A o galulue taʻitoʻalua aposetolo o Iesu, ua ia avatu iā i latou ni faatonuga talafeagai i le auala e talaʻi atu ai. Ua ia lapataʻi atu foʻi ma le agalelei iā i latou, e faatatau i tagata e tetee ane i le feʻau e faapea: ʻFaauta! Ua ou aauina atu outou e pei o mamoe i le lotolotoi o luko. Ia outou faaeteete i tagata; auā o le a latou tuuina atu outou i faamasinoga maulalo, ma fasi faamoʻamoʻa outou i o latou sunako. O le a molia foʻi outou i luma o kovana ma tupu ona o aʻu.’—Mataio 10:16-18.

Ioe, e ono feagai soo o Iesu ma sauāga ogaoga. Peitaʻi ua ia faamautinoa atu iā i latou e faapea: “Afai latou te molia outou, aua tou te popole pe faapefea ma po o ā foʻi upu tou te tautatala atu ai; auā o le a tuuina atu i lenā lava taimi upu tou te tautatala atu ai. Auā e lē na o outou o tautatala atu, a o le agaga o lo outou Tamā lea ua mafai ona outou tautatala atu ai. O le a tuuina atu e le uso lona uso ia oti, o le a faia foʻi faapea e le tamā i se tasi o lana fanau, o le a tetee atu foʻi le fanau i mātua ma tuuina atu mātua ina ia fasiotia. O le a inosia foʻi outou e tagata uma ona o loʻu igoa; a o lē e tumau seʻia oo i le iʻuga, e faaolaina o ia.”—Mataio 10:19-22.

O le galuega talaʻi o se galuega e sili ona tāua. O le māfuaaga lea ua faamamafa atu ai e Iesu i ona soo le tāua o le faaalia o le faautauta, ina ia maua ai pea le saʻolotoga e faia ai lenei galuega. Ua fetalai atu o ia iā i latou: “Pe a latou faasauā iā te outou i se tasi aai, ia outou sosola atu i le isi aai. E moni, ou te fai atu iā te outou, e lē soo aai o Isaraelu iā te outou seʻia taunuu le Atalii o le tagata.”—Mataio 10:23.

Maʻeu le tāua o nei faatonuga, lapataʻiga, ma faalaeiauga ua tuuina atu e Iesu i ona aposetolo e toʻa 12. Peitaʻi, e iai foʻi se faatatauga o nei upu iā i latou o le a faia le galuega talaʻi, pe a mavae le maliu o Iesu ma lona toetū. Ua faamaonia lea manatu i lona faapea atu o le a ʻinosia ona soo e tagata uma,’ ae e lē na o ē o loo talaʻi atu i ai le ʻauaposetolo. E lē o iai foʻi se faamatalaga e faapea, ua molia le ʻauaposetolo i luma o kovana ma tupu i le taimi puupuu lea e faia ai le talaʻiga i Kalilaia, pe tuuina atu foʻi i latou e o latou aiga ina ia fasiotia.

O le mea moni, o loo mafaufau Iesu i le lumanaʻi a o ia fetalai atu i nei upu i ona aposetolo. Seʻi manatu i lana fetalaiga e faapea, e lē soo aai i le talaʻiga a ona soo “seʻia taunuu le Atalii o le tagata.” O lona uiga, e lē mafai ona faamāeʻa e soo o Iesu le galuega talaʻi e faatatau i le Malo o le Atua, a o leʻi afio mai le Tupu faamamaluina o Iesu Keriso e fai ma faamasino a le Atua.

E tatau ona faatalitalia e le ʻauaposetolo e latou te fesagaʻia teteega a o auai i le galuega talaʻi, auā ua fetalai Iesu: “E lē sili le soo i lona faiaʻoga, e lē sili foʻi le pologa i lona alii.” E manino lava le fetalaiga a Iesu. E faileagaina ma sauāina o ia ona o le talaʻia o le Malo o le Atua. O le tulaga foʻi lenā e oo i ona aposetolo. Peitaʻi, ua augani atu Iesu iā i latou: “Aua tou te matataʻu i ē e fasiotia le tino, ae e lē mafai ona faaumatia le ola. Ae ia matataʻu i lē e mafai ona faaumatia le ola atoa ma le tino i Kena.”—Mataio 10:24, 28.

Ua faataatia e Iesu se faaaʻoaʻoga lelei i lenei vala. Sa lototele o ia ma tumau seʻia oo i le oti, nai lo o le lē faamaoni iā Ieova. E mafai e Ieova o Lē e ona le malosi uma lava, ona faaumatia le “ola” o le tagata (lona faamoemoe mo le lumanaʻi), pe toe faatūina foʻi o ia mai i le oti ina ia maua le ola e faavavau. Maʻeu le faamāfanafanaloto o lenei mea mo le ʻauaposetolo!

Ua faataʻitaʻia nei e Iesu le tausiga alofa a le Atua i lenei auala: ʻPo ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā. O lea la, aua neʻi outou fefefe: E sili atu ona tāua outou nai lo o tamaʻi manulele e tele.’—Mataio 10:29, 31.

O le feʻau o loo talaʻia atu e soo o Iesu o le a fevaevaeaʻi ai aiga. Atonu e talia e nisi ae e lē taliaina e nisi. Ua fetalai atu Iesu: “Aua tou te manatu ua ou sau e avatu le filemu i le lalolagi.” Ioe, e manaʻomia e se tasi o le aiga le lototele ina ia taliaina ai le upu moni o le Tusi Paia. Ua faaauau le fetalaiga a Iesu: “O lē ua sili lona alofa i lona tamā po o lona tinā nai lo o aʻu, e lē aogā o ia iā te aʻu. O lē ua sili foʻi lona alofa i lona atalii po o lona afafine nai lo o aʻu, e lē aogā foʻi o ia iā te aʻu.”—Mataio 10:34, 37.

Peitaʻi, e iai lava i latou e talileleia soo o Iesu. Ua fetalai o ia: “O sē e avatu se ipu vai mālūlū e inu ai se tasi o ē itiiti, ona o ia o le soo, e moni ou te fai atu iā te outou, e maua lava lona taui.”—Mataio 10:42.

Ua lava tapena nei aposetolo o Iesu ona o faatonuga, lapataʻiga ma faalaeiauga ua tuuina atu iā i latou. O lea, ua latou ō atu ai loa “i le oganuu atoa, mai i lea nuu i lea nuu, ua folafola atu le tala lelei ma faia faamālōlōga i nuu uma.”—Luka 9:6.