Jesusqa apostolesninta sumajta yachacherqa, iskaymanta iskay willanankutataj nerqa. Niraj willaj rishajtinkutaj, Jesús paykunaman nerqa: “Ovejasta jina, atojkunaj chaupinkuta kachashaykichej [...]. Allinta cuidakuychej, runasqa juzgadosman jaywaykusonqachej, sinagogasninkupitaj jasutʼisonqachej. Noqarayku apasonqachej kamachejkunaman, reyesman ima”, nispa (Mateo 10:16-18).

Arí, Jesuspa yachachisqasnintaqa manchayta qhatiykachananku karqa. Chayrayku Jesusqa nerqa: “Kamachejkunaman apasojtiykichejqa, ama llakikuychejchu imaynatachus parlanaykichejmanta chayri imatachus ninaykichejmanta. Chay ratopacha Dios yuyaychasonqachej imatachus parlanaykichejta. Mana qankunallachu parlankichej, manachayqa Tataykichej atiyninwan yanapasonqachej parlanaykichejpaj. Runaqa hermanonta wañuchichenqa, tatapis wawanta, wawaspis tatasninkoj contranta oqharikonqanku, wañuchichenqankutaj. Qankunaqa sutiyrayku tukuy runaspa chejninan kankichej, pichus tukukuykama sinchʼita sayajrí, chaymá salvasqa kanqa”, nispa (Mateo 10:19-22).

Jesusqa tukuyman Diospa Gobiernonmanta willakunanta munarqa. Chayrayku yachachisqasninman allin yuyayniyoj kanankuta nerqa. Ajinamanta ni imawan jarkʼachikuspa willanallankupajpuni. Jesús nerqa: “Uj llajtapi qhatiykachasunkichej chayqa, waj llajtamanñataj ayqeychej. Cheqatapuni niykichej: Manaraj Israelpa tukuy llajtasninpi willayta tukushajtiykichej, noqaqa chayamusajña”, nispa (Mateo 10:23).

Jesusqa 12 apostolesninman imatachus ruwanankuta yuyaycharqa, kallpacharqa ima. Jinapis mana apostolesllachu qhatiykachasqa, chejnisqa ima kananku karqa. Manachayqa Diosmanta tukuy willajkuna chejnisqa kananku karqa. Jesús nerqa: “Tukuy runaspa chejninan kankichej”, nispa. Jinapis Jesuspa yachachisqasnenqa, jaqay tiempopi mana chejnisqachu karqanku. Chantapis Bibliapeqa mana ninchu apóstoles Galileapi willashaspa kamachejkunajpa, reyespa ñaupaqenkuman apasqa kasqankuta. Nillataj ninchu, paykunataqa familianku wañuchisqa kanankupaj enemigosninkuman jaywaykusqankuta.

Jesusqa yachachisqasnin chejnisqa kanankuta nispa, aswan qhepaman willajkunamanta, kay tiempopi willajkunamantawan parlasharqa. Chantá Jesusqa nerqa, kay mundota juzgaj kutimunan tiempokamaqa, ‘mana tukuy llajtaspichu’ Diospa Gobiernonmanta willakunanta.

 Jesuspa apostolesnenqa churanakuy kajtin mana mancharikunankuchu karqa. Jesusqa paykunaman nerqaña: “Yachakojqa mana yachachejninmanta aswan kurajchu, nillataj kamachipis patronninmanta aswan kurajchu”, nispa. Jesustaqa Diospa Gobiernonmanta willasqanrayku chejnikorqanku, qhatiykacharqankutaj. Yachachisqasnintapis kikillantataj ruwananku karqa. Chayrayku nerqa: “Qankunata wañuchiyta atejkunataqa ama manchachikuychejchu, mana paykunamantachu kashan qhepaman kausarimunaykichejqa. Astawanpis pichus Hinón Wayqʼopi qankunata chinkachiyta atin, chayta manchachikuychej”, nispa (Mateo 10:24, 28).

Apostolesqa chayta uyarispa may kallpachasqachá kasharqanku. Noqanchejpis Tukuy Atiyniyoj Diosllata manchachikuna. Imajtinchus paylla wiñaypaj “chinkachiyta” atiwanchej. Chantapis paylla wiñaypaj kausakunapaj kausarichiyta atiwanchej. Chayrayku Jesusqa Jehová Diosllata manchachikorqa. Wañunan kajtinpis Diosta kasukullarqapuni. Noqanchejpis pay jina ruwayta atinchej.

Chantá Jesusqa Jehová Diosninchej sumajta cuidawasqanchejmanta nerqa: “Iskay pʼisqetustaqa pisi valorniyoj qolqellapi vendenku, ¿icharí? Chaywanpis ni uj pʼisqetullapis pampaman urmanchu mana Tataykichejpa yachanantaqa. [...] Chayrayku ama manchachikuychejchu, qankunaqa ashkha pʼisqetusmantapis astawanraj valenkichej”, nispa (Mateo 10:29, 31).

Jesús nillarqataj: “Ama yuyaychejchu kay jallpʼaman allin kausayta apamoj jamusqayta”, nispa. Chayta nispaqa Diospa Gobiernonmanta sumaj willaykuna wakin familiasta tʼaqanachinanta nisharqa. Imajtinchus mana tukuychu chay willayta japʼikunanku karqa. Chayrayku Diosta sirviyta munajkunaqa, mana manchachikojkuna kananku karqa. Jesustaj nerqa: “Tatanta chayri mamanta noqamanta astawan munakojqa, mana noqaypata kananpaj jinachu. Qhari wawanta chayri warmi wawanta noqamanta astawan munakojpis, manallataj noqaypata kananpaj jinachu”, nispa (Mateo 10:34, 37).

Wakin runastajrí Jesuspa yachachisqasninpa willasqankuta tukuy sonqo japʼikunanku karqa. Chayrayku Jesús nerqa: “Pillapis kay juchʼuykunamanta ujninman, yachachisqay kasqanrayku uj vaso yakullatapis jaywarejqa, cheqatapuni niykichej, tʼinkantaqa japʼenqapuni”, nispa (Mateo 10:42).

Jesusqa yachachisqasninta yachacherqa, yuyaycharqa, kallpacharqataj. Ajinamanta paykunaqa willamunankupaj wakichisqa kasharqanku. Chantá “ranchomanta rancho rerqanku, tukuynejpi sumaj willaykunata willaspa, onqosqastapis sanoyachispa” (Lucas 9:6).