E matata vakasigalevu na ivakasala i Jisu vei ratou nona yapositolo ena iwalewale ni nodratou cakacaka vakavunau. E vakasalataki ratou tale ga vakayalololoma me baleti ira na dauveitusaqati: “Raica, au sa talai kemudou yani me vaka na sipi ena kedra maliwa na olifa . . . Dou qarauni ira na lewenivanua, nira na veilewaitaki kemudou, era na kuitataki kemudou tale ga ena nodra valenilotu. Dou na qai kau ina matadra na kovana kei na tui ena vukuqu.”​—Maciu 10:16-18.

Eratou rawa ni tusaqati vakaca na imuri i Jisu, ia e vakayaloqaqataki ratou ena nona yalataka: “Ni dou sa kau, dou kua ni leqataka na ka mo dou tukuna se na kena itukutukuni, ni na qai vakatakilai vei kemudou ena kena gauna, ni dou na sega ni vosa tiko ga o kemudou, ena vosa ena vukumudou na yalo i Tamamudou.” E kaya tale o Jisu: “Ena vakavuna o gone na mate nei tuakana, o tuakana ena vakavuna na mate nei tacina, o tama ena vakavuna na mate nei luvena, o ira na gone era na saqata na nodra itubutubu, era na vakavuna tale ga nodra mate. Era na cati kemudou na tamata kece ena vuku ni yacaqu, ia o koya e vosota me yacova na icavacava ena vakabulai.”​—Maciu 10:19-22.

E bibi duadua na cakacaka vakavunau, e veiuqeti kina o Jisu me ratou qaseqase nona imuri me rawa ni ratou vunau tiko ga. E kaya: “Ke ra vakacacani kemudou ena dua na koro, dou dro ina dua tale na koro, au tukuna vakadodonu vei kemudou, ni dou se bera ni sikova na koro kece e Isireli, sa na yaco mai na Luve ni tamata.”​—Maciu 10:23.

E totoka dina nona veivakavulici, veivakasalataki, kei na nona veivakayaloqaqataki o Jisu vei ratou na 12 nona yapositolo. Ia era okati tale ga e keri o ira era na vunau ni sa mate qai vakaturi o Jisu. E kilai qori ena nona kaya ni ‘tamata kece era na cati’ ira nona tisaipeli, sega ni vanua ga eratou lai vunau kina na yapositolo. Eda sega tale ga ni bau rogoca ni ratou kau na yapositolo vei ira na kovana kei na tui ena nodratou ilakolako vakavunau qo e Kalili, se ra vakavuna na weka nodratou mate.

A vakaibalebaletaka tiko gona ina veigauna e muri o Jisu na veika e tukuna vei ratou na yapositolo. Vakasamataka mada na nona tukuna o Jisu ni ratou se bera ni sikova na koro kece nona tisaipeli, “sa na yaco mai na Luve ni tamata.” Qori e vakaraitaka ni se bera ni oti nodra vunautaka na Matanitu ni Kalou na nona tisaipeli, sa na lako mai na Tui o Jisu Karisito me Turaganilewa ni Kalou.

Ke ratou tusaqati na yapositolo ena cakacaka  vakavunau, me ratou kua ni kurabui ni kaya o Jisu: “Na tisaipeli e sega ni uasivia na nona qasenivuli, se na dauveiqaravi na nona turaga.” Eratou na beci qai tusaqati na yapositolo me vaka ga e caka vei Jisu ni vunautaka voli na Matanitu ni Kalou. Ia e veiuqeti o Jisu: “Dou kua ni rerevaki ira era vakamatea na yago ia era sega ni vakarusa rawa na bula, dou rerevaki koya ga e rawa ni vakarusa na bula kei na yago e Qiena.”​—Maciu 10:24, 28.

E cakava sara ga qori o Jisu. A yaloqaqa qai bole mate, me kua ga ni tawayalodina vua e kaukaua duadua, o Jiova. O Jiova ga e rawa ni vakarusa na “bula” (kena ibalebale nona inuinui ni bula e dua ena gauna se bera mai), se vakabula e dua sa mate me bula tawamudu. Qori ena vakayaloqaqataki ratou sara ga na yapositolo!

E vakatauvatana va qo o Jisu nona karoni ira na nona imuri na Kalou: “E sega ni volitaki e rua na siparo ena dua na ilavo lailai? Ena sega ni lutu ina qele e dua vei rau me sega ni kila na Tamamudou. . . . Dou kua gona ni rere, dou talei sara vei ira na siparo.”​—Maciu 10:29, 31.

Ena tawasei ira na vuvale na itukutuku era vunautaka na tisaipeli i Jisu, era na ciqoma eso na lewenivuvale eso tale era na cata. E kaya o Jisu: “Dou kua ni nanuma niu kauta mai na veisaututaki e vuravura.” Ena gadrevi na yaloqaqa me ciqoma kina na ka dina ena iVolatabu e dua na lewenivuvale. E tomana o Jisu: “E sega ni yaga vei au o koya e lomani rau cake na tamana kei na tinana qai vakalailai vei au, e sega tale ga ni yaga vei au o koya e lomani rau cake na luvena tagane se yalewa qai vakalailai vei au.”​—Maciu 10:34, 37.

Eso era na rogoci ratou na tisaipeli i Jisu. E kaya: “O koya e solia e dua mada ga na bilo wai batabata vua e dua vei ira na lalai qo me gunuva baleta ni tisaipeli, au tukuna vakadodonu vei kemudou, ena sega sara ni kau tani vua na nona icovi.”​—Maciu 10:42.

Eratou vakarautaki vinaka sara ga na yapositolo ena veivakavulici, veivakasalataki, kei na veivakayaloqaqataki i Jisu, eratou mani lakova “na koro kece ena yalava ya, eratou vunautaka na itukutuku vinaka, eratou veivakabulai tale ga e veiyasana kece.”​—Luke 9:6.