Sesusi waavela ono apositolu mbae onondonga mbukahi nawa mbo oñgeni mavakaivisa, tyina ankho mavaende vevali-vevali. Mahi hatyoko vala alinga. Nokankhenda, wevelondola konthele yonondyale mbavo okuti: “Ame ndyikahi nokumutuma iya mamukala ngonongi pokati komahunyu . . . Lungukei kovanthu, mokonda mavemutuala monombonge, avemuvetela monondyuo mbavo mbokufendela. Mavekemutuala kovatumini no konohamba mokonda yange.” — Mateusi 10:16-18.

Ovalongwa va Sesusi ankho mavamoneswa unene ononkhumbi, Sesusi evelae okuti: “Tyina vamemutuala, muhasukalalei netyi mamupopi ine oñgeni mamupopi, mokonda etyi mamupopi mamutyipewa poola yatyo. Mokonda hanwe vala mamupopi, mahi ononkhono mba Tate yenyi mambumukuatesako okupopia.” Sesusi ayawisako okuti: “Omunthu makaipaesa ondenge yae, ondenge makaipaesa omukulu wae, iya he makaipaesa omona wae, iya ovana mavakatyitukila-po ovo he, aveveipaesa. Iya onwe mamukayalwa novanthu aveho mokonda yenyina liange, mahi una ukoleleya alo konthyulilo makayovolwa.” — Mateusi 10:19-22.

Mokonda okuivisa otyilinga tyakolela unene, Sesusi wapopia omokonda yatyi ovalanduli vae ankho vesukisila okulunguka opo vetyivile okutualako novilinga viavo. Wati: “Tyina vamemumonesa ononkhumbi mepunda-umbo limwe, endei no kekuavo. Mokonda ame ndyimupopila otyili okuti, kamamumane okueenda omapunda-umbo aeho o Isilayeli, otyo Omona womulume eheneye.” — Mateusi 10:23.

Sesusi waavela ono apositolu mbae 12 onondonga, nomalondolo ekahi nawa iya evepameka unene! Upondola okutala okuti, onondaka ombo tupu mbupopia ovanthu vana ankho mavakaivisa konyima yononkhia mba Sesusi netutilo liae. Otyo tutyii mokonda Sesusi wapopia okuti ovalongwa vae ‘mavakayalwa novanthu aveho,’ ankho kamavayalwa vala na vana ono apositolu vatumwa vakaivise. Tupu, katuavasile onthele ipopia okuti ono apositolu vatuailwe kovatumini no konohamba, ine vaipaelwe novanthu vomombunga yavo, pomuvo ankho vekahi nokuivisa ko Ngalileya.

Tyimoneka nawa okuti Sesusi ankho ukahi nokupopila ono apositolu mbae etyi matyikeya komutwe. Tala okuti ovalongwa ankho kamavamane okuivisa momapunda-umbo aeho, “otyo Omona womulume eheneye.” Sesusi ankho ukahi nokulekesa okuti ovalongwa vae, kamavamane okuivisa konthele Youhamba wa Huku tyina nkhele Ohamba Sesusi Kilisitu eheneye ngomukoyesi watumwa na Huku.

Mokueenda kuovilinga viokuivisa, okumoneswa ononkhumbi ankho kamatyitumphulukisa ono apositolu, mokonda Sesusi wevepopila okuti: “Omulongwa hamunene vali tyipona omulongesi wae.” Etyi Sesusi apopia tyayandyuluka nawa. Sesusi walingilwe onya, amoneswa ononkhumbi, ngotyo navo ankho otyo mavalingwa. Sesusi evelondola okuti: “Muhatilei owoma vana vapondola okumuipaa, mahi vehetyivili okumupola ekevelo liokukakala vali nomuenyo wahapu komutwe wandyila, mahi tilei owoma una upondola okumunyima-ko mo Gehena.” —Mateusi 10:24, 28.

Sesusi waava ongeleka ongwa konthele yotyo. Wakoleleya tyihena owoma alo ankhia, ahayeke-po oukuatyili wae ku Siovaa, wepondolo aliho. Huku Wepondolo Aliho oe vala upondola okuhanya “ohande” ine omuenyo womunthu (ekevelelo liokukakala nomuenyo komutwe), ine oe vala upondola okututilisa omunthu opo akale nomuenyo wahapu. Otyo tyapamekele unene ono apositolu!

Sesusi apopila ovalanduli vae okuti Huku uvehole unene, etyi ati: “Oviila vivali ovitutu, kavilande vala ombongo ike yotyivela ina esilivilo lihehi? Mahi natyike poviila ovio tyitokela pohi otyo Tate yenyi ehetyii. . . . Moluotyo, muhatilei owoma; onwe muna vali esilivilo tyipona oviila ovinyingi.” — Mateusi 10:29, 31.

Onondaka ovalongwa va Sesusi mavaivisa ankho mambuyapula onombunga, vamwe mavetavela iya vamwe kamavetavela. Sesusi wati: “Muhasokei okuti naeta ombembwa pano pohi.” Ngotyo ankho tyesukisa okukola omutima opo omunthu umwe mombunga etavele otyili tyikahi Mombimbiliya. Sesusi apopi okuti: “Omunthu uhole vali unene he ine uhole vali ina tyipona ame, kafuilepo opo akale omulongwa wange. Tupu una uhole vali unene omona wae womukai ine omona wae womukuendye, kafuilepo opo akale omulongwa wange.” —Mateusi 10:34, 37.

Mahi, ovanthu vamwe ankho mavatambula nawa ovalongwa vae. Sesusi wati: “Una waavela umwe pu ava ovatutu, okopo yomeva na anwe, mokonda yetyi omulongwa wange, ndyimupopila okuti makapewa ondyambi yae.” — Mateusi 10:42.

Nonondonga ombo, nomalondolo, nepameko vapewa na Sesusi, ono apositolu avaende “umbo na umbo, otyo vaivisa onondaka onongwa, nokuhakula ovavei.” — Luka 9:6.