Yezu ye cikan nafamanbaw di a ka kalandenw ma waajuli kɛcogo koo la. O kɔ, a y’u ci fila fila. Nka, a ma dan o dɔrɔn ma. A y’u lasɔmi ko mɔgɔw bena u kɛlɛ. A y’a fɔ ko: “Ayiwa, ne b’aw ci i n’a fɔ sagaw, waraw cɛma. . . . Aw k’aw yɛrɛ kɔlɔsi bari mɔgɔw bena aw don kititigɛlaw bolo. U bena aw bugɔ ni golokami ye u ka kalansow kɔnɔ. U bena aw minɛ ka taga n’aw ye faamaw ni masaw fɛ bari aw ye ne ka kalandenw ye.”—Matiyo 10:16-18.

Tiɲɛn na, kɔrɔbɔliba bena Yezu ka kalandenw sɔrɔ. Nka a y’u hakili sigi ko: “N’u tagara n’aw ye kititigɛlaw fɛ, aw kana jɔɔrɔ aw ka kuma fɔta, n’a fɔcogo fana na. Ni kuma sera aw ma tuma min na, aw ka kan ka kuma min fɔ, Ala bena o don aw daa la, bari aw bena kuma min fɔ, o tena kɛ aw yɛrɛ ka kuma ye, nga Faa Ala ka Nii Senuman [hakili senu] le bena o don aw daa la. Mɔgɔ dɔw bena kɛ sababu ye u balimaw be faga. Dɔw bena u deenw faga. Deen dɔw bena wili u wolobagaw kama k’u faga. Mɔgɔ bɛɛ bena aw kɔniya ne tɔgɔ kosɔn. Nga ni mɔgɔ min muɲuna fɔɔ ka taga se a laban ma, o tigi bena kisi.”—Matiyo 10:19-22.

Waajuli baara kɔrɔtanin lo kosɔbɛ. O kama, Yezu y’a fɔ ka gwɛ a ka kalandenw ye ko u ka ɲi k’u yɛrɛ kɔrɔsi walisa ka se k’o baara kɛ ɲɛsuma na. A y’a fɔ ko: “Ni mɔgɔw be aw tɔɔrɔ dugu dɔ la, aw ye boli ka taga dugu wɛrɛ la. Tiɲɛ na, ne b’a fɔ aw ye ko aw tena Isirayɛli duguw bɛɛ kɛ ɲɔgɔn kan ka ban ni Mɔgɔ Dencɛ ma segi ka na.”—Matiyo 10:23.

Tiɲɛn na, Yezu ye cikanw, lasɔmini kumaw ani jijali kuma minw fɔ a ka ciden 12 ye, o ye kuma barikamanw lo ye! Minw bena waajuli kɛ Yezu sanin n’a suu kununin kɔ, o kumaw ɲɛsinna olu fana ma. Mun lo b’o yira? Yezu y’a fɔ ko ‘mɔgɔ bɛɛ bena u kɔniya.’ Kalandenw cira ka taga mɔgɔ minw waaju Galile, Yezu m’a fɔ ko olu dɔrɔn lo bena u kɔniya. Ka fara o kan, a ma fɔ Bibulu kɔnɔ k’o waajuli kanpaɲi na, u ye Yezu ka kalandenw minɛ ka taga n’u ye faamanw ni masacɛw fɛ. A ma fɔ fana k’o wagati la, u somɔgɔw y’u don bolo u juguw bolo walisa u ka faga.

A gwɛnin lo ko Yezu tun be kumana koo nataw lo la. I hakili to a la ko Yezu y’a fɔ ko a ka kalandenw tɛna waajuli kɛ ka “Isirayɛli duguw bɛɛ kɛ ɲɔgɔn kan ka ban ni Mɔgɔ Dencɛ ma segi ka na.” O kɔrɔ ko u tɛna waajuli kɛ ka ban Ala ka Masaya koo la ni Masacɛ Yezu ma na a ka nɔɔrɔ la ka kiti tigɛ mɔgɔw kan.

Waajuli kɛtɔ, a man ɲi ka bari Yezu ka kalandenw na ni kɔrɔbɔli y’u sɔrɔ sabu Yezu y’a  fɔ ko: “Kalanden si man fisa n’a ka karamɔgɔ ye.” Yezu ka kumaw gwɛnnin lo. Mɔgɔw ye Yezu tɔɔrɔ ani ka kɔrɔbɔli la a kan sabu a ye waajuli kɛ Ala ka Masaya koo la. O ɲɔgɔn lo bena a ka kalandenw sɔrɔ fana. O kama, Yezu y’u jija ko: “Mɔgɔ minw be se k’aw faga n’u te se ka foyi kɛ aw nii na, aw kana siran olu ɲa. Min be se ka farikolo ani nii halaki jahanama [zeyɛni] na, aw ka siran ale lo ɲa.”—Matiyo 10:24, 28.

Yezu ye ɲɛyirali ɲuman di o koo la. A sɔnna ka sa sanni ka muruti Jehova ma, ale min ye Sebagayabɛɛtigi ye. Sebagayabɛɛtigi Ala lo be se ka mɔgɔ ‘niin’ halaki, o kɔrɔ, k’a to a tɛ ɲɛnamaya sɔrɔ sinima. Ale fana lo be se k’a tigi kunu walisa a ka ɲɛnamaya kɛ fɔɔ abada. N’a sɔrɔ o kumaw ye Yezu ka cidenw hakili sigi yɛrɛ le!

Yezu ye ɲɛyirali dɔ ta walisa k’a yira ko Ala b’a janto a ka kalandenw na ni kanuya ye. A y’a fɔ ko: “Mɔgɔ te kɔnɔnin fila feere pɔpɔrɔ [warimisɛn] kelen na wa? K’a sɔrɔ u si te ben duguma n’aw Faa ma sɔn. . . . O la, aw kana siran. Aw ka fisa ni kɔnɔninw ye.”—Matiyo 10:29, 31.

Yezu ka kalandenw be kibaro diiman min fɔra, a bena somɔgɔw faran sabu dɔw bena sɔn a ma, nka dɔw tɛna sɔn a ma. Yezu y’a ka kumaw ɲɛfɔ ko: “Aw kana miiri ko ne nana hɛrɛ kɛ dugukolo kan dɛ.” Tiɲɛn na, ni somɔgɔ dɔ b’a fɛ ka tiɲɛn sira tagama, fɔɔ a ka kɛ ni jagwɛlɛya ye. Yezu y’a fɔ ko: “Mɔgɔ min bɛ a fa wala a ba kanu ka tɛmɛn ne kan, o man kan ni ne ye. Mɔgɔ min bɛ a denkɛ wala a denmuso kanu ka tɛmɛn ne kan, o man kan ni ne ye.”—Matiyo 10:34, 37, ABM.

O n’a t’a bɛɛ, mɔgɔ dɔw bena sɔn ka Yezu ka kalandenw minɛ ka ɲɛ. Yezu y’a fɔ ko: “Ne b’a fɔ aw ye ko ne ka kalanden minw lɔyɔrɔ ka dɔgɔ mɔgɔw ɲana, ni min ye jii suma di olu dɔ ma, bari ne ka kalanden lo, hali ni filen ɲaa kelen lo, o tigi ben’a tɔnɔ sɔrɔ.”—Matiyo 10:42.

Yezu ka cikanw, lasɔmini kumaw ani jijali kumaw sababu fɛ, cidenw labɛnnin lo ka taga “duguw la ka Ala ka kibaru diman fɔ ani ka banabagatɔw kɛnɛya o yɔrɔw bɛɛ la.”—Luka 9:6.