Jesús omboʼe porã ijapostolkuérape opredika hag̃ua, ha omondo chupekuéra de a dos. Péro oavisa avei chupekuéra ojepersegitaha: “Cháke, pomondo hína ovecha ohoramoguáicha lóvo apytépe. [...] Peñatendéke, cháke oĩta kuimbaʼe pendeguerahátava trivunálpe, ha penembyepotíva sinagogahárupi. Ha che káusare pejegueraháta umi governadór ha rréi renondépe” (Mateo 10:16-18).

Ojepersegítaramo jepe isegidorkuérape, Jesús omombarete chupekuéra, heʼívo: “Pejegueraha vove upépe, ani pejepyʼapy ndapeikuaáirõ g̃uarã mbaʼépa pejéta térã mbaʼéichapa peñeʼẽta. Upévo ojekuaaukáta voi peẽme mbaʼépa peje vaʼerã. Ndahaʼéi ningo peẽnte la peñeʼẽtava, síno pende Ru yvagapegua espíritu penepytyvõta peñeʼẽ hag̃ua”. Upéi Jesús heʼi avei: “Upérõ avei oĩta omeʼẽva iñermánope ojejuka hag̃ua, túva omeʼẽta itaʼýrape, ha taʼyrakuéra opuʼãta ituvakuérare ha ohejáta ojejuka chupekuéra. Ha avave ndaijaʼemoʼãi penderehe che réra káusare. Péro pe oaguantáva ipahaite peve, ojesalváta” (Mateo 10:19-22).

Pe predikasión ningo iñimportanteterei, upéicha rupi Jesús ohechauka idisipulokuéra tekotevẽha oñatende porã, ikatu hag̃uáicha osegi opredika lívremente. Haʼe heʼi: “Oĩ vove oñemoĩva penderehe peteĩ siudápe, tapeho ambuépe. Añetehápe haʼe peẽme, ndaikatumoʼãi voínte pepredikapa umi siuda oĩva Israélpe og̃uahẽ mboyve pe Yvypóra Raʼy” (Mateo 10:23).

Jesús ningo heʼi koʼã mbaʼe prinsipálmente omboʼe, omombarete ha oprepara hag̃ua umi 12 apóstolpe. Péro ndahaʼéi chupekuéra añónte, síno enterove umi opredikátavape Jesús orresusita rire. Haʼe heʼi vaʼekue ‘avave ndaijaʼemoʼãiha’ idisipulokuérare. Avei jaʼekuaa Jesús noñeʼẽi hague umi apóstolre añónte, oho vaʼekue opredika Galiléare. ¿Mbaʼérepa? Pórke ndaipóri ni peteĩ pruéva ohechaukáva algún apóstolpe ojegueraha hague upe okasiónpe umi governadór térã rréi renondépe, térã ihénte ontrega hague chupekuéra ojejuka hag̃ua.

Upéicharõ, Jesús heʼívo koʼã mbaʼe ijapostolkuérape, opensa kuri umi mbaʼe oikótavare tenonderãme. Ha upéva ojekuaa porãvéntema heʼírõ guare haʼekuéra ndaikatumoʼãiha opredikapa “umi siuda oĩva Israélpe og̃uahẽ mboyve pe Yvypóra Raʼy”. Jesús ohechaukáma idisipulokuéra ndaikatumoʼãiha opredikapa pe marandu porã oñeʼẽva Ñandejára Rréinore, haʼe og̃uahẽ mboyve oporohusga hag̃ua.

Umi apóstol noñesorprendéi vaʼerã ojepersegi ha oñembohasa asýramo chupekuéra opredika  haguére. Jesús heʼi kuri: “Peteĩ alúmno ndaikatúi tuichave imboʼeháragui, ha peteĩ tembiguái ndaikatúi tuichave ipatróngui”. Péicha Jesús ohechauka porã mbaʼépa la oikótava. Chupe voi heta ojepersegi ha oñembohasa asy, ha isegidorkuérare oikóta avei upéva. Péro haʼe heʼi: “Ani pekyhyje umi ikatúvagui pendejuka, peẽngo peikove jeýta upe rire, ha upéva haʼekuéra ndaikatumoʼãi ojoko; pekyhyje guei upe ikatúvagui penerundi Gehénape” (Mateo 10:24, 28).

Jesús voi oheja peteĩ ehémplo neporãva. Chupe g̃uarã ikuentave omano, opyrũ rangue iñeʼẽre ha ou naiñeʼẽrendúi Ñandejárape. Jehová ningo pe Dios Ipuʼakapáva ha haʼe añoite ikatu ohundi ñane “álma”, térã oipeʼa ñandehegui pe oportunida jahupytývo jeikove opaveʼỹva. Ha jajúramo ñamano, Jehová añoite avei ikatu ñanemoingove jey jaiko hag̃ua vyʼápe opa árare. Oiméne koʼã mbaʼe tuicha omombarete umi apóstolpe.

Upéi Jesús omombeʼu peteĩ ehémplo ohechauka hag̃ua mbaʼeichaitépa Jehová oñangareko Jesús segidorkuérare. Haʼe heʼi: “¿Noñevendéi piko mokõi gorrión peteĩ monéda saʼieterei ovalévare? Upéicharamo jepe, ni peteĩva ndoʼái yvýpe pende Ru yvagapegua oikuaaʼỹre. Upévare ani pekyhyje, peẽ pevaleve hína heta gorrióngui” (Mateo 10:29, 31).

Jesús avei omombeʼu oĩtaha família ojedividíva pe marandu porã káusare, pórke oĩta umi oaseptáva ha umi ndoaseptamoʼãiva. Jesús heʼi: “Ani peimoʼã aju hague amoĩ pyʼaguapy ko yvy ape ári”. Upéicha ohechauka tekotevẽha ñandepyʼaguasu oiko hag̃ua ñandehegui Ñandejára siérvo. Péro Jesús heʼi avei: “Pe ohayhuvéva itúva térã isýpe chéve rangue, nomereséi oiko che disípuloramo; ha pe ohayhuvéva itaʼýra térã itajýrape chéve rangue, nomereséi oiko che disípuloramo” (Mateo 10:34, 37).

Upéicharõ jepe, oĩta heta orresivi porãva idisipulokuérape. Ha Jesús heʼi umívare: “Oimeraẽ ombohasáva y roʼysãmi jepe peteĩ koʼã michĩvévape, che disípulo haguére, añetehápe haʼe peẽme, katuete oñemeʼẽne chupe iprémio” (Mateo 10:42).

Péicha Jesús omboʼe, omombarete ha oprepara ijapostolkuérape. Upéi umi apóstol ikatúma “okorre entéro umi puévlorupi, oikuaauka umi marandu porã ha oporomonguera oparupiete” (Lucas 9:6).