Yeso ambosha apɔstɔlɔ ande alako w’eshika lo woho wakawahombe nkamba olimu awɔ w’esambishelo oko wakawatatshɔka ahende ahende. Koko nde kokomɛ laasɔ. La ngandji tshɛ, nde akaahɛmɔla lo dikambo di’atunyi awɔ ate: “Nyolonge, lambonyotoma oko ɛkɔkɔ l’atei wa ndjaondo. . . . Nyonge la yewo, nɛ dia anto wayonyokimɔ lo tominadi ta lo ngelo ndo wayonyɔkɔmɔla lo toshinangɔnga tawɔ. Wayonyɔtɔla la ntondo ka waa nguvɛrnɛrɛ ndo ka nkumi ya dikanga l’ɔtɛ ami.”​—Mateo 10:16-18.

Eelo, ambeki wa Yeso wakahombe pomana l’ɛhɛnyɔhɛnyɔ wa wolo, koko nde akaalake l’eshikikelo tshɛ ate: “Lam’ayowonyɔtɔla, tanyoyakiyanyake dia woho wayonyɔtɛkɛta kana kɛnɛ kayonyota, nɛ dia wayonyotɛ kɛnɛ kayonyɔtɛkɛta ko wonya akɔ; dikambo aha nyuamɛ mbayɔtɛkɛta, koko nyuma ka Shɛnyu mbayɔtɛkɛta lo tshimbo yanyu.” Yeso akatetemala mbuta ate: “Onto ayokimɔ ɔnango dia nde ndjakema, ombutshi wa pami ayokimɔ ɔnande, ana wayɔtɔmbɔkwɛ ambutshi ndo wayowadiakisha. Ndo anto tshɛ wayonyohetsha l’ɔtɛ wa lokombo lami, koko onto layokikɛ polo l’ekomelo mbayoshimbamɛ.”​—Mateo 10:19-22.

Lam’ele esambishelo ekɔ dui di’oleki tshɛ ohomba, Yeso akadje dikako vɔlɛ l’ohomba wa ambeki ande monga la yewo dia vɔ ntetetemala monga la lotshungɔ la nkamba olimu ɔsɔ. Nde akate ate: “Naka wambonyɔhɛnyahɛnya l’osomba ɔmɔtshi, kanyolawɔ otsha l’osomba okina. Nɛ dia lo mɛtɛ kanyotɛmi nte, la ntondo ka nyu nshidiya nkindjakindja lo esomba wa lo Isariyɛlɛ, Ɔna onto ayoya.”​—Mateo 10:23.

Ande alako wa diambo, ɛhɛmwɛlɔ ndo ekeketshelo kakasha Yeso apɔstɔlɔ ande 12 lee! Koko wɛ koka mɛna dia ɛtɛkɛta ɛsɔ wakendanaka ndo la wanɛ wayoyokamba olimu w’esambishelo l’ɔkɔngɔ wa nyɔi ndo elwelo ka Yeso. Dui sɔ mɛnamaka lo kɛnɛ kakandatɛ ambeki ande ate “anto tshɛ wayonyohetsha,” aha tsho anto wakandatome apɔstɔlɔ dia towasambisha. Ndo nto, ndooko lɛnɛ adiaso dia apɔstɔlɔ wakatɔlama la ntondo ka nguvɛrnɛrɛ ndo ka nkumi ya dikanga lo tshanda ya tshitshɛ yakawasambisha la Ngalileya kana wakadiakema oma le ase nkumbo yawɔ.

Mbokɛmaka hwe dia nde akakanyiyaka dia nshi yayaye etena kakandatɛka apɔstɔlɔ ande akambo asɔ. Todje yimba lo etelo k’ɔnɛ ambeki ande hawotoshidiya nkindjakindja la nsambisha, “Ɔna onto ayoya.” Yeso akɛnyaka dia ambeki ande hawotoshidiya nsambisha akambo wendana la Diolelo dia Nzambi la ntondo ka Nkumekanga Yeso Kristo lambotombɔma ndja oko shushi ya Nzambi.

