Jesús kamapitsi xʼapóstoles chu lichatiyun kamalakgacha, chu kawani la nalichuwinankgo Dios. Pero ni kajwatiya uma. Xlakata kapaxki, kawani pi makgapitsi latamanin ni katilakgatikgolh xtaskujutkan. Kawani: «¡Kaʼakxilhtit! Kkamalakgachaman chuna la borregos kxlakgstipan lobos [...]. Kuentajkatlawatit, xlakata latamanin nakamakamastakgoyan kxlakatin jueces, chu nakakgesnokgkanatit ksinagogas. Chu nakalipinkanatit kxlakatinkan gobernadores chu mapakgsinanin kaj kimpalakata» (Mateo 10:16-18).

Chuna, xtamakgalhtawakgen Jesús xlikatsitkan pi nakaputsastalanikan. Pero Jesús kawani tuku tlan kamamakgkatsini: «Akxni nakamakamastakanatit, ni kalilakgaputsatit chuna la nachuwinanatit o tuku nawanatit, xlakata ama hora nakamakatsinikanatit tuku nawanatit; xlakata ni kajwatiya wixin nachuwinanatit, wata wa xʼespíritu minTlatkan nakapalakachuwinanan». Chu kawanipara: «Nachuna, linatalan nalamakamastakgo klinin, chu xatlat namakamasta xkgawasa, chu kamanan nalakatakikgo xnatlatnikan chu natlawakgo pi nakamakgnikan. Chu putum latamanin ni katikaʼakxilhputunkgon kaj xlakata kintukuwani, pero tiku natayani asta akxni namin lisputni nalakgtaxtu» (Mateo 10:19-22).

Xlakata lichuwinankan Dios akgtum lu xlakaskinka taskujut, Jesús kawani xtamakgalhtawakgen pi skgalala xliwanatkan xlakata chuntiyaku natlawakgo uma taskujut. Kamaxki uma tastakyaw: «Akxni nakaputsastalanikanatit kʼakgtum lanka kachikin, katsalatit kʼatanu, xlikana kkawaniyan pi xKgawasa chixku nachin, akxni nina lakgatsalakgoyatit nawan putum xkachikinin Israel» (Mateo 10:23).

¡Lu xʼama kamakgtaya tuku Jesús kawani pi xlitlawatkan 12 apóstoles, tastakyaw chu tamaʼakgpuwantin nema kamaxki! Pero uma tachuwin na kalakgchan tiku nalichuwinankgo Dios alistalh, akxni ninita chu malakastakwanikanita nawan Jesús. ¿La katsiyaw uma? Kaʼakxilhti pi Jesús wan pi «putum latamanin» xʼamakgo kasitsinikgo xtamakgalhtawakgen, pero uma kilhtamaku, apóstoles nichuna titaxtumakgo. Evangelios na ni wankgo pi kalinka kxlakatin gobernadores chu mapakgsinanin akxni xlichuwinamakgo Dios kʼGalilea. Na ni lichuwinankgo pi xfamiliajkan xkamakamastakgolh xlakata xkamakgnika.

Wa xlakata, liwana katsiyaw pi Jesús lichuwinama tuku nala kilhtamaku nema aku mima. Akxni wan pi «xKgawasa chixku nachin» akxni xtamakgalhtawakgen nina lakgatsalakgonita nawan putum kachikinin, kawaniputun pi akxni nachin Mapakgsina Jesucristo la chatum Juez, xlakan katsankganijku nawan nalichuwinankgo xTamapakgsin Dios.

 Apóstoles ni kaks xlilakawanatkan pi latamanin ni nalakgatikgo pi xlakan nalichuwinankgo Dios, xlakata Jesús kawani pi «chatum tamakgalhtawakgen ni tlakg tlan katilikatsinika nixawa xmakgalhtawakgena, chu chatum skujni ni tlakg tlan katilikatsinika nixawa xmalana». Uma liwana taʼakgatekgsa: xla nitlan likatsinimaka chu putsastalanimaka xlakata lichuwinama xTamapakgsin Dios, chu xtamakgalhtawakgen nachuna natitaxtukgo. Pero kawani: «Ni kakapekuanitit tiku makgnikgo makni pero nila malakgsputukgo latamat; wata kapekuanitit tiku tlan malakgsputu latamat chu makni anta kʼGehena» (Mateo 10:24, 28).

Jesús kinkawilinin akgtum tlan liʼakxilhtit. Xla ni pekualh chu asta kkalinin ni makgxtakgli Jehová, tiku kgalhi xliputum litliwakga. Kaj wa Dios tiku kgalhi xliputum litliwakga tlan masputu chatum lataman, wamputun pi ni katimaxkilh takgalhkgalhin nalatama alistalh. Chu kajwatiya xla tlan namalakastakwani chatum lataman chu namaxki latamat nema ni kgalhi xlisputni. ¡Umakgolh tachuwin lu tlan kamamakgkatsini xtamakgalhtawakgen!

Alistalh, Jesús kawani la xlilakaskinka kaʼakxilha Dios: «Tantiy laktsu tsiktsi kalistakan okgxtum tumin nema ni lhuwa xtapalh, ¿ni xlikana? Pero minTlatkan xalak akgapun katsi asta akxni tantum xanin tamayacha kkatiyatni». Chu wampara: «Wa xlakata ni kapekuantit; wixin tlakg xtapalh litaxtuyatit nixawa lhuwa laktsu tsiktsi» (Mateo 10:29, 31).

Jesús na kawani pi uma tamakatsin nakamapapitsi familia, xlakata makgapitsi namakgamakglhtinankgo pero amakgapitsi ni, chu kawani: «Ni kalakpuwantit pi kmilh wili takaksni kkatiyatni». Xlikana, lu talakaskin ni napekuanaw xlakata namakgamakglhtinanaw tuku masiya Biblia maski amakgapitsin xalak kifamiliajkan ni nalakgatikgo. Jesús kamaxki tastakyaw: «Putum tiku tlakg paxki xtlat o xtse nixawa akit, ni minini nakistalani; chu putum tiku tlakg paxki xkgawasa o xtsumat nixawa akit, ni minini nakistalani» (Mateo 10:34, 37).

Maski chuna, makgapitsi latamanin tlan nakalikatsinikgo tamakgalhtawakgen. Jesús wan: «tiku natawa xaskgawiwi chuchut chatum umakgolh tiku ni xlakaskinka litaxtukgo, xlakata kintamakgalhtawakgen, ni katimakgatsankgalh xtasikulunalin» (Mateo 10:42).

Xlakata Jesús kawani tuku xlitlawatkan, tuku natitaxtukgo chu tuku kamaʼakgpuwantini, apóstoles tlan nalichuwinankgo Dios. Wa xlakata ankgo «klaktsu kachikinin», lichuwinantilhakgo xatlan tamakatsin chu mapaksanantilhakgo (Lucas 9:6).