Yesu onnaavaha arummwa awe mahusiheryo aphaama mmukhalelo aneeraaya epake muteko woolaleerya vaavaa aryaaya eeli eeli. Nyenya, owo haakotenle vaava. Mweepewe owo onnaalopola vooloca sa wiikariwa: “Miyo kinnorumani ntoko iputxeputxhe veri va mitxi. Mwikosopeke ni atxhu. Yawo anamovelèlani omilatxhuni, anamowasulakani mmasinagoga mwaya. Wa nthowa naka munamukerihiwa wa asitokwene a governo ni wa mamwene.”—Mateu 10:16-18.

Mweeparipari, oomuchara a Yesu akhweya anamwiikariwaka, naamwi hiiha owo onnaalipiha aaroromelihaka: “Mwavelèliwà wa yawo, muhiteteiwe vawupuwela etxhu muneranyu mulotxe. Yeyo muneranyu mulotxe muni nvahiwe mwa elukuluku ene yeyo. Wona wi tahi nyuwo muni mulotxe elukuluku yeyo, nto Munepa wa Atithinyu t’oni olotxe mwa nyuwo.” Yesu onnatitelela: “Munna onammukeriha munnawe mokhwani; nave tithi mwanawe. Anamwane anamwarukunuwela asitithi ni anan’wipha. Munamwitxiwa t’atxhu othene wa nthowa na nsina naka, nto yole oni avilele ophiyerya omakutxhulelo, onanvuluwa.”—Mateu 10:19-22.

Woona wi muteko woolaleerya ti wookhweleya, Yesu onnaceenyerya ochuneya waya oomuchara awe okhala oovyaka wi etitelele okhala ootaphuwa oyano vahoolo muteko yoola. Owo onnaloca: “Yawikaràni va epoma emoha, mutxhawele ekina. Eparipari kinnolèlani wi himmaliha wetxetxa ipoma sa lsarayele, ahiphin’ye Mwana a mutxhu.”—Mateu 10:23.

Yesu onnaavaha amuhuserya awe khumi napiili, ikano, nceenyeryo ni mahusiheryo ookhweleya! Mweeparipari, masu yaala annaphariheleyatho wa yaale anahaala opaka makupa mmuteko woolaleerya Yesu amanle okhwa ni oviihiwa mookhwani. Ela ennooniheryeya moorweela wa oloca wi amuhuseryaawe anahaala ‘witxiwa t’atxhu othene,’ oohiya pahiru wa yaawo arummwa yaarummwaaya waalaleerya. Nyenya, hannaalakhanya wi amuhuserya aakerihiwa wa alamuleli ni mamwene variyari va elukuluku yavakhaani ya mukipici aya woolaleerya o Kalileya naari oveleeliwa ni aveechokoni vaya wi yiiphiwe.

Mwawooneya, Yesu onuupuwela soomwaahiyu mu oloca ichu seiha wa arummwa. Muthokororye masu aalonceiye wi amuhuserya awe heni ekhwaaniherye muteko woolaleerya “ahiphin’ye Mwana a mutxhu.” Yesu onnooniherya wi amuhuserya awe heni ekhwaaniherye olaleerya Omwene wa Muluku ahaakumve ophiya Mwene oocicimiheya Yesu Kristu ntoko muthoriha a Muluku.

 Vaavaa anayaayano vahoolo muteko woolaleerya, arummwa hanaphwanela otikhina yaahoolelaka wiikariwa, ntakhara Yesu ooloca: “Muhuserya hanampwaha muhusihawe, nari namalapa pwiyawe.” Masu a Yesu tookwakwaleya. Owo aahikhalihiwa moonanara nave aahiikariwa alaleyaka Omwene wa Muluku, nave awotho anamweereliwa emohamoha. Naamwi hiiha, Yesu onnaalipiha: “Muhiwoveke anipha mwili ni hanawerya wipha munepa. Nto mmoveke yole onawerya orimeliha munepa ni mwili omoroni.”—Mateu 10:24, 28.

Mwa yeela, Yesu oovaha yootakiherya. Owo aahiivilela moohoova ophiyerya okhwa ohiya onanariha ororomeleya wawe wa yoowo ori a owerya woothene, Yehova. Ti Muluku a Owerya Woothene yoowo onawerya wiipha “munepa” wa muchu (ewehereryo awe yoomwaahiyu ya okumi) naari yoowo onawerya omviiha muchu wi apuhe ekumi yoohimala. Chiryene ela yaahaalipiha arummwa!

Yesu aahiphwanaphwaniha opwacha wookhwela wa Muluku mmukhalelo ola: “Hinakulihiwa ipalame pili ni ikhorowa vakhani? Nto hiyavo epalame emoha mano enawereya omorela vathi, Atithinyu ehikhwenle . . . Vawi hiha muhòveke, wona wi nyuwo munnakhweleya opwaha ipalame sawatxa.”—Mateu 10:29, 31.

Muchaka amuhuserya a Yesu analaleeryaaya onahaala okawanya ichoko, akina aveemusini anahaala weemererya nave akina hooye. Yesu onnathariha: “Muhupuwele wi kirwele oruha muretxele vathiva.” Aai, onachuneya olipa murima wi muchu aveemusini awerye osiveliwa ni eparipari ya Mpiipiliya. Yesu onnaloca: “Yowo onàkhwela atithinya nari amannya okipwaha miyo, hanaphwanela okhala aka. Nave yowo onàkhwela anawe okipwaha miyo, hanaphwanela okhala aka.”—Mateu 10:34, 37.

Naamwi hiiha, akina anahaala owaakhela amuhuseryaawe mwaphaama. Owo ooloca: “Ole oni anvahe mahi vakhani mwana si ola, amwerelaka okhala muhuseryaka, kinnolèlani mwa eparipari wi yowo harwa ayelela ntxhuwelo nawe.”—Mateu 10:42.

Ereheryen’ye phaama ni mahusiheryo, ikano, ni nceenyeryo na Yesu, arummwa “yàtximula, yetxetxaka ilapo, elaleyaka Mutxhaka Waphama ni yapenusaka atxhu mmapuroni othene.”—Luka 9:6.