 Etena kakawakambaka olimu w’esambishelo, apɔstɔlɔ takawahombe mamba dia pomana l’ɔlɔshamelo nɛ dia Yeso akate ate: “Ombeki haleki ombetsha ande ndo mfumbe haleki nkumɛnde.” Kɛnɛ kakate Yeso mbokɛmaka hwe. Nde akasoyama ndo akahɛnyahɛnyama lo nsambisha Diolelo diaki Nzambi ndo kɛsɔ mbayokomɛ ambeki ande. Koko Yeso akate ate: “Tanyokake wanɛ wadiaka demba ko hawokoke ndjaka anima wɔma, koko nyoke ɔnɛ lakoka ndanya ndo anima ndo demba lo Ngɛhɛna wɔma.”​—Mateo 10:24, 28.

Lo dikambo sɔ, Yeso akatotshikɛ ɛnyɛlɔ. Nde akakikɛ la dihonga tshɛ polo ndo lo nyɔi lo dihole dia shisha kɔlamelo yande le ɔnɛ lele la wolo tshɛ, mbuta ate Jehowa. Nde ekɔ Kanga-Wolo-Tshɛ lakoka ndanya “anima” w’onto (elongamelo kande ka lo nshi yayaye ka lɔsɛnɔ) kana ɔnɛ lakoka mbowolola dia nde ndjɔsɛna lɔsɛnɔ la pondjo. Ɔsɔ mɛtɛ aki ɛtɛkɛta w’ekeketshelo le apɔstɔlɔ!

Yeso akɛnya woho wayakiyanya Nzambi la ngandji tshɛ dikambo di’ambeki ande lo mbuta ate: “Onde hawotosondjaka sɔlɛ 2 la okenga wa lofalanga 1 wele la nɛmɔ dia tshitshɛ? Koko ndooko 1 l’atei adiɔ lakoka nkɔ la nkɛtɛ aha la Shɛnyu lele l’olongo mbeya. . . . Ɔnkɔnɛ, tanyokake wɔma, nyu ndeka leemba la sɔlɛ nɛmɔ.”​—Mateo 10:29, 31.

Losango lasambisha ambeki wa Yeso layokakitola ase nkumbo, amɔtshi wayolietawɔ koko akina wayolitona. Yeso akalembetshiya ate: “Tanyɔfɔnyake dia dimi lakaye dia ndjodja wɔladi la nkɛtɛ.” Eelo, nɔmbamaka dia ose nkumbo ɔmɔtshi monga la dihonga dia mbetawɔ akambo wa mɛtɛ wa lo Bible. Yeso akate ate: “Onto tshɛ loka she kana nyango ngandji koleki kɛnɛ kambokande hasungana le mi, ndo onto tshɛ loka ɔnande la pami kana la womoto ngandji koleki kɛnɛ kambokande hasungana le mi.”​—Mateo 10:34, 37.

Eelo, anto amɔtshi wayolongola ambeki ande dimɛna. Nde akate ate: “Onto tshɛ lasha 1 ɔmɔtshi l’atei w’anto wa totshitshɛ anɛ kaanga dikɔhɔ di’ashi wa tshitshi nɛ dia nde ekɔ ombeki ami, lo mɛtɛ kanyotɛmi nte: Lo weho akɔ tshɛ, nde hatoshisha difuto diande.”​—Mateo 10:42.

Lam’ele Yeso akawasha alako, ɛhɛmwɛlɔ ndo ekeketshelo, apɔstɔlɔ wakatshu “l’ɛtshi ka nkɛtɛ k’otondo, watasambisha lokumu l’ɔlɔlɔ lo ngelo la ngelo ndo watakɔnɔla anto waki la hemɔ l’ahole tshɛ.”​—Luka 9:6.