Akutumika aku Yesu achiluta kuchipharazga ŵaŵiŵaŵi, Yesu wanguŵapaska ulongozgi wamampha ukongwa wa mo angapharazgiya. Iyu wanguŵapaska ulongozgi pe cha kweni wanguŵatcheŵeska so kuti amukumana ndi ŵanthu akususka. Iyu wanguti: “Awonani! Nditikutumani nge mbereri pakati pa mphumphi . . . Tcheŵani ndi ŵanthu, chifukwa azakukuperekani kumakhoti ndipuso azakukukwechuwani mumasinagogi ngawu. Azakukutoliyani kwa ŵaraŵara a boma ndi mafumu chifukwa chaku ini.”​—Mateyu 10:16-18.

Chinanga kuti akusambira aku Yesu atingi atombozgekengi kweni iyu wanguŵalayizga kuti: “Asani azikuperekani, mungazifipanga mtima cha kuti mukambengi wuli pamwenga mukambengenji chifukwa mwazamupaskika pa nyengu yeniyo vakuti mukambi; pakuti mwazamulongoro pakumwija cha kweni mzimu wa Awusemwi ndiwu wazamulongoro kuporote mwaku yimwi.” Yesu wangulutirizga kukamba kuti: “Munthu wazamupereka mubali waki kuti wabayiki, wisi wazamupereka mwana waki ndipuso ŵana azamuyukiya apapi ŵawu ndi kuŵabayisa. Ndipu ŵanthu wosi azakukutinkhani chifukwa cha zina langu, kweni yo wazamukunthiyapu mpaka pakumaliya ndiyu wazamutaskika.”—Mateyu 10:19-22.

Chifukwa chakuti ntchitu yakupharazga njakukhumbika ukongwa, Yesu wangukambiya akusambira ŵaki kuti akhumbikanga kuchita vinthu mwazeru kuti alutirizgi kugwira umampha ntchitu yeniyi. Iyu wanguti: “Asani ŵanthu atikutombozgani mutawuni yinyaki, thaŵiyani mu yinyaki, chifukwa nditikuneneskiyani, mwechendamalizi kwenda mumatawuni ngosi nga Isirayeli, Mwana wa munthu wazengi.”​—Mateyu 10:23.

Yesu wangutcheŵeska akutumika ŵaki 12 ndipuso wanguŵachiska ndi kuŵapaska ulongozgi wamampha ukongwa. Mungawona kuti vo Yesu wangukamba vinguwovya weyosi yo watingi wagwirengeku ntchitu yakupharazga Yesu wati wafwa kweniso wati wayuskika. Tikamba viyo chifukwa Yesu wangukamba kuti akusambira ŵaki azamutinkhika ndi ŵanthu wo anguluta kuchiŵapharazgiya pe cha, kweni ‘azamutinkhika ndi ŵanthu wosi.’ Kusazgapu pa fundu yeniyi, tikuŵerengapu cha kuti pa nyengu yo akutumika aku Yesu apharazganga ku Galileya, angutoleke kwa ŵaraŵara aboma ndi mafumu pamwenga kuperekeka kuti abayiki ndi ŵanthu a mubanja lawu.

Mwambula kukayika, Yesu wachikambiya akutumika ŵaki venivi, waŵanaŵaniyanga vo vatingi vichitikengi kunthazi. Ŵanaŵaniyani fundu yo iyu wangukamba yakuti akusambira ŵaki azamumaliza cha ntchitu yakupharazga mpaka po ‘Mwana wa munthu waziyengi.’ Yapa, Yesu wangulongo kuti akusambira ŵaki ŵechendamalizi kugwira ntchitu yakupharazga Ufumu waku Chiuta, Yesu Khristu yo ndi Fumu yakukwezeka wazamukuza nge wakuyeruzga waku Chiuta.

Akutumika achigwira ntchitu yakupharazga akhumbikanga cha kuzizwa asani ŵanthu atiŵasuska. Ve viyo chifukwa Yesu wangukamba kuti: “Wakusambira  waluska msambizi waki cha, ndipu kapolu waluska mbuyaki cha.” Fundu yeniyi yilongole limu kuti akutumika ŵaki nawu atingi atombozgekengi kweniso kususkika chifukwa Yesu wachipharazga wakumananga ndi masuzgu ngenanga. Kweni Yesu wanguŵakambiya kuti: “Mungaŵawopanga cha wo abaya liŵavu kweni angabaya cha umoyu; mumalu mwaki, muwopengi yo wangananga umoyu ndi liŵavu viyo mu Gehena.”—Mateyu 10:24, 28.

Yesu wangulongo chakuwoniyapu chamampha ukongwa pa nkhani yeniyi. Iyu wangukunthiyapu mpaka po wangufwiya ndipu wangulekapu cha kuja wakugomezgeka kwaku Yehova yo we ndi nthazi zosi. Yehova ndi Chiuta Wanthazizosi yo wangananga “umoyu” wamunthu (kung’anamuwa chilindizga chaki chakuzija ndi umoyu kunthazi) pamwenga kumuyuska kuti waje ndi umoyu wamuyaya. Mazu ngenanga nganguŵachiska ukongwa akutumika.

Yesu wangukamba ntharika yakulongo kuti Chiuta watiŵayanja ukongwa ateŵeti ŵaki. Iyu wanguti: “Asi mpheta ziŵi zigulisika kandalama kamana ukongwa? Kweni palivi yo yituwa pasi kwambula Awusemwi kuziŵa. . . . Mwaviyo, mungawopanga cha; mwe akuzirwa ukongwa kuluska mpheta zinandi.”—Mateyu 10:29, 31.

Uthenga wo akusambira aku Yesu apharazganga wachitisanga kuti ŵanthu a mu mabanja nganyaki agaŵikani. Ve viyo chifukwa anyaki avwisiyanga penipo anyaki cha. Yesu wangukamba kuti: “Mungaŵanaŵananga cha kuti ndikuziya kuzipereka chimangu pacharu chapasi.” Venivi vilongo kuti munthu weyosi wakhumbika kuchita chiganga kuti wakoleski uneneska wa m’Bayibolu. Yesu wangukamba so kuti: “Weyosi yo watanja ukongwa awisi pamwenga anyina kuluska ini, ngwakwenere ini cha; ndipu weyosi yo watanja ukongwa mwana waki munthulumi pamwenga mwana waki munthukazi kuluska ini, ngwakwenere ini cha.”—Mateyu 10:34, 37.

Yesu wangulongo kuti ŵanthu anyaki azamuvwisiya uthenga wo akusambira ŵaki apharazganga. Iyu wangukamba kuti: “Weyosi yo wapaska yumoza mwa ŵana yaŵa chinanga ndi kapu yimoza ya maji ngakumwa chifukwa chakuti ngwakusambira wangu, nditikuneneskiyani kuti wazakuyitaya cha mphotu yaki.”—Mateyu 10:42.

Yesu wati waŵapaska ulongozgi, kuŵatcheŵeska kweniso kuŵachiska, akutumika “angusoka ndi kuluta muchigaŵa chosi, muzi ndi muzi kupharazga uthenga wamampha ndipuso kuchizga ŵanthu kwekosi.”—Luka 9:6.