Yesu aahaavaha arummwa awe malakiheryo a moota woolaleerya, aakawaka anli-anli. Nave moowaareerela murima, aahaalopola wira yaamulupatthiwa, oriki: “Mwiwe! Miyo kinnorumani ntoko ipwittipwitthi variyari va mìji. . . . Vano, mwipasopeke n’atthu! Awo animoroihani omilattuni: animomanakasani mpani mwaya mothukumana. Munoroihiwa oholo wa maguvernatoro n’oholo wa mamwene mwaha wa miyo”.​—Matheyo 10:16-18.

Nnaamwi atthareli a Yesu yaarowa olupatthiwaka vaalupale, Yesu aahaalipiha oriki: “Mwaroihiwaka omilattuni, muhivelavelé mwiraka: ‘Nakhule sai? Walá, nihimye exeni?’ Tthiri, okathi ene yowo Muluku onimovahani molumo òwakhula. Vekekhai, khahiyó nyuwo munrowa olavula: eroho [munepa] y’Atith’inyu t’inrowa olavula mwa nyuwo. Vano, munna onomuhimya munn’awe wira ìviwe, nave tithi mwan’awe, hatá anamwane animwarukunuwela axitithi aya, wira ewivihe. Nyuwo munonyokhiwa n’atthu othene mwaha wa miyo. Nto ole onrowa ovilela mpakha omaliherya, onimòpowa”.—Matheyo 10:19-22.

Okhala wira muteko woolaleerya tori wootepa otthuneya, Yesu aahittittimiherya otthuneya waya atthareli awe wiipasoopa, wira aweryeke ovara muteko ole. Yesu aahimmye wira: “Mwalupatthiwaka muttetthe mmosá, mutthyaweleke mukina. Kinolèlani ekhweli wira: khamunimaliha wettetta mittetthe sothene sa Isarayeli, Mwana a mutthu ahirwiye”.—Matheyo 10:23.

Mwekeekhai, Yesu aahaalakiherya, waalopola ni waalipiha arummwa ale 12! Ni masu ale, Yesu aahimya-tho atthu yaale yaarowa olaleeryaka nuumala Yesu okhwa ni ohihimuxiwa. Moolumo Yesu aalenle awe awiixutti awe annooniherya eyo. Maana aalenle wira: “Nyuwo munonyokhiwa n’atthu othene”, ohiya paahi ni atthu yaarowa olaleeriwa ni arummwa. Nave, khiivo etthu enooniherya wira okathi arummwa yaalaleerya aya oGalileya, yaahiroihiwa omilattuni ohoolo wa maguvernatoro ni mamwene. Ni khuuvo murummwa iivihiwe ni mmusi awe.

Tthiri, Yesu uupuwela itthu saarowa owiiraneela arummwa muhoolo. Moone wira Yesu aahimmye wira awiixutti ale khiyaarowa olaleerya mittetthe sotheene “Mwana a mutthu ahirwiye”. Nto eyo enooniherya wira awiixutti awe khiyaarowa omaliha muteko woolaleya Omwene wa Muluku, ohinatthi ophiya Mwene Yesu Kristu, yoowo onrowa waaphukela atthu.

Vaavo yaarowa aya olaleeryaka, arummwa ale khiiyaatthuneya otikinihiwa yaalupatthiwaka,  okhala wira Yesu aahimmye wira: “Mutthu onixuttihiwa khaninvikana mwixuttihi awe”. Yesu aahimya ekeekhai. Maana aahithokoreriwa moohixariya ni aahilupatthiwa mwaha woolaleya Omwene wa Muluku, nave awiixutti awe yaamulupatthiwa. Yesu aahaalopola oriki: “Muhiwòveké ale anìva erutthu, ehiweryaka wiva eroho. Vano, mmòveke Muluku, yowo onwerya opwetexa eroho anyu vamosá n’iruthu omooroni [oGehena]”.​—Matheyo 10:24, 28.

Yesu oovaha ntakiheryo nooloka. Maana aahiroromeleya wa Yehova, yoowo orina owerya wotheene, ni aahivilela mpakha okhwa. Tthiri Muluku Oowerya Sotheene onoowerya ompwetexa mutthu aahiiso “eroho” (nlipelelo nawe na okhalana okumi) aahiiso onoowerya omuhihimuxa mutthu owo wira akhaleke mahiku otheene. Tthiri moolumo ale yaahaamaaliha vanceene arummwa!

Yesu aahilikanyiha moota Muluku onaakhapelela awe atthareli awe ni moota onaakhapelela awe axipalame, oriki: “Axipalame anli khantumuhiwa inota vakhani pahi? Vano, nnákhala mmosá khampweteya, Atith’inyu ehitthunne. . . . Tivó, muhòveké: nyuwo muhavikana axipalame òwatta”.—Matheyo 10:29, 31.

Muhupi awiixutti a Yesu yaarowa aya olaleyaka, waarowa okawanya itthoko. Masi amusi akina yaamweemereryaka akina nnaari. Yesu aatthokihenrye so: “Muhùpuweleké wira miyo kirwenle oruha murettele mulaponi”. Tthiri waarowa otthuneyaka olipa murima wira amusi akina a vatthokoni yeemererye ekeekhai. Maana Yesu aahihimya wira: “Ale anaphentexa atithi aya walá ame aya ovikana okiphenta miyo, khamphwanela okhala awaka. N’ule onimphentexa mwan’awe mwamulopwana, walá mwan’awe mwamuthiyana ovikana okiphenta miyo, