Yesu ahanyine vaposetolo jenyi jindongi jamwaza jakwambulwilamo omu vayile vavali vavali. Kaha nawa avahuhumwine vyavatu vaze navakavemanyina nakole. Ambile ngwenyi: “Ivwenu! Ami nguli nakumituma nge mikoko mukachi katungunge . . . Zangamenunga navatu, mwomwo navakamitwalanga kujizango jakusopela milonga, kaha navakamiveta vikote mujisunangonga javo. Navakamitwalanga nawa kumeso avanguvulu navamyangana mwomwo yayami.”—Mateu 10:16-18.

Chikupu vene, vaka-kukavangiza Yesu navakamona luyanjisa, oloze avafwelelesele ngwenyi: “Omu navakamihana kuli vakiko, kanda namukalizakamina mwakuhanjikila chipwe vyuma namukahanjikako, mwomwo vyuma namukahanjika navakamihanavyo haola vene yize, mwomwo keshi yenu namukahanjikako, oloze shipilitu yaSenu yikiko nayikahanjikanga kuhichila muli enu.” Yesu ambile nawa ngwenyi: “Mutu mwakahana ndumbwenyi vakamujihe, ise yamutu mwakahana mwanenyi, kaha vana navakafumbukila visemi javo nakuvajihisa. Navakamihunganga kuli vatu vosena mwomwo yalijina lyami, oloze ou mwakakachila palanga nakusongo navakamulwila.”—Mateu 10:19-22.

Hakuwana nge mulimo wakwambulula wapwile waulemu chikuma, ngocho Yesu alwezele tumbaji vapwenga vakuzangama mangana vatwaleho lika kuzata mulimo kanou. Ambile ngwenyi: “Omu navamiyanjisa munganda yimwe, chinyinenu munganda yikwavo, mwomwo chamuchano vene nangwamba kuli enu ngwami, mwanamutu mwakamiwana shimbu kanda mukumise kujinguluka jinganda jaIsalele josena.”—Mateu 10:23.

Yesu alwezele vaposetolo jenyi 12 jindongi jamwaza jakuvahuhumuna nakuvakolezeza. Mazu awa ahanjikile Yesu apwa anganyo nakuli vosena vaze navazata mulimo kanou wakwambulula hanyima yakufwa chaYesu nahakumusangula. Chuma kana achisolwele omu ahanjikile ngwenyi tumbaji twenyi ‘navakavahunganga kuli vatu vosena,’ keshi kuli vaze vambulwilile vaposetolo kahako. Nahamwe hauchi vasoneka ngwavo vaposetolo vavatwalilenga kuli vanguvulu, chipwe kumeso avamyangana, chipwe kuvajihisa kuli vausoko wavo, hakatando kakandende kaze vambulilile muNgalileyako.

Chikupu vene, omu Yesu apwile nakuhanjika mazu awa kuli vaposetolo jenyi, ashinganyekele havyuma navikasoloka kulutwe. Achishinganyekenu hamazu alwezele tumbaji twenyi ngwenyi ‘mwanamutu mwakavawana shimbu kanda’ vakumise kwambulwila mujinganda josena. Yesu hano apwile nakulumbununa nge tumbaji twenyi kaveshi kukakumisa mulimo wakwambulula Wangana waKalunga shimbu kanda ikiye Yesu Kulishitu, Mwangana waupahu, ezenga nakwimanyinako Kalunga nakusopesa vatu.

Vaposetolo kavatelele kulikomokela omu  vapwile nakumona luyanjisa hakuzata mulimo wakwambulula, mwomwo Yesu ambile ngwenyi: “Kambaji kahambakana muka-kumunangulako, chipwe ndungo nawa kahambakana kaka yenyiko.” Hakuwana nge Yesu vamuhendelenga nakumuyanjisa mwomwo yakwambulula Wangana waKalunga, ngocho navakiko navakavayanjisa. Chipwe ngocho, avakolezezele ngwenyi: “Kanda namwivwa woma vaze navajiha mujimba, oloze navahona kujiha mwonoko. Oloze ivwenu woma uze nahase kunongesa mwono namujimba muNgehena.”—Mateu 10:24, 28.

Yesu asolwele chakutalilaho chamwaza. Omikile palanga nakukufwa nakulama kulonga chenyi kumeso ayauze wangolo josena, Yehova. Kalunga Wangolo Josena ikiye kaha nahase kunongesa “mwono” wamutu (kulumbununa kuyoya chenyi chakulutwe) chipwe kumusangula akalivwise kuwaha kuyoya chahaya myaka yosena. Mazu kana atela akolezezele vaposetolo.

Yesu hakusaka kusolola omu Kalunga azakama vaka-kumukavangiza, avalwezele chakutalilaho ngwenyi: “Kutala tujilili vavali kaveshi kuvalanda nakalumbongo kamwe kachicheleko numba? Chipwe ngocho, naumwe wauchi mwaholokela hamavu chakuzeneka Senu kutachikizako. . . . Ngocho kanda namwivwa womako. Enu mwapwa muvavalemu kuhambakana tujilili vavavulu.”—Mateu 10:29, 31.

Mujimbu vambulwilenga tumbaji twaYesu wanehele vihandwa mujitanga mwomwo vamwe mujitanga vetavilile mujimbu kana veka chiku. Yesu ambile ngwenyi: “Kanda namushinganyeka ngwenu ngwejile nakuneha kuunda hano hamavuko.” Chasakiwa kumika numba mutu mutanga etavile muchano wamuMbimbiliya. Yesu ambile ngwenyi: “Weshowo mwazanga chikuma ise chipwe naye kunguhambakana ami kangutela amiko, kaha weshowo mwazanga chikuma mwanenyi walunga chipwe wapwevo kunguhambakana ami kangutela amiko.”—Mateu 10:34, 37.

Vatu vamwe vatambwile kanawa tumbaji twaYesu, ngocho ambile ngwenyi: “Weshowo mwahana umwe hali ava vavandende lupasa lwameya atuta anwenga mwomwo yakupwa kambaji, chamuchano vene nangumilweza ngwami, ikiye keshi chikupu kukatokesa fweto yenyiko.”—Mateu 10:42.

Hakuwana nge Yesu avahanyine jindongi, nakuvahuhumuna, nakuvakolezeza, ngocho vaposetolo jenyi “vakatukile nakuya mungalila yosena halimbo hilimbo nakuvilika mujimbu wamwaza, nakuka vatu kuvihela vyosena.”—Luka 9:6.