Inikdan nen Jesus iray apostol to na balibalin instruksion no panon iran manpulong ya asanderwa. Balet, aliwan saman labat. Impasakbay to met ya wala ray onsumpa: “Ibaki ta kayon singa saray karnero ed kawalaan na saray lobo . . . Manalwar kayod saray totoo, lapud awiten da kayo diad saray korte, tan siplatan da kayo diad saray sinagoga ra. Tan iyarap da kayod saray gobernador tan arari lapud siak.”​—Mateo 10:16-18.

On, posiblin makaeksperiensya na graben panamasegsegang iray papatumbok nen Jesus, balet pinaseguroan to ra: “Sano iyawat da kayo, agkayo mapaga no panon odino no anto so ibaga yo, ta say ibaga yo et niiter ed sikayo diad satan a bekta; ta aliwan sikayo labat so mansalita, noagta say espiritu na Ama yo so mansalita ed panamegley yo.” Intuloy to: “Iyawat na agi so agi to pian pateyen, tan iyawat na ama so anak to, tan onsumpa iray anak ed saray ateng da tan ipapatey da ra. Tan busolen kayo na amin a totoo lapud ngaran ko, balet samay akapansungdo anggad anggaan et sikatoy nilaban.”​—Mateo 10:19-22.

Lapud importantin maong so panagpulong, indanet nen Jesus a nepeg ya magmaliw iran makabat pian anggapoy makaamper ed sikara diad pankimey da. Inkuan to: “Sano pasegsegangen da kayo diad sakey a syudad, batik kayo ed sananey; lapud ibagak ed sikayoy tua, agyon balot naliber so amin a syudad na Israel anggad isabi na Anak na too.”​—Mateo 10:23.

Talagan mausausar iray instruksion, pasakbay, tan panamaseseg nen Jesus ed saray 12 apostol to! Saratan ya imbaga to et para met ed saray mibiang ed panagpulong ya kimey kayari ipatey tan kioli to. Nanengneng itan ed samay imbaga tod saray disipulo to ya sikaray ‘busolen na amin a totoo,’ aliwa labat ya saramay imbaga ton pulongan da. Niarum ni, anggapoy nabasa tayon saray apostol et inyarap ed saray gobernador tan arari legan na antikey ya impanpulong dad Galilea odino walad sikaray impapatey na saray kapamilya da.

Malinew, say nononoten nen Jesus nen imbaga to iraya et say nagawad arapen. Imanoen ya imbaga tod saray disipulo to ya agda nasumpal so panagpulong da “anggad isabi na Anak na too.” Impaimano to ya agnasumpal na saray disipulo to so pangipulong dad Panarian na Dios antis ya onsabi so niglorian Ari ya si Jesu-Kristo bilang ukom na Dios.

No manpulong ira, agla nepeg ya pankelawan na saray apostol no wala ray onsumpa, ta oniay imbaga nen Jesus: “Say sakey a babangatan et aliwan magmaong nen say managbangat to.” Malinew so labay ya ibaga nen Jesus. Asali toy apairap tan apasegsegang lapud pangipupulong tod  Panarian na Dios, kanian nasali da met. Balet impaseseg to: “Agyo tatakotan iramay mamatey na laman balet agda nayarian a pateyen so kamarerwa; imbes takotan yo imay makayarin maneral ed kamarerwa tan laman diad Gehenna.”​—Mateo 10:24, 28.

Angipanengneng na alimbawa si Jesus ed saya. Makpel ton inanosan so ipapatey imbes ya ikompromisoy katooran to ed sankamakapanyarian, si Jehova. Say Makapanyarin-amin a Dios labat so makayarin maneral ed “kamarerwa” (ilalon bilay ed arapen) na sakey odino mamaoli ed sikato pian panliketay andi-anggaan a bilay. Seguradon apaseseg iray apostol ed satan!

Oniay impangiyilustra nen Jesus ed maaron panangasikaso na Dios ed saray papatumbok to: “Agta say duaran anuyaw et manbili labat na sakey a sinsilyo? Ingen ta anggapo ed saratan so napelag ed dalin ya ag-amta na Ama yo. . . . Kanian agkayo natatakot; mas mabli kayo nen say dakel ya anuyaw.”​—Mateo 10:29, 31.

Say mensahen ipulong na saray disipulo nen Jesus et panlapuay inkaapag-apag na pamilya, lapud wala ray membro na pamilyan mangawat tan wala met iray agmangawat. Impaliwawa nen Jesus: “Agyo iisipen a linma ak dia pian mangiyakar na kareenan diad dalin.” On, kaukolan ya manpakpel so sakey a membro na pamilya ya awatey katuaan a walad Biblia. Oniay naimano nen Jesus: “Siopaman a mas inaro toy ama to odino ina to nen say siak et agmakana ed siak; tan siopaman a mas inaro toy anak ton laki odino bii nen say siak et agmakana ed siak.”​—Mateo 10:34, 37.

Balet, wala met iray mangawat ed saray disipulo to. Inkuan to: “Siopaman a mangiter na anggan sanbason ambetel a danum pian inumen na sakey ed sarayan angkekelag lapud sikatoy sakey a disipulo, ibagak ed sikayoy tua, agton balot nabalang so tumang to.”​—Mateo 10:42.

Lapud saray instruksion, pasakbay, tan panamaseseg nen Jesus, nambiahe ray apostol ed “interon teritorya, a linma rad saray baryo, ya inyaabawag da so maong a balita tan nantatambal irad amin a pasen.”​—Lucas 9:6.