Tinawan ni Jesus an mga apostol nin marahayon na mga instruksiyon kun paano gigibuhon an paghuhulit mantang naglilibot sinda nin padis-padis. Pero bako sana iyan an ginibo niya. May kabuutan niyang pinatanidan sinda manungod sa mga paratumang: “Uya! Isinusugo ko kamo siring sa mga karnero sa tahaw nin mga lobo . . . Mag-ingat kamo sa mga tawo, huli ta dadarahon ninda kamo sa lokal na mga husgado asin lalatiguhon ninda kamo sa saindang mga sinagoga. Asin dadarahon kamo sa atubangan nin mga gobernador asin mga hadi nin huli sa sako.”—Mateo 10:16-18.

Iyo, puwedeng mapaatubang sa grabeng persekusyon an mga parasunod ni Jesus, alagad nakakapakusog sa buot an panuga niya: “Kun darahon ninda kamo, dai kamo maghadit kun paano kamo mataram o kun ano an saindong itataram, huli ta an itataram nindo itatao sa saindo sa oras na iyan; dahil bako sana kamo an nagtataram, kundi an espiritu kan saindong Ama an nagtataram paagi sa saindo.” Sabi pa ni Jesus: “Itatao nin sarong tawo an saiyang tugang tanganing gadanon, asin itatao nin ama an saiyang aki tanganing gadanon, asin an mga aki matumang sa mga magurang saka itatao an mga ini tanganing gadanon. Asin ikakaungis kamo nin gabos na tawo huli sa ngaran ko, alagad an makatagal sagkod sa katapusan maliligtas.”—Mateo 10:19-22.

Huling mahalagang marhay an paghuhulit, idinuon ni Jesus na kaipuhan kan mga parasunod niya na magin mapagmansay para magdanay sindang dai nauulang sa gibuhon na ini. Sinabi niya: “Pag pinersegir ninda kamo sa sarong siyudad, magdulag kamo sa ibang siyudad; huli ta sinisigurado ko sa saindo, bago pa nindo matapos na libuton an mga siyudad sa Israel, maabot na an Aki nin tawo.”—Mateo 10:23.

Marahayon nanggad na mga instruksiyon, patanid, asin pampakusog sa buot an itinao ni Jesus sa 12 apostol! Pero masasabutan mo na an mga sinabing ini ni Jesus para man sa mga makikikabtang sa gibuhon na paghuhulit pagkatapos na siya magadan asin buhayon liwat. Ipinapahiling ini kan sinabi niya sa mga disipulo na sinda ‘ikakaungis nin gabos na tawo,’ bako sanang kan mga tawo kun sain isinugo an mga apostol para maghulit. Saro pa, mayo kitang mababasa na an mga apostol dinara sa mga gobernador asin sa mga hadi durante kan halipot na panahon na ini nin paghuhulit sa Galilea, o na sinda itinao kan mga kapamilya ninda para gadanon.

Malinaw nanggad na an maabot na panahon an nasa isip ni Jesus kan sabihon niya ini sa mga apostol. Pag-isipan an sinabi niya na bago pa matapos kan mga disipulo an gibuhon nindang paghuhulit, “maabot na an Aki nin tawo.” Ipinaparisa ni Jesus na bago pa matapos kan mga disipulo an paghuhulit kan Kahadian nin Diyos, maabot na an pinamuraway na Hading si Jesu-Cristo bilang an hukom na itinalaga nin Diyos.

Miyentras na naghuhulit, an mga apostol dai dapat magngalas kun mapaatubang sa mga pagtumang,  huling sinabi ni Jesus: “An disipulo dai nakakalabi sa saiyang paratukdo, ni an uripon man nakakalabi sa saiyang kagurangnan.” Malinaw an punto ni Jesus. Napaatubang siya sa bakong magayon na pagtrato asin persekusyon huli sa paghuhulit kan Kahadian nin Diyos, kaya iyo man sinda. Pero nagsadol si Jesus: “Dai kamo matakot sa mga minagadan kan hawak alagad dai nakakagadan kan kalag; imbes, matakot kamo sa saiya na makakalaglag kan kalag pati kan hawak sa Gehenna.”—Mateo 10:24, 28.

Nagpahiling si Jesus nin halimbawa sa bagay na ini. Daing takot niyang tinios an kagadanan imbes na ikompromiso an saiyang kaimbudan sa saro na may lubos na kapangyarihan, si Jehova. An Diyos na Makapangyarihan sa Gabos an may kakayahan na lumaglag sa “kalag” (an oportunidad nin sarong tawo na mabuhay sa maabot na panahon) o bumuhay liwat sa saro para makamtan an buhay na daing katapusan. Napakusog nanggad kaini an buot kan mga apostol!

Nagtao si Jesus nin ilustrasyon para ipahiling an mamumuton na pag-ataman nin Diyos sa mga parasunod niya: “Bakong an duwang dignos nababakal nin sarong sinsilyo na sadit an kantidad? Pero mayo ni saro sa sainda an mahuhulog sa daga na dai naaaraman kan saindong Ama. . . . Kaya dai kamo matakot; mas mahalaga kamo kisa sa dakul na dignos.”—Mateo 10:29, 31.

An mensaheng ihuhulit kan mga disipulo madara nin pagkabaranga sa mga pamilya; may mga miyembro kan pamilya na maako kaiyan pero an iba dai. “Dai kamo mag-isip na nagdatong ako tanganing magdara nin katuninungan sa daga,” an paliwanag ni Jesus. Iyo, kaipuhan an kusog nin buot para akuon kan sarong miyembro nin pamilya an katotoohan na nasa Bibliya. “An siisay man na may urog na pagkamuot sa saiyang ama o ina kisa sako bakong maninigo sa sako,” an sabi ni Jesus, “asin an siisay man na may urog na pagkamuot sa saiyang aking lalaki o babayi kisa sako bakong maninigo sa sako.”—Mateo 10:34, 37.

Alagad, may mga maugmang maako sa mga disipulo. Nagsabi siya: “An siisay man na minatao nin dawa sarong baso nin malipot na tubig sa saro sa mga ordinaryo sanang tawong ini dahil disipulo ini, sinisigurado ko sa saindo, dai niya nanggad maiwawara an saiyang balos.”—Mateo 10:42.

Pakatapos na maiandam ni Jesus an mga apostol paagi sa mga instruksiyon, patanid, asin pampakusog sa buot, nagpasiring sinda “sa mga baryo sa bilog na teritoryo, na nagpapahayag kan maugmang bareta saka nagpapaumay sain man na lugar.”—Lucas 9:6.