Iesu ese aposetolo taudia dekenai haroro dalana ia hadibaia murinai, rua rua ia siaidia. To unai sibona lasi. Ia hadibadia dagedage do idia davaria danu, ia gwau: “Kamonai! Mamoe bamona umui lau siaia, uda sisia edia huanai. . . . Umui naria namonamo, badina taunimanima ese kota dekenai umui do idia abia lao bona edia sinagoga lalonai umui do idia botaia. Lau dainai gavana bona king taudia vairanai umui do idia hakaua lao.”​—Mataio 10:16-18.

Oibe, Iesu ena murinai idia raka taudia be dagedage do idia davaria, to idia ia hagoadaia, ia gwau: “Umui idia hakaua lao neganai, edena bamona do umui hereva bona dahaka do umui gwauraia umui lalohekwarahilaia lasi, badina do umui gwauraia gauna be unai nega dekenai do umui diba, badina umui sibona do umui hereva lasi, to emui Tamana ena lauma helaga ena heduru amo do umui hereva.” Ma ia gwau: “Tadikaka ta ese ena tadikaka ena mase dalana do ia karaia, tamana ese natuna ena mase dalana do ia karaia, natudia ese tama sina do idia gwau-edeede henia bona edia mase dalana do idia karaia. Bona egu ladana dainai taunimanima ibounai ese umui do idia inai henia, to ia haheauka ela bona dokona tauna be mauri do ia abia.”​—Mataio 10:19-22.

Haroro gaukara be mai anina bada dainai, Iesu ese ena murinai idia raka taudia ia hamaoroa do idia aonega, unai amo idia haroro noho diba. Ia gwau: “Siti ta dekenai umui idia dagedage henia neganai, siti ma ta dekenai umui heau lao, badina umui lau hamaoroa momokani, Israela ena siti bona hanua ibounai lalonai emui haroro gaukara umui do haorea lasi neganai, taunimanima ena Natuna do ia ginidae.”​—Mataio 10:23.

Iesu ese ena aposetolo 12 dekenai, hadibaia bona hagoadaia hereva namona ia henia! To oi abia dae, Iesu ena mase bona toreisi lou murinai, haroro gaukara do idia karaia taudia dekenai unai hereva be mai anina bada danu. Badina Iesu ia gwau ena hahediba taudia be ‘taunimanima ibounai ese do idia inai henia,’ aposetolo taudia ese idia haroro henia taudia sibona lasi. Danu, Baibel ia gwau lasi aposetolo taudia be Galilea ai idia haroro neganai, gavana bona king taudia vairanai idia hakaudia lao, eiava edia ruma bese taudia ese edia mase dalana idia karaia.

Oibe, Iesu be ena aposetolo taudia dekenai unai hereva ia gwauraia neganai, ia be vaira nega ia laloa. Iena hereva mani oi laloa. Ia gwau ena hahediba taudia be edia haroro gaukara do idia karaia haorea lasi neganai, “taunimanima ena Natuna do ia ginidae.” Unai ese ia hahedinaraia,  ena hahediba taudia be Dirava ena Basileia harorolaia gaukarana idia do haorea lasi neganai, Dirava ena hahemaoro tauna, King Iesu Keriso, do ia ginidae.

Aposetolo taudia idia haroro lalonai bema dagedage idia davaria do idia hoa lasi, badina Iesu ia gwau: “Stiuden ese ena hadibaia tauna ia hereaia lasi, bona hesiai tauna ese ena biaguna ia hereaia lasi.” Iesu ena hereva ena anina ia hedinarai. Dirava ena Basileia sivaraina ia harorolaia dainai, dagedage ia davaria, bona idia dekenai unai do ia vara danu. To Iesu ese ia hagoadadia: “Tauanina idia alaia, to mauri idia hadikaia diba lasi taudia dekenai do umui gari lasi. To Gehena dekenai tauanina bona mauri ia hadikaia diba tauna do umui gari henia.”​—Mataio 10:24, 28.

Iesu be haheitalai namona. Ia ese siahu ibounai Diravana, Iehova, ia badinaia, bona ia idia ura alaia taudia ia gari henidia lasi. Oibe, Siahu Ibounai Diravana ese tau ta ena mauri (vaira nega ai do ia abia gauna) ia hadikaia diba, eiava ia hatorea isi lou diba, mauri hanaihanai ia moalelaia totona. Unai ese aposetolo taudia ia hagoadaia!

Iesu ese Iehova ena lalokau ia idia tomadiho henia taudia dekenai be inai bamona ia hahedinaraia: “Manu maragidia rua be koini maragina tamona dekenai umui hoihoilaia, ani? To bema idia ta be tano dekenai ia moru, emui Tamana be ia diba. . . . Unai dainai umui gari lasi, umui ese unai manu maragidia ibounai umui hereaia.”​—Mataio 10:29, 31.

Iesu ena hahediba taudia ese idia harorolaia sivaraina ese ruma bese do ia hapararaia, badina haida ese do idia abia dae, to haida ese do idia dadaraia. Ia gwau: “Umui laloa lasi tanobada dekenai maino lau mailaia.” Oibe, ruma bese lalonai bema ta be Baibel ena hereva momokani ia abia dae, namo lasi ia gari. Iesu ia gwau: “Ena tamana bona sinana ia ura henia bada, to lau ia ura henia maragi tauna be egu hahediba tauna ai ia lao diba lasi. Bona ena natuna mero eiava natuna kekeni ia ura henia bada, to lau ia ura henia maragi tauna be egu hahediba tauna ai ia lao diba lasi.”​—Mataio 10:34, 37.

To haida ese ena hahediba taudia do idia abia dae. Iesu ia gwau: “Bema ta ese inai maragidia ta dekenai ranu keruma sisina ia henia, badina ia be hahediba tauna, umui lau hamaoroa momokani, unai tauna be ena ahuna do ia abia momokani.”​—Mataio 10:42.

Vadaeni aposetolo taudia be Iesu ena hadibaia bona hagoadaia herevadia idia abia murinai, “hanua ta ta dekenai idia lao, sivarai namona idia harorolaia bona gabu ibounai dekenai gorere taudia idia hanamoa.”​—Luka 9:6.