Yésus a ve minlômane mié mbamba melep avale be ne kôme ke bo ésaé nkañete be too nsamba bebaé bebaé. Ve, a nji su’u valé. A mbamba nlem, a ve be abendé di a lat a besiñ, a jô’ô na: “Mi lô na ma lôme mia ane mintômba ézezañe beze (mekamenyañ); bo’one ñhe fek ane benyo a évôvoé ane bezum. Taba’ane bôte ntyee: ba ye kee mia e meba mejô a bôme mia e meba me Zambe map. Ba ye somane mia e be bengovina a bejô bôt amu ma.”​—Matthieu 10:16-18, Mfefé Nkôñelan.

Yaa, bôte ba tôñe Yésus ba ye tôbane ngul étibela’a, ve da, a bo be ngaka’a a jô’ô na: “Éyoñ ba ye koñe mia, te tyelane minleme yôp ya yem ane mia ye kobô nge ane mia ye jô: Jam mia ye jô da ye vebane be mia awolo te; Amu sake mia mia ye kobô, ve nsisim Esoo wônan ñwô wo ye kobô be mia.” Yésus a ke ôsu a jô na: “Monyañ a ye kee monyañ awu, a ésaa e mone wé, bon ba ye wosane bebiaé a ve be mekua ya awu. Bôte bese ba ye vini mia amu jôé dam, ve nyô a ye yeme ngu a kui asu’ulan nye a ye nyiiban.”​—Matthieu 10:19-22, Mfefé Nkôñelan.

Mbôle nkañete ñwo wo dañe mfi, Yésus a liti beyé’é bé mfi ya tabe ntyel asu na be bo fili ya bo ésaé éte teke éndeñela’a. A jô na: “Éyoñe ba ye tôñesane mia e tison éziñ tuban a ke e tison fok; ma jô mia bebela na mia ye bo te mane tôbane bitison ya Israël te na Mona môt a so.”​—Matthieu 10:23, Mfefé Nkôñelan.

Za avale abeñe melep, mebendé, a ngule nyôle Yésus a ve minlômane mié 12 di! Ô ne fe yemelane na mejô mete ma nambe fe bôte ba ye bo ésaé nkañete mvus awu a nwômane Yésus. Jam ete da yené éyoñ a jô na “bôte bese ba ye vini” beyé’é bé, sa ke fo’o ve bôte minlôman mia yiane ke kañete. Nde fe, bi nji ke lañe na be nga kee minlôman e be bengovina a bejô bôt e mon ôbane nkañete ya Galilée ate nge na, bibu’a ya menda me bôte map bi nga koñe be asu na be wôé be.

Da yené ne ngeññ na, Yésus a yeme mam ma ye boban melu ma zu éyoñ a kate minlôman mié mame mete. Tame fase jam a te jô na beyé’é bé ba ye ke mane kañete bitison bise “te na Mona môt a so.” Yésus a liti beyé’é bé na ba ye ke mane kañete foé ya Éjôé Zambe te na étôto’o Njô Yésus Krist a so aval ane ntyi’i mejô Zambe.

Nté ba bo ésaé nkañete, minlômane mi nji yiane si’ane nge ba tôbane mewosan, amu  Yésus a jô na: “Ñyé’é te dañe ñye’ele wé, nge mbo ésaé e dañe masa wé.” Ôsimesane Yésus wo tu’a wô’é. A tôbane mewosan a étibela’a amu a kañete Éjôé Zambe, be’e fe ba ye tôban avale da. Nde Yésus a jô be na: “Te koane bôt be awôé nyôle woñ, ve be se ngule ya wôé nsisim, ve koane môte woñ a ne ngule ya wôé nyôl a nsisim bibaane Hel été.”​—Matthieu 10:24, 28.

Yésus émien a liti éve’ela vôm ate. A nga nyoñe ntyi’ane ya jibi mintaé ya awu, a lôte na a lume nyi a ne ngul ése mvus, nnye ate a ne Yéhôva. Amu fo’o ve Zambe ya ngul ése nnye étam a ne ngule ya wôé “nsisim” môt (nalé a tinane na ndi nleme jé asu ényiñe ya melu ma zu), nge wômôlô nye na a bu’uban ényiñe ya melu mese. Za aval ndi nleme di, jam ete é ne ve minlômane mi!

Yésus a liti abim avé Zambe a nye’e bôte ba tôñe nye a bifia bi: “Ye be nji kuane bemvokuma bebaé frank jia? Ve da teke wua ya be be a ne ku si, Ésoo wônan teke yem. . . . Ajô te ñhe te koone woñ: mia mi ne beta tañ a dañe ézu’u bemvokuma.”​—Matthieu 10:29, 31, Mfefé Nkôñelan.

Foé beyé’é ba kañete ja kandé menda me bôt, bibu’a ya menda me bôt méziñe bia ye kañese je, bivo’o ki momo. Yésus a timine na: “Te bunane na me nga zu soo mvo’é e si nyô.” Ôwé, da sili bibu’a ya menda me bôt ayo’o nlem asu na bi yé’é benya mejôô. Yésus a jô na: “Ñyô a nye’e ésaa nge nyia a dañe ma a nji yiane ma; nyô a nye’e monafame wé nge monaminga wé a dañe ma a nji yiane ma.”​—Matthieu 10:34, 37, Mfefé Nkôñelan.

Nde fe, bôte béziñe ba ye nyoñe beyé’é bé mvo’é. Yésus a jô na: “Nyô a ye ve wua ya ôyôme bôte di a too ñyé’é, ja’ane ve élaé mendime na a nyu, ma kate mia bebela na a ye bo te dimili ma’ane mé.”​—Matthieu 10:42, Mfefé Nkôñelan.

Amu mbamba nkômesan a melebe me Yésus, mebendé a mveane ngule nyul, minlômane mi Yésus mia “kôlô a, ke minlam minlam, a kate bôt mbamba foé, a saé bôt vôm ase be nga ke.”​—Luc 9:6.