Jesusqa apostolninkunatam Diosmanta imayna willakunankupaq sumaqta yacharachirqa, hinaspam iska-iskayta willakamunankupaq kacharqa. Hinaspapas kuyakuywanmi wakin runaqa mana uyarinankumanta nirqa: “Kachachkaykichikqa atuqkunapa chawpinman ovejakunata kachachkaq hinam. [...] Runakunamantayá cuidakuychik, paykunaqa juzgadomanmi apasunkichik hinaspam yupaychana wasikunapi azotesunkichik. Arí, ñuqaraykum autoridadkunaman hinaspa kamachiqkunaman pusasunkichik”, nispa (Mateo 10:16-18).

Chaywanqa qatiqninkuna chiqnisqa hinaspa qatikachasqa kanankumantam nichkarqa, hinaspam kallpanchaspan nirqa: “Entregaykusuptikichikqa amayá llakikuychikchu imaynata utaq imamanta rimanaykichikmantapas, chaypunillam yachachisqa kankichik imam rimanaykichikpaqqa. Manam kikillaykichikmantachu rimankichikqa, aswanqa hanaq pacha taytaykichikpa atiyninwanmi”, nispa. Nirqaraqmi: “Wawqillanmi entregaykunqa wawqinta wañuchinankupaq, taytapas churinta wañuchinanpaq, wawa-churikunapas tayta-mamankupa contranpi hatarispankum paykunata entregaykunqaku wañuchinankupaq. Qamkunaqa sutiyraykum llapallan runakunapa chiqnisqan kankichik, ichaqa tukupaykama takyaqmi salvasqaqa kanqa”, nispa (Mateo 10:19-22).

Diosmanta willakuyqa imamantapas aswan allin kasqanraykum Jesusqa qatiqninkunata nirqa allin yuyaywan willakunankupaq, chaynapi mana pipas sasachananpaq. Nirqam: “Huk llaqtapi ñakarichisuptikichikqa huk law llaqtamanyá ayqikuychik, chiqaptapunim nikichik: Israel nacionpa llaqtankunapi hinaspa llaqtachankunapipas willakuyta manaraq tukuchkaptikichikmi runapa churinqa chayamunqa”, nispa (Mateo 10:23).

Jesuspa chayna yachachisqanqa hinaspa kallpanchasqanqa ancha allinmi karqa 12 apostolninkunapaqqa. Ichaqa Jesuspa wañukusqan qipamanpas Diosmanta haykam willakuqkunaqa qatikachasqam kananku karqa. ¿Imaynatam chayta yachanchik? Jesusmi nirqa qatiqninkunaqa “llapallan runakunapa” chiqnisqan kanankumanta, ichaqa manam apostolninkunaqa chiqnisqachu karqaku Galilea lawman kachasqa kaspankuqa. Chay kutipiqa manataqmi autoridadkunapa kasqanmanqa pusasqachu karqaku, nitaqmi wañuchisqa kanankupaqqa ayllunkupas pusarqakuchu. Chaytam Jesusmanta qillqaqkunapas qillqasqankupi qawachinku.

Chaymi ninchik Jesuspa nisqanqa hamuq punchawpaqpas kasqanmanta. “Manaraq tukuchkaptikichikmi  runapa churinqa chayamunqa” nispanqa, juzgananpaq Jesus hamunankama Diosmanta willakuy manaraq tukunanmantam rimachkarqa.

Chaymantapas Jesusqa nirqam: “Yachachisqa runaqa manam aswan maschu yachachiqninmantaqa nitaq sirvientepas patronninmantaqa”, nispa. Imaynam Jesuspas Diosmanta willakusqanrayku ñakarichisqa hinaspa chiqnisqa karqa, chaynam apostolninkunapas kananku karqa, chaytaqa allintam yacharqaku. Jesusqa nirqataqmi: “Amayá manchakuychikchu cuerpoykichik wañuchiqtaqa, paykunaqa manam vidaykichiktaqa qichusunkichikmanchu, aswanqa manchakuychikyá vidaykichiktawan cuerpoykichikta gehena nisqapi chinkarachiqta”, nispa (Mateo 10:24, 28).

Jesusqa mana manchakuq kaspa hinaspa imaña-haykaña kaptinpas tukuy atiyniyuq Jehova Diosman sunqu kaspam qatipakunapaq hina karqa. Jehova Diosllam runataqa qalaypaq chinkarachinman utaq kawsarichispan wiñay kawsaytapas qunman. ¡Maynatach chayqa apostolkunataqa kusichirqa!

Jehova Diosqa anchatam apostolkunataqa kuyarqa. Chaymi Jesuspas nirqa: “¿Manachu iskay pichinkuchakunatapas mana ancha valorniyuq qullqichallapaq rantikunku? Chayna kaptinpas, manam mayqinpas pampamanqa tiyaykunchu hanaq pacha taytaykichikpa mana yachasqanqa. Chaynaqa amayá manchakuychikchu, qamkunaqa achka pichinkuchakunamantapas aswan valeqmi kankichik”, nispa (Mateo 10:29, 31).

Jesusqa nirqataqmi Diosmanta willakuyqa ayllukunata rakinachinanmanta. Wakinmi uyarinanku karqa wakinñataqmi mana, chaymi Jesus nirqa: “Ama piensaychikchu kay pachapi hawkayay kananpaq hamusqaytaqa”, nispa. Jehova Diosta yupaychanapaqqa anchatam kallpanchakuna, aswanraqmi ayllunchik Diospi mana iñiq kaptinkuqa. Chaymi Jesusqa nirqaraq: “Pipas tayta-mamanta ñuqamanta aswan kuyaqqa manam qatiqniyqa kanmanchu, wawa-churinta ñuqamanta aswan kuyaqpas manataqmi qatiqniyqa kanmanchu”, nispa (Mateo 10:34, 37).

Chaywanpas wakin runakunaqa apostolninkunapa willakusqankutam uyarinanku karqa. Chaymi Jesuspas nirqa: “Qatiqniy kasqanrayku pipas kay uchuychakunamanta hukninman, vasopi chiri yakuchallatapas haywaykuqqa chaskinqapunim premionta”, nispa (Mateo 10:42).

Jesusqa allintam apostolninkunataqa yachaykachirqa, hinaspapas sumaqtam kallpanchaykurqa, apostolninkunañataqmi allin yachachisqaña kaspanku achka llaqtachakunapi “purirqaku sumaq willakuyta willakustin hinaspa unquqkunata tukuy lawpi sanoyachistin” (Lucas 9:6).