana.”​—Matéô 10:19-22.

Kiki likalô li nlôôha ba jam li mahee, Yésu a nyigye nseñ i yoñ yihe inyu boñ le ba gwel nson wap ibabé le yom i tééñga bo. A nkal le: “I ngéda ba ntééñga bé i tison ini, ni ôt ngwéé i tison ipe; inyule me nkal bé maliga le: N’a mal yaga bé nson nan u likalô mu bitison bi Israel gwobisôna, Man mut nye ngi lo.”​—Matéô 10:23.

Kinje biniigana, mabéhna ni makénd Yésu a nti baôma bé 12! Hala a nkobla le bibuk bini bi mbéñge yak bet ba ga yoñ ngaba i nson u likalô i mbus nyemb ni bitugne bi Yésu. Hala a nene mu bibañga a bi kal banigil bé le: “Bôt bobasôna b’a oo ki bé,” ha ndigi bé i bet baôma ba ntééne likalô. Ñañ u nkal bé le ba bi kena baôma bisu bi bangomin i ngéda ba bé i hônd likalô i Galiléa, tole mahaa map ma bi liibana bo inyu boñ le ba nol bo.

I pot maliga, Yésu a nhoñol dilo di nlo i ngéda a nkal baôma bé mam mana. I ngéda a nkal banigil bé le ba ga mal bé hônd likalô yap “Man mut nye ngi lo,” Yésu a yé unda le banigil bé ba ga mal bé téé likalô, ilole Kiñe Yésu Kristô a nlo kiki nkéés Djob a mpohol.

I ngéda ba mba ba ntéé likalô, baôma ba nlama bé hel ibale ba mboma ngolba, inyule  Yésu a nkal le: “Nnigil a nloo bé malét wé, to nkol u nloo bé nwet wé.” Mahoñol ma Yésu ma nôga. Yésu a nkôs ndééñga ni ngolba inyule a ñañal Ane Djob, yak bo ba ga boma yo. Yésu a nkal le: “I bôt ba nla nol nyuu ndi ba nla bé boñ le ni nimis niñ, ni kon bañ bo woñi; ndi nu a nla mélés niñ ni nol nyuu ikété Géhéna, nyen kona woñi.”​—Matéô 10:24, 28.

Yésu a nti ndémbél. A bi ba bebee i wo iloole a nimis maada mé ni nu a gwé ngui yosôna le Yéhôva. Djob nyen a nla boñ le mut a nimis niñ yé ngélé yada inyu ngélé yosôna, nye ki nyen a nla tugul mut inyu niñ i boga ni boga. Kinje botñem i nlédés baôma bé!

Yésu a ñunda gwéha Djob a gwé inyu banigil bé, a nkal le: “Bôt ba nuñul diuuna diba inyu ndék moni, hala bé? Ndi to hiada hi nkwo bé isi ibabé le Isoñ nan a yi hala. . . . Jon ni kon bañ woñi; ni gwé mahee iloo ngandak diuuna.”​—Matéô 10:29, 31.

I nwin banigil ba ñañal u ga lona mbagla ikété mahaa, ipôla ba ba ga neebe maliga ni ba ba ga neebe bé. Yésu a ntoñol le: “Ni hoñol bañ le me bi lo hana isi i lona nsañ.” Ñ, i mbat ñem ngui inyu boñ le ikété ndap lihaa, mut a ba nyetama i neebe maliga ma Bibel. Jon Yésu a nkal le: “Nu ni nu a ngwés isañ tole nyañ iloo me a kôli bé ba nnigil wem; yak nu ni nu a ngwés man wé munlôm tole man wé muda iloo me a kôli bé ba nnigil wem.”​—Matéô 10:34, 37.

Ndi bape ba ga leege banigil bé loñge. Yésu a nkal le: “Yak nu ni nu a nti wada mu gwañga bi bôt bini to libôndô li malép ma nsune inyule a yé nnigil, me nkal bé maliga le: Kekikel, a’ nimis bé bibom gwé.”​—Matéô 10:42.

Nkôôbaga ni biniigana, ni mabéhna ni makénd Yésu a nti bo, baôma “ba nke ni nkoñ wonsôna i mambai ni mambai, ba añlak ñañ nlam, ba mélhak ki makon homa nyensôna.”​—Lukas 9:6.