Ovapostolo va Yesu va tunda vavali vavali kuenje eye eca olonumbi ndomo va ka linga upange woku kunda. Eye ka va tumi lika kupange woku kunda, pole, lutate walua o va lungula eci catiamẽla kovanyãli, poku va sapuila hati: “Ndu tumi ndolomeme pokati kolombinji . . . Kuati utate lomanu, momo vo tuali kekanga kuenda vu kangisiwa volosunangonga viavo. Vu ambatiwa kolombiali lo kolosoma omo lionduko yange.”—Mateo 10:16-18.

Olondonge via Yesu vi pondola oku liyaka lalambalalo alua, pole, Yesu o va lembeleka poku va likuminya hati: “Eci wambatiwi, ko ka sakalali ndomo vu popia ale ceci vu popia, momo kowola yaco eci vu ka popia cu wĩhiwi; momo heneko [lika] vu popia, pole espiritu lia Isiene olio li popia vonduko yene.” Yesu amisako hati: “Omunu o tuala manjaye koku pondiwa, isia, omõlaye kuenda omãla va katukila olonjali viavo loku va tuala koku pondiwa. Kuenje vu suvukiwa lomanu vosi vonduko yange, pole, wosi o pandikisa toke kesulilo o popeliwa.”—Mateo 10:19-22.

Omo okuti upange woku kunda owo u kuete esilivilo lia velapo, Yesu o vetiya olondonge viaye oku lunguka oco vi amameko oku tẽlisa upange waco. Eye lelianjo o popia hati: “Eci vu lambalaliwa volupale lumue, tilili kolupale lukuavo; ocili ndu sapuili siti, ka vu tẽla oku tokeka alupale osi a Isareli [osimbu] Mõlomunu [keyile].”—Mateo 10:23.

Yesu eca olonumbi, alungulo kuenda evetiyo kovapostolo vaye va soka 12. Pole, tua limbuka okuti olondaka evi vi tiamisiwilavo komanu vana va ka panga onepa kupange woku kunda noke yoku fa kua Yesu kuenda epinduko liaye. Eci ci limbukiwa volondaka eye a popia viokuti, olondonge viaye via laikele oku “suvukiwa lomanu vosi” pole, ka vi suvukiwa lika lomanu vana ovapostolo va kala oku kundila. Handi vali, ka kuli uvangi u lekisa okuti ovapostolo va tualiwa kovaso yolombiali lolosoma vokuenda kupange wavo woku kundila vo Galilea ale oku pondiwa la umue ukuepata liavo.

Ocili okuti, Yesu poku sapuila olondaka evi kovapostolo vaye, wa sokolola ovina via laikele oku pita kovaso. Sokolola olondaka a sapuila kolondonge viaye viokuti, ‘osimbu Mõlomunu keyile’ ka va tẽla oku tokeka ovitumãlo viosi poku kunda. Lolondaka evi Yesu o kasi oku lekisa okuti olondonge viaye, ka vi malusula upange wavo woku kunda Usoma wa Suku, osimbu Soma Yesu Kristu keyile ndonganji ya tumiwa la Suku.

Osimbu ovapostolo va tẽlisa upange woku kunda, ka va sukila oku komõha nda va liyaka lalambalalo,  momo Yesu o popia hati: “Ondonge ka ya velelepo ulongisi waye kuenda upika ka velelepo cime caye.” Yesu o kasi oku va sapuila ocili catiamẽla kovina vi laika oku pita lavo. Ovo va ka tipuiwa kuenda oku lambalaliwa omo lioku kunda olondaka viwa Viusoma, ndeci ci kasi oku pita la Yesu. Pole, Yesu o va lungula hati: “Ko ka kuateli usumba ava vo wipayi, pole, ka va tẽla oku vu tateki oku kuata vali omuenyo kovaso yoloneke, puãi kuateli usumba una o tẽla oku vu nyõli Vongehena.”—Mateo 10:24, 28.

Omo liaco, Yesu wa sia ongangu yimue yiwa. Eye, wamamako oku kakatela ku Yehova, ono yunene wosi, poku pandikisa toke kolofa. Suku Ukuonene wosi, eye lika o pondola oku nyõla “omuenyo” womunu umue (okuti elavoko liaye lioku tambula omuenyo ko pui), ale oku u pindula oco a kuate vali omuenyo ko pui. Ocili okuti olondaka viaco via lembeleka calua ovapostolo!

Yesu o lombolola ocisola Suku a kuetele olondonge viaye poku popia hati: “Olongungu vivali ka vi landisiwa hẽ locingangu ci kuete esilivilo litito? Haimo lumue, layimue pokati kavio yi kupukila posi okuti Isiene ka ci kũlĩha. . . . Ko ka sakalali; ene wa velipo okuti olongungu vialua vi sule.”—Mateo 10:29, 31.

Esapulo olondonge via Yesu via kunda, lia laikele oku tepa olonjo, okuti omanu vamue vakuepata va tava, kuenda vakuavo ka va tava. Yesu o lombolola hati: “Ko ka simi hoti, ndeya oku nena ombembua palo posi.” Omo liaco, oco umue ukuepata a tave kesapulo Liembimbiliya, o sukila oku kuata utõi. Pole, Yesu amisako hati: “Wosi o sole calua isiaye ale inaye okuti ame ci sule, ka sesamẽla oku kala ondonge yange; ale wosi o sole calua omõlaye ulume pamue omõlaye ukãi okuti ame ci sule, ka sesamẽla oku kala ondonge yange.”—Mateo 10:34, 37.

Pole, omanu vamue va ka tava kesapulo liolondonge viaye. Eye o popia hati: “Wosi eca kuava va sule [ndaño muẽle] okopo yovava a talala omo okuti ondonge, ocili, ndu sapuili siti, eye ka ka pumba onima yaye.”—Mateo 10:42.

Omo okuti Yesu wa eca kovapostolo olonumbi, alungulo kuenda evetiyo, ovo “va enda vimbo limbo oku kunda olondaka viwa kuenda oku sakula kolonepa viosi.”—Luka 9:6.