အခန်း ၅၀
နှိပ်စက်ညှဉ်းပန်းမှုတွေကြားမှာ ဆက်ဟောပြောနိုင်ဖို့ ပြင်ဆင်ပေး
မဿဲ ၁၀:၁၆–၁၁:၁ မာကု ၆:၁၂၊ ၁၃ လုကာ ၉:၆
-
တမန်တော်တွေကို ယေရှုလေ့ကျင့်ပေးပြီး စေလွှတ်
ယေရှုက တမန်တော်တွေကို နှစ်ယောက်တစ်တွဲစီ စေလွှတ်ချိန်မှာ ဘယ်လို ဟောပြောရမယ်ဆိုတာ အကောင်းဆုံးညွှန်ကြားချက်တွေ ပေးတယ်။ ဒါတင်မကသေးဘူး။ အတိုက်အခံလုပ်သူတွေနဲ့ ပတ်သက်ပြီး အခုလို သတိပေးတယ်– “ဝံပုလွေအုပ်ထဲ သိုးတွေ လွှတ်လိုက်သလို ခင်ဗျားတို့ကို လွှတ်လိုက်ပြီ။ . . . လူတွေကို သတိထားပါ။ ခင်ဗျားတို့ကို တရားရုံးပို့ပြီး တရားဇရပ်တွေမှာ ရိုက်နှက်ကြလိမ့်မယ်။ ကျွန်တော့်ကြောင့် ခင်ဗျားတို့ကို ဘုရင်ခံတွေ၊ ဘုရင်တွေရှေ့ ပို့ဆောင်ကြလိမ့်မယ်။”—မဿဲ ၁၀:၁၆-၁၈။
မှန်ပါတယ်၊ ယေရှုရဲ့ နောက်လိုက်တွေဟာ ပြင်းထန်တဲ့ နှိပ်စက်ညှဉ်းပန်းမှုတွေ ကြုံရနိုင်တယ်။ ဒါပေမဲ့ နောက်လိုက်တွေ အားရှိစေဖို့ ဒီလို ကတိပေးတယ်– “ခင်ဗျားတို့ကို အပ်နှံတဲ့အခါ ဘယ်လို ပြောရမလဲ၊ ဘာပြောရမလဲဆိုပြီး တွေးပူမနေပါနဲ့။ ပြောရမယ့် စကားကို အဲဒီအချိန်ကျရင် သိလာလိမ့်မယ်။ ခင်ဗျားတို့ပဲ ပြောရမှာ မဟုတ်ဘူး၊ ကောင်းကင်အဖဆီက လာတဲ့ စွမ်းအားတော်က ကူပြောပေးလိမ့်မယ်။ ဒါ့အပြင် ညီအစ်ကိုတွေ အသတ်ခံရအောင် အချင်းချင်း အပ်နှံလိမ့်မယ်။ ဖခင်က သားသမီးကို အပ်လိမ့်မယ်။ သားသမီးကလည်း မိဘကို ဆန့်ကျင်ပြီး အသတ်ခံရအောင် လုပ်ကြလိမ့်မယ်။ ကျွန်တော့်နာမည်ကြောင့် ခင်ဗျားတို့ကို လူတွေ မုန်းကြလိမ့်မယ်။ ဒါပေမဲ့ အဆုံးထိ ခံနိုင်ရည်ရှိတဲ့သူဟာ ကယ်တင်ခံရလိမ့်မယ်။”—မဿဲ ၁၀:၁၉-၂၂။
ဟောပြောခြင်းလုပ်ငန်းက အရေးကြီးဆုံး ဖြစ်လို့ ဒီလုပ်ငန်းကို ဆက်လုပ်ဆောင်နိုင်အောင် လိမ္မာပါးနပ်မှု ရှိဖို့လိုကြောင်း အခုလို အလေးပေး ပြောခဲ့တယ်– “ခင်ဗျားတို့ကို ဒီမြို့မှာ ညှဉ်းဆဲရင် နောက်တစ်မြို့ကို ထွက်ပြေးပါ။ ကျွန်တော် မှန်တာကို ပြောမယ်။ အစ္စရေးမြို့ရွာတွေကို လှည့်လည် ဟောပြောလို့ မပြီးခင် လူသား ရောက်လာလိမ့်မယ်။”—မဿဲ ၁၀:၂၃။
တမန်တော် ၁၂ ယောက်ကို ပေးခဲ့တဲ့ ညွှန်ကြားချက်တွေ၊ သတိပေးချက်တွေ၊ အားပေးချက်တွေက ဘယ်လောက် ကောင်းလိုက်သလဲ။ အဲဒီစကားတွေက ယေရှုသေဆုံးပြီး ထမြောက်ပြီးနောက် ဟောပြောခြင်းလုပ်ငန်းကို လုပ်ဆောင်မယ့်သူ အားလုံးနဲ့လည်း သက်ဆိုင်တယ်။ ဘယ်လိုသိနိုင်သလဲ။ တပည့်တွေကို “လူတွေ မုန်းကြလိမ့်မယ်” လို့ယေရှုပြောတယ်။ အဲဒါက တမန်တော်တွေ သွားဟောပြောတဲ့ လူတွေကိုပဲ ရည်ညွှန်းနေတာ မဟုတ်ဘူး။ တစ်ကမ္ဘာလုံးက လူတွေကို ရည်ညွှန်းနေတာ။ ဒါ့အပြင် ဂါလိလဲပြည်မှာ ဟောပြောတဲ့ အချိန်တိုလေးအတွင်း တမန်တော်တွေဟာ ဘုရင်ခံတွေ၊ ဘုရင်တွေရှေ့ ပို့ဆောင်မခံခဲ့ရဘူး။ မိသားစုဝင်တွေကလည်း တမန်တော်တွေ အသတ်ခံရအောင် အပ်နှံတာမျိုး မရှိခဲ့ဘူး။
ဒါကြောင့် တမန်တော်တွေကို ယေရှု အဲဒီစကားတွေ ပြောနေချိန်မှာ အနာဂတ်အကြောင်း စဉ်းစားနေမှန်း ရှင်းနေပါတယ်။ တပည့်တွေ “လှည့်လည်ဟောပြောလို့မပြီးခင် လူသား ရောက်လာလိမ့်မယ်” ဆိုတဲ့စကားကို သုံးသပ်ကြည့်ပါ။ ဘုရားသခင့်နိုင်ငံတော်သတင်း ဟောပြောလို့မပြီးခင် ဘုရားသခင်ခန့်အပ်တဲ့ တရားသူကြီးအဖြစ် ဘုရင်ယေရှုခရစ် ရောက်လာမယ်ဆိုတဲ့အကြောင်း တပည့်တွေကို ရှင်းပြနေတာဖြစ်တယ်။
ဟောပြောခြင်းလုပ်ငန်းမှာ ဆန့်ကျင်မှုကြုံရတဲ့အခါ တပည့်တွေ မအံ့သြသင့်ဘူး။ “တပည့်ဟာ ဆရာထက် မသာနိုင်ဘူး။ ကျွန်မဿဲ ၁၀:၂၄၊ ၂၈။
ကလည်း သခင်ထက် မသာနိုင်ဘူး” ဆိုပြီး ယေရှုပြောလို့ပဲ။ ရှင်းပါတယ်၊ ဘုရားသခင့်နိုင်ငံတော်အကြောင်း ဟောတဲ့အတွက် သူကိုယ်တိုင် မတရား ဆက်ဆံခံရ၊ နှိပ်စက်ညှဉ်းပန်းခံရတယ်ဆိုရင် တပည့်တွေလည်း ခံရမှာပဲ။ ဒါပေမဲ့ ယေရှု အခုလို အားပေးတယ်– “ကိုယ်ခန္ဓာကို သတ်နိုင်ပေမဲ့ အသက်ကို မဖျက်ဆီးနိုင်တဲ့ လူတွေကို မကြောက်ပါနဲ့။ ကိုယ်ခန္ဓာရော အသက်ကိုပါ ဂေဟင်နာအရပ်မှာ ဖျက်ဆီးနိုင်တဲ့ အရှင်ကိုပဲ ကြောက်ကြပါ။”—ဒီကိစ္စမှာ ယေရှု စံနမူနာပြခဲ့တယ်။ တန်ခိုးအကြီးဆုံးအရှင် ယေဟောဝါဘုရားကို သစ္စာဖောက်မယ့်အစား သတ္တိရှိရှိ အသေခံခဲ့တယ်။ အနန္တတန်ခိုးရှင် ဘုရားသခင်ဟာ လူတစ်ယောက်ရဲ့ “အသက်” (အနာဂတ်မှာ အသက်ရှင်ခွင့် အလားအလာ) ကို ဖျက်ဆီးနိုင်တယ် ဒါမှမဟုတ် သူ့ကို အသက်ပြန်ရှင်စေပြီး ထာဝရအသက်ပေးနိုင်တယ်။ ဒါကိုသိရတဲ့အခါ တမန်တော်တွေ ဘယ်လောက် အားရှိလိုက်မလဲ။
နောက်လိုက်တွေကို ဘုရားသခင် မေတ္တာပါပါ ဂရုစိုက်စောင့်ရှောက်ပေးမှန်း ပုံဥပမာတွေသုံးပြီး ယေရှု အခုလိုပြောတယ်– “စာငှက်နှစ်ကောင်ကို ငွေတစ်ပြားနဲ့ ဝယ်လို့ရတယ် မဟုတ်လား။ အဖဘုရား မသိဘဲနဲ့ အဲဒီစာငှက် တစ်ကောင်မှ မြေပေါ်မကျဘူး။ ဒါကြောင့် မကြောက်ပါနဲ့။ ခင်ဗျားတို့ဟာ စာငှက်လေးတွေထက် ပိုတန်ဖိုးရှိပါတယ်။”—မဿဲ ၁၀:၂၉၊ ၃၁။
တပည့်တွေ ဟောပြောတဲ့သတင်းကို မိသားစုဝင်တချို့က လက်ခံပြီး တချို့က လက်မခံတဲ့အတွက် မိသားစုအတွင်း စိတ်ဝမ်းကွဲပြားလာတယ်။ ဒါကြောင့် “ကမ္ဘာမြေပေါ် ငြိမ်သက်ခြင်းကို ကျွန်တော် ယူဆောင်လာတယ်လို့ မထင်ကြနဲ့” ဆိုပြီး ယေရှုပြောတယ်။ မှန်ပါတယ်၊ ကျမ်းစာအမှန်တရားကိုလက်ခံတဲ့ မိသားစုဝင်တစ်ယောက်ဟာ သတ္တိရှိရမယ်။ ယေရှု အခုလိုပြောတယ်– “ကျွန်တော့်ထက် မိဘကို ပိုချစ်တဲ့သူဟာ ကျွန်တော့်တပည့် မဖြစ်ထိုက်ဘူး။ ကျွန်တော့်ထက် သားသမီးကို ပိုချစ်တဲ့သူကလည်း ကျွန်တော့်တပည့် မဖြစ်ထိုက်ဘူး။”—မဿဲ ၁၀:၃၄၊ ၃၇။
တပည့်တွေကို လိုလိုလားလား လက်ခံတဲ့သူတချို့တော့ ရှိလိမ့်မယ်။ ယေရှုက “ကလေးငယ်နဲ့တူတဲ့ ဟောဒီလူတွေကို ကျွန်တော့်တပည့်ပဲ ဆိုပြီး ရေအေးတစ်ခွက် တိုက်တယ်ဆိုပါစို့။ ကျွန်တော် မှန်တာကို ပြောမယ်။ သူ အကျိုးကျေးဇူး မခံစားရဘဲ မနေဘူး” လို့ပြောတယ်။—မဿဲ ၁၀:၄၂။
ယေရှုရဲ့ ညွှန်ကြားချက်တွေ၊ သတိပေးချက်တွေ၊ အားပေးချက်တွေကို ပြည့်ပြည့်စုံစုံ ရရှိပြီးတဲ့နောက်မှာတော့ တမန်တော်တွေဟာ “တစ်ရွာပြီးတစ်ရွာ သွားပြီး သတင်းကောင်း ဟောပြောတယ်။ ရောဂါတွေ ကုသပေးတယ်။”—လုကာ ၉:၆။