Yesu wapele batumwa banji mikambizho ya kulondela pa kusapwila kimye kyo ebatumine babiji babiji. Kechi wibapeletu mikambizho ne, bino wibajimwineko ne pa bantu bafwainwe kukanya mwingilo wabo wa kusapwila. Wibambijile’mba: “Umvwai! Mbena kwimutuma nobe mikooko mu misuka . . . Jimukai na bantu; mambo bakemutwala mu bije ne kwimututawila mu mashinagoga abo. Kabiji bakemutwala ku biloolo ne ku bamfumu na mambo a amiwa.”—Mateo 10:16-18.

Kya kine, baana ba bwanga ba kwa Yesu bapichile mu lumanamo lwabaya bingi, bino Yesu wibalayile’mba: “Byo bakemufikizha kokwa, kange mukakamwe byo mukamba ne, mambo bakemubula byo mukamba mu kyokya kimye; mambo akya kikambanga kechi anweba ne, bino mupashi wa Shenu ye ukemukwasha kwamba.” Yesu watwajijile kwamba’mba: “Kabiji kolo nangwa nkasa ukasolola mukwabo amba bamwipaye, kabiji shanji ukasolola mwananji amba bamwipaye, baana nabo bakalukilamo bansemi babo ne kwibasolola amba bebepaye. Kabiji bantu bonse bakemushikwa na mambo a jizhina jami, pakuba awa ukachinchika kufika ne ku mpelo ukapuluka.”—Mateo 10:19-22.

Na mambo a kuba Yesu wanemekele bingi mwingilo wa kusapwila, wakwashishe baana banji ba bwanga kwikala bajimuka pa kwingila uno mwingilo. Waambile’mba: “Umvwe bemumanyika mu muzhi umo, nyemenai mu muzhi mukwabo; mambo kine nemwambila namba, saka mukyangye kupwisha kusapwila mu mizhi yonse ya Isalela, Mwana muntu ukafika.”—Mateo 10:23.

Yesu wapele batumwa banji 12 mikambizho, lujimuno ne lutundaiko lwawama bingi. Byambo byaambile Yesu byavwangilemo ne bonse bakengilanga mwingilo wa kusapwila ntanda yonse panyuma ya lufu ne lusanguko lwanji. Kino kyamwekela mu byambo byo aambile’mba baana banji ba bwanga ‘bakebashikwa ku bantu bonse,’ kechi ku bonkatu bantu ko batumine batumwa na kusapwila ne. Kabiji kechi tutangapo amba batumwa bebatwajile ku ba bitumbafumu ne ku bamfumu kimye Yesu kyo ebatumine kuya na kusapwila mu Ngalilea, nangwa’mba bebasolwelenga ku balongo babo amba bebepaye ne.

Onkao mambo, byo abuujilenga batumwa banji bino bintu, waambilenga pa bintu bikamweka kulutwe. Akilangulukai pa bino byambo byo abuujile baana banji ba bwanga amba saka bakyangye kupwisha kusapwila mu mizhi yonse, “Mwana muntu ukafika.” Yesu wamwesheshe kuba’mba baana banji ba bwanga kechi bakapwisha kusapwila ntanda yonse pa Bufumu bwa Lesa, Mfumu watumbijikwa aye Yesu Kilishitu saka bakyangye kumupa bumutonyi kwi Lesa ne kwiya na kuchibila bantu mambo ne.

Byo batwajijile na mwingilo wa kusapwila, batumwa kechi bafwainwe kukumya inge bebemena ku ntundwa ne, mambo Yesu wibambijile’mba: “Mwana wa bwanga kechi wakila mufunjishi wanji ne, nangwa muzha kechi wakila nkambo yanji ne.” Baana ba bwanga bayukile kishinka Yesu kyo aambilengapo. Mambo aye bamumanyikilenga na mambo a kusapwila Bufumu bwa Lesa. Onkao  mambo, baana ba bwanga ba kwa Yesu bafwainwe kuketekela kwibamanyika na mambo a kusapwila Bufumu bwa Lesa byonka byo bamubile aye. Pano bino, wibajimwineko amba: “Kange muchine aba bepayatu mubiji, bino bakankalwa kwipaya mweo ne; pakuba chinai yewa wakonsha konauna byonse, mweo ne mubiji mu Ngehena.”—Mateo 10:24, 28.

Yesu naye wapichilemo mu bino bintu. Wachinchikile kufikatu ne ku lufu kwa kubula moyo kabiji kechi wasankijilepo bukishinka bwanji kwi aye wa Bulume Bonse, Yehoba ne. Lesa wa Bulume Bonse ye yenkatu wakonsha kwipaya “mweo” (ko kuba’mba luketekelo lwa bwikalo bwa kulutwe) nangwa ye wakonsha kusangula muntu kuba’mba ekale na bumi bwa myaka ne myaka. Kine, bino byambo byatekeneshe bingi batumwa.

Kabiji Yesu walumbulwijile baana banji ba bwanga biji lusa lwa Lesa kwingijisha kino kishimpi. Waambile’mba: “Nanchi tubwalula tubiji kechi tupotwa na kajali kamo ka muwayawaya nenyi? Pakuba kafwako nangwa kamo kaponena panshi kwa kubula Shenu kuyuka ne. Onkao mambo, kuchina ne; mambo mwanema kukila bisamba bya bwalula.”—Mateo 10:29, 31.

Mambo a Bufumu Yesu o akambizhe baana banji ba bwanga kusapwila akabanya ba mu nzubo, mambo bamo ba mu kisemi bakeaswa bakwabo bakeakana. Walumbulwile’mba: “Kange mulanguluke’mba naishile kuleta mutende pano pa ntanda ne.” Kikebewa kuchinchika pa kuba’mba umo mu kisemi aswe bukine bwa mu Baibolo. Yesu waambile’mba: “Yense watemwa bashanji nangwa bainanji kukila byo antemwa amiwa kechi wafwainwa kwikala mwanami wa bwanga ne; kabiji yense watemwa mwananji wa mulume nangwa wa mukazhi kukila byo antemwa amiwa kechi wafwainwa kwikala mwanami wa bwanga ne.”—Mateo 10:34, 37.

Pano bino, bantu bamo batambwijilenga baana ba bwanga bulongo. Yesu waambile’mba: “Muntu yense upapo tuno twana twatucheche mema a kutoma na mambo a kuba’mba ye mwana wa bwanga, kine nemubuula namba, kechi ukabula kutambula mfweto yanji ne.”—Mateo 10:42.

Byo batambwijile mikambizho, lujimuno ne lutundaiko lwa kwa Yesu, batumwa “baimene kebaye mu nyaunda ya mu mizhi ya icheiche yonse saka basapwila mambo awama ne kubuka bantu konse konse.”—Luka 9:6.