Ne tuku atu ne Iesu ki ana apositolo a akoakoga ‵lei ki te auala e ‵tau ei o fai a te galuega talai, i te taimi ne olo atu ei latou i ‵pea. Kae ne seki gata atu a ia i konā. Ne fakailoa atu ne ia mo te loto alofa ki a latou e uiga ki tino ‵teke: “Kiloke! Ka uga atu ne au koutou e pelā me ne mamoe i va o kuli vao. . . . Ke fakaeteete koutou i tino, me ka ave ne latou koutou ki fono fakamasino kae ka ‵ta fakamasei ne latou koutou i olotou sunako. Kae ave a koutou ki mua o kovana mo tupu ona ko au, ke fai mo molimau ki a latou e pelā foki mo fenua fakaa‵tea.”—Mataio 10:16-18.

Ao, e mafai o fe‵paki a soko o Iesu mo fakasauaga faiga‵ta, kae ne fakatalitonu atu a ia: “Kae kafai e fakamasino koutou sa manava‵se ki te auala e fai‵pati ei koutou io me ko pati ka fai ne koutou; me ka tuku atu eiloa ki a koutou a pati kolā ka fai ne koutou i te itula tenā; me i tino kolā ka fai‵pati e se ko koutou fua, kae ko te agaga o te otou Tamana telā e faipati atu e auala i a koutou.” Ne toe fai atu a Iesu: “Ka tuku atu ne te tino a tena taina ke tamate, e penā foki mo te tamana ki tena tamaliki, kae ka ‵teke atu a tama‵liki ki olotou mātua kae tuku atu ke tamate. Kae ka takalia‵lia a tino katoa ki a koutou ona ko toku igoa, kae ko te tino telā e loto mau ke oko ki te gataga ka sao eiloa.”—Mataio 10:19-22.

Ona ko te tāua o te galuega talai, ne faka‵mafa mai ne Iesu a te manakoga ke ‵poto ana soko ko te mea ke saoloto faeloa latou o fai te galuega tenei. Ne fai mai tou tagata: “Kafai e fakasaua atu latou ki a koutou i se fakai e tasi, ‵tele ki te suā fakai; me e fai tonu atu au ki a koutou, ka se mafai o palele i a koutou a fakai katoa o Isalaelu kae ko oko mai te Tama a te tagata.”—Mataio 10:23.

Ko tafaga la te aoga o akoakoga, ko fakailoaga mo fakamalosiga ne tuku atu ne Iesu ki ana apositolo e toko 12! E mafai o malamalama koe me ne fakauiga foki a pati konei ki tino kolā ka ‵kau atu ki te galuega talai, mai tua o te mate mo te toetuga o Iesu. Ne fakaasi atu ne ana pati me ka “takalia‵lia a tino katoa,” ki ana soko, kae e se ko tino fua kolā e talai atu ki ei te kau apositolo. E se gata i ei, e se fai‵tau tatou e uiga ki te avatuga o apositolo ki mua o kovana mo tupu i te taimi toetoe tenei o te galuega talai i Kalilaia io me ko te tuku atu o latou ne olotou kāiga ke tamate.

E manino ‵lei, me ne mafaufau a Iesu ki aso mai mua, i te faiatuga ne ia o mea konei ki te kau apositolo. Mafaufau ki ana fakamatalaga me i ana soko ka se palele te lotou talaiga “kae ko oko mai te Tama a te tagata.” E fakaasi mai ne Iesu me ka se palele atu a te talaiga ne ana soko a te Malo o te Atua, a koi tuai o oko mai a te Tupu ‵malu ko Iesu Keliso e pelā me ko te famasino a te Atua.

I te taimi koi fai ei te galuega talai, e se ‵tau o  ‵poi a te kau apositolo ke fakafesagai atu ki ‵tekemaiga, me ne fai mai a Iesu: “E se sili atu te soko i tena faiakoga, io me ko te pologa i tena matai.” E manino ‵lei te manatu ne fakaasi mai ne Iesu. Ne fepaki a ia mo faifaiga ma‵sei kae fakasaua ona ko te talaiatuga o te Malo o te Atua, kae ka penā foki latou. Kae ne fakamalosi mai a Iesu: “Sa ma‵taku ki a latou kolā e mafai o tamate ne latou a koe kae se mafai o fakaseai ne latou tou ola i aso mai mua; kae ma‵taku ki a ia telā e mafai o fakaseai ne ia a koe i Kena.”—Mataio 10:24, 28.

Ne fai ne Iesu te fakaakoakoga i te mea tenei. Ne kufaki eiloa a ia mo te sē mataku i te mate, i lō te gutugutulua i tena alofa tumau ki te tino telā e malosi katoatoa, ko Ieova. Ko te Atua Malosi Katoatoa fua e mafai ne ia o tamate te “ola” o te tino (ana fuafuaga mō te olaga i aso mai mua) io me ko te tino telā e mafai ne ia o toe fakatu aka a ia ke maua te ola se-gata-mai. Ko oko eiloa te fakamafanafana atu o te mea tenei ki te kau apositolo!

Ne fakamatala atu ne Iesu ki ana soko a te alofa atafai o te Atua i te auala tenei: “E a, e se ‵togi fua a manu eva fo‵liki e lua ki se sene e tasi? Kae e se mafai o to se manu e tasi i manu konā ki lalo i te laukele kae se iloa ne te otou Tamana. . . . Tela la, sa ma‵taku; e sili atu te tāua o koutou i lō manu eva fo‵liki e uke.”—Mataio 10:29, 31.

A te fekau telā e talai atu ne soko o Iesu ka fai ei ke ‵nofo mavae‵vae a kāiga, me i nisi tino o te kāiga ka talia ne latou kae ko nisi tino ka ‵teke ki ei. “Sa mafaufau i a au ne vau o aumai a te filemu ki te lalolagi,” ko te fakamatalaga a Iesu. Ao, e ‵tau o maua te loto malosi ke puke ‵mau se tino o te kāiga ki te munatonu i te Tusi Tapu. Muna a Iesu: “So se tino e sili atu tena alofa ki tena tamana io me ko tena mātua i lō au e seai sena aoga ki a au; kae ko so se tino e sili atu tena alofa ki tena tamaliki tagata io me ko tena tamaliki fafine i lō au e seai foki sena aoga ki a au.”—Mataio 10:34, 37.

Kae ka talia mo te fia‵fia ne nisi tino ana soko. Ana muna: “So se tino e ave ne ia se ipu vai ‵moko fua e tasi ke inu i ei se tino fatauva i a latou konei ona ko ia se soko, au e fai ‵tonu atu ki a koutou, ka maua eiloa ne ia tena taui.”—Mataio 10:42.

Ne toka ‵lei latou ona ko akoakoga, fakailoaga, mo fakamalosiga a Iesu, ne olo atu ei a te kau apositolo “i loto i te fenua kātoa mai i tamā fa‵kai ki nisi tamā fa‵kai, o folafola atu te tala ‵lei kae faka‵lei a masaki i koga katoa.”—Luka 9:6.