50-تاراۋ
قۋعىن كەزىندەگى ۋاعىزعا دايىندادى
ماتاي 10:16—11:1 مارقا 6:12، 13 لۇقا 9:6
-
يسا ەلشىلەرىن ۇيرەتىپ، ۋاعىزداۋعا جىبەردى
جۇپ-جۇپقا بولگەن شاكىرتتەرىن ۋاعىزداۋعا جىبەرىپ جاتىپ، يسا ولارعا ٴتيىمدى نۇسقاۋلار بەردى. الايدا ول مۇنىمەن شەكتەلمەي، ولارعا قارسىلىققا كەزىگەتىندەرىن دە ەسكەرتتى. «مەن سەندەردى قاسقىرلار اراسىنا جىبەرىلگەن قويلارداي جىبەرىپ وتىرمىن... ادامداردان اباي بولىپ جۇرىڭدەر، سەبەبى ولار سەندەردى جەرگىلىكتى سوتتارعا ۇستاپ بەرەدى جانە ٴماجىلىسحانالارىندا دۇرە سوعادى. مەنىڭ شاكىرتىم بولعاندارىڭ ٷشىن سەندەردى بيلەۋشىلەر مەن پاتشالاردىڭ الدىنا سۇيرەپ اپارادى»،— دەدى (ماتاي 10:16—18).
ٴيا، يسانىڭ ٸزباسارلارى قاتتى قۋعىنعا كەزىگۋى مۇمكىن. الايدا يسا ولارعا: «سەندەردى ۇستاپ بەرگەندە، قالاي جانە نە ايتاتىندارىڭدى ويلاپ، ۋايىمداماڭدار. ويتكەنى نە ايتۋلارىڭ كەرەكتىگى سول ساتتە بەرىلەدى. وسىلاي وزدەرىڭ عانا ەمەس، سەندەر ارقىلى اكەلەرىڭنىڭ كيەلى رۋحى سويلەيدى»،— دەپ ۋادە بەردى. كەيىن يسا بىلاي دەدى: «باۋىرى ٶز باۋىرىن، اكەسى بالاسىن ولىمگە دۋشار ەتەدى، ال بالالارى اتا-اناسىنا قارسى شىعىپ، ولاردى ولىمگە دۋشار ەتەدى. مەنىڭ اتىما بولا جۇرتتىڭ ٴبارى سەندەردى جەك كورەتىن بولادى. ٴبىراق سوڭىنا دەيىن تاباندىلىق تانىتقان ادام قۇتقارىلادى» (ماتاي 10:19—22).
ۋاعىزداۋ ٸسى — وتە ماڭىزدى ٸس. سوندىقتان ەركىندىكتە ٴجۇرىپ ۋاعىزداي بەرۋلەرى ٷشىن، يسانىڭ ٸزباسارلارىنا پاراساتتى بولۋ كەرەك. وسىعان باسا نازار اۋدارىپ، ول بىلاي دەدى: «ٴبىر قالادا قۋدالاسا، باسقاسىنا قاشىڭدار. سەندەرگە شىندىعىن ايتامىن، ادام ۇلى كەلگەنشە، يسرايلدىڭ بارلىق قالالارىن ارالاپ ۇلگەرمەيسىڭدەر» (ماتاي 10:23).
يسا 12 ەلشىسىنە ٴتيىمدى نۇسقاۋلار بەردى، ماڭىزدى ەسكەرتۋلەر ايتتى جانە جىگەرلەندىردى. بۇل نۇسقاۋلار يسا ٶلىپ، قايتا تىرىلگەننەن كەيىن ۋاعىز ىسىنە اتسالىساتىندارعا دا قاتىستى. مۇنى ونىڭ «جۇرتتىڭ ٴبارى سەندەردى جەك كورەتىن بولادى» دەگەن سوزدەرىنەن كورەمىز. «جۇرتتىڭ ٴبارى» دەگەن ەلشىلەردىڭ ۋاعىزىن تىڭداعان ادامدار عانا ەمەس. ونىڭ ۇستىنە، عاليلەياداعى قىسقا ۋاعىز ساپارى كەزىندە ەلشىلەردى ەشكىم بيلەۋشىلەر مەن پاتشالاردىڭ الدىنا اپارعان جوق جانە وتباسى مۇشەلەرى ولىمگە دۋشار ەتكەن جوق.
يسا ەلشىلەرىنە وسى نۇسقاۋلاردى بەرگەندە، بولاشاقتى ويدا تۇتقانى انىق. مىسالعا، «ادام ۇلى كەلگەنشە» شاكىرتتەردىڭ يسرايلدىڭ بارلىق قالالارىن ارالاپ ۇلگەرمەيتىنى جايلى سوزگە كوڭىل بولەيىكشى. مۇنىمەن ول ۇلىلىققا بولەنگەن پاتشا رەتىندە قۇداي سوتىن ورىنداۋعا كەلگەنگە دەيىن شاكىرتتەرى قۇداي پاتشالىعىن تولىق ۋاعىزداپ بىتپەيتىنىنە مەڭزەدى.
ەلشىلەر ۋاعىزداپ جۇرگەندە قارسىلىققا كەزىكسە، بۇعان تاڭعالماۋلارى كەرەك. ويتكەنى يسا: «شاكىرتى ۇستازىنان، قۇلى قوجايىنىنان جوعارى ەمەس»،— دەدى. مۇنىمەن يسانىڭ نە ايتقىسى كەلگەنى تۇسىنىكتى. قۇداي پاتشالىعىن ۋاعىزداعانى ٷشىن جۇرت وعان قاتىگەزدىك تانىتىپ، قۋدالاعان بولسا، شاكىرتتەرىنە دە سولاي ىستەيتىن بولادى. الايدا يسا ولاردى نىعايتىپ: «ٴتاندى ولتىرسە دە، جاندى ولتىرە المايتىنداردان قورىقپاڭدار. قايتا، جاندى دا، ٴتاندى دە جاھاننامدا قۇرتا الاتىن قۇدايدان قورقىڭدار»،— دەدى (ماتاي 10:24، 28).
بۇعان قاتىستى يسانىڭ ٶزى ۇلگى كورسەتتى. ول بارىنەن دە قۇدىرەتتى ەحوباعا ادالدىعىنان تايماي، سول ٷشىن ازاپ-شەگىپ ولۋگە دەيىن باردى. قۇدىرەتى شەكسىز قۇداي عانا ادامنىڭ «جانىن» (ياعني بولاشاقتا ٶمىر ٴسۇرۋ ٷمىتىن) جويا الادى نەمەسە ماڭگى ٶمىر ٴسۇرۋ ٷشىن تىرىلتە الادى. بۇل سوزدەر ەلشىلەرگە زور سەنىمدىلىك بەرگەن بولۋ كەرەك.
سوسىن يسا ٸزباسارلارىنا قۇدايدىڭ ٶزى قامقور بولاتىنىنا مىسال كەلتىرىپ، بىلاي دەدى: «ەكى تورعاي ٴبىر تيىنعا ساتىلادى ەمەس پە؟ دەسە دە ولاردىڭ بىردە-بىرەۋىنىڭ قۇلاعانى كوكتەگى اكەلەرىڭنىڭ نازارىنان تىس قالمايدى... سوندىقتان قورىقپاڭدار، سەندەر كوپ تورعايدان الدەقايدا قىمباتسىڭدار!» (ماتاي 10:29، 31).
يسانىڭ شاكىرتتەرى ۋاعىزداپ جۇرگەن حاباردى وتباسىندا ٴبىرى قابىل الىپ، ٴبىرى قابىل المايتىندىقتان، وتباسى ەكىگە بولىنەدى. «مەنى جەر بەتىنە تاتۋلىق اكەلۋگە كەلدى دەپ ويلاماڭدار»،— دەدى يسا. دەمەك، كيەلى كىتاپتىڭ شىندىعىن قابىل الۋ ٷشىن ادامعا باتىلدىق قاجەت. سوندىقتان يسا: «كىمدە-كىم اكەسىن نە شەشەسىن مەنەن ارتىق كورسە، سول شاكىرتىم بولۋعا لايىق ەمەس؛ ۇلىن نە قىزىن مەنەن ارتىق كورگەن ادام دا شاكىرتىم بولۋعا لايىق ەمەس»،— دەپ ايتتى (ماتاي 10:34، 37).
الايدا يسانىڭ شاكىرتتەرىن شىن كوڭىلدەن قابىل الاتىندار دا بولادى. وندايلارعا قاتىستى يسا بىلاي دەدى: «كىمدە-كىم وسى كىشىلەردىڭ بىرەۋىنە مەنىڭ شاكىرتىم بولعانى ٷشىن، ەڭ بولماعاندا، ٴبىر توستاعان سالقىن سۋ بەرسە، سەندەرگە شىندىعىن ايتامىن، ول مىندەتتى تۇردە ٶز سىيىن الادى» (ماتاي 10:42).
ەلشىلەر يسادان نۇسقاۋلار، ەسكەرتۋلەر جانە جىگەر الىپ، جاقسى دايىندالعان سوڭ، «جولعا شىعىپ، اۋىل-اۋىلدى ارالاپ، بارلىق جەردە ىزگى حاباردى جاريالادى جانە ناۋقاستاردى ساۋىقتىردى» (لۇقا 9:6).
