A Zeezi sẽn tʋm a tʋm-tʋmdbã yiib-yiib tɩ b na n tɩ moon koɛɛgã, a reng n kõ-b-la noy la saglse, n wilg-b b sẽn segd n maan to-to. La a keoog-b lame, tɩ b gũus tɩ bɛɛb n be. A yeel-b-la woto: “Ade, mam tʋmda yãmb wa piis digd-n-yĩids sʋka. Dẽ yĩnga, yɩ-y yam dãmb wa wiisi, la y yɩ neb sẽn ka tar yell ye, n yaa wa wala. Gũus-y y mens ne nebã, bala b na n yõga yãmb n kẽng bʋʋd zĩisẽ, la b na n pãba yãmb ne kalwaas b karen-dotã pʋse. B na n kẽnga ne yãmb Gʋvɛrneer dãmb ne rĩm-dãmb taoor mam yĩnga.”—Matye 10:16-18.

A Zeezi wilgame tɩ sẽn tũud-b yẽ wã tõe n paama nams-toaaga. La sẽn na yɩl tɩ b bas b yam, a yeela woto: “B sã n tall yãmb n kẽnge, bɩ y da maan yɩɩr ne yãmb sẽn na n gom to-to, wall y sẽn na n yet tɩ bũmb ning ye. Wakat-kãng bala, b na n wilga yãmb bũmb ning y sẽn na n gomã. Bala, ka yãmb n na n gom ye, yaa yãmb ba sẽn be arzãnã [“saasẽ,” MN] Sɩɩgã sẽn be yãmb pʋsã n na n gome.” A Zeezi paasa woto: “Ned na n kɩtame tɩ b yõk a ba-biig n kʋ, la ba-rãmb me na n maana b kamb a woto. Kamb na n yika ne b ba-rãmb la b ma-rãmb n kɩt tɩ b kʋ-ba. Neba fãa na n kisga yãmb mam yʋʋrã yĩnga, la ned ning sẽn na n yals-a kãenkãe tɩ wakat ta na paam fãagre.”—Matye 10:19-22.

Koɛɛgã mooneg yõod sẽn yɩɩd bũmb fãa wã yĩnga, a Zeezi saglga a poorẽ dãmbã tɩ b yɩ gũusdba, tɩ bũmb da wa maan tɩ tʋʋmdã yals ye. Ad a sẽn yeele: “B sã n nams yãmb tẽn-kãngã, bɩ y zoe n kẽng tẽng a to. Mam yeta yãmb sɩda tɩ yãmb ka na n saag Israyɛll tẽmsã n sɛ tɩ Ninsaal Bi-riblã nan ka wa ye.”—Matye 10:23.

A Zeezi sẽn kõ a tʋm-tʋmdb 12 noy la saglse, n keoog-b la a keng b raoodã sɩd sõng-b-la wʋsgo. La hal baa a Zeezi kũumã la a vʋʋgrã poore, a gom-kãensã na n kell n sõnga neb nins fãa sẽn na n kẽes b toog koɛɛgã mooneg pʋgẽ wã. Bõe n wilgd rẽ? Yaa a Zeezi sẽn yeel tɩ ‘nebã fãa na n kisga’ yẽ karen-biisã. A pa yeel tɩ neb nins a tʋm-tʋmdbã sẽn na n tɩ taas koɛɛgã bal n na n kisg-b ye. Sẽn paase, Biiblã pa wilg t’a Zeezi sẽn tʋm a tʋm-tʋmdbã tɩ b moon koɛɛgã Galɩle wã, neb n tall-b n kẽng gʋvɛrneer dãmb ne rĩm-dãmb taoore, wall b zags rãmb n kɩt tɩ b kʋ-b ye.

Dẽnd yaa vẽeneg t’a Zeezi ra gomda bũmb sẽn da nan wat yelle. D tẽeg t’a yeelame t’a karen-biisã pa na n saag tẽns nins b sẽn da segd n moonã n sa tɩ “Ninsaal Bi-riblã nan ka wa ye.” A gomdã wilgdame t’a karen-biisã pa na n moon Wẽnnaam Rĩungã koɛɛgã n sa tɩ Kirisã nan pa wa ne naam la ziiri, n na n sɩng Wẽnnaam bʋ-kaoorã ye.

A Zeezi wilgame t’a tʋm-tʋmdbã sã n moond koɛɛgã tɩ bɛɛb namsd-ba, pa segd n ling-b ye. A yeelame: “Karen-biig ka yɩɩd a karen-saamb ye, la tʋmtʋmd ka yɩɩd a zu-soab ye.” A gomdã yaa vẽenega. Nebã namsa yẽ la b paoog-a Wẽnnaam Rĩungã koɛɛg mooneg yĩnga. Karen-biisã me nengẽ na n yɩɩ woto. La a Zeezi sagl-b-la woto: “Ra zoe-y neb nins sẽn kʋʋd yĩngã n yaool n ka tõe n kʋ sɩɩgã ye. Zoe-y soab ning sẽn tõe n kɩt tɩ yĩngã ne sɩɩgã sãam bug-tẽngã [“Zeyɛn,” MN].”—Matye 10:24, 28.

A Zeezi meng kõo mak-sõngo. A saka kũum, n pa tol n kɩɩs a Zeova sẽn yaa Wẽnnaam ning sẽn tõe fãa wã ye. Yaa Wẽnnaam sẽn ka to wã bal n tõe n sãam ned sɩɩga, rat n yeel tɩ n kɩt t’a pa paam n vɩɩmd beoog-daar ye. Leb n yaa yẽ bal n tõe tɩ ned sẽn ki vʋʋge, n vɩɩmd wakat sẽn kõn sa. Hakɩɩka, tʋm-tʋmdbã sẽn wʋm woto wã b yam gãandame!

Sẽn na yɩl tɩ sẽn tũud-b yẽ wã kɩs sɩd ne Wẽnnaam nonglmã, a Zeezi rɩka makre. A yeelame: “B ka koosd yirs a yiib su a yembr sɩda? La baoosgo, a yembr bãmb sʋk ka lʋɩt tẽng tɩ ka tũ ne yãmb ba wã raab ye. . . . Dẽ yĩnga, da zoe-y rabeem ye. Yãmb bee yõod n yɩɩd yirs wʋsgo.”—Matye 10:29, 31.

Koɛɛg ning a Zeezi karen-biisã sẽn moondã na n welga neb ne b zak rãmba, bala kẽer na n saka koɛɛgã tɩ sãnda zãgse. A Zeezi yeelame: “Ra tags-y tɩ mam waame tɩ bãan na zĩnd tẽng zug ye.” Sɩd me, zak pʋgẽ tɩ sã n yaa nin-yɛng n dat n tũ a Zeova, a sã n pa tar raoodo, yaa toogo. La a Zeezi yeelame: “Ned ning sẽn nong a ba bɩ a ma n yɩɩd maam ka zems tɩ yɩ mam dẽnd ye. La sẽn nong-a a bi-ribl bɩ a bi-pugl n yɩɩd maam ka zems tɩ yɩ mam dẽnd ye.”—Matye 10:34, 37.

La baa ne rẽ, neb n na n sak n deeg a Zeezi karen-biisã sõma. A yeela woto: “Ned sã n kõ kom-bõoneg kãensã ned a yembr ko-maasg t’a yũ, a sẽn yaa mam karen-biig yĩnga, baa ya ne wũmbla, mam yeta yãmb sɩd t’a kõn kong a keoor ye.”—Matye 10:42.

A Zeezi sẽn kõ a tʋm-tʋmdbã noy la saglse, n keoog-b la a keng b raoodã segl-b lame tɩ b na n tõog n gilgd “tẽng-tẽnga, n moond koe-noogã, la b maagd neb zĩiga fãa.”—Luk 9:6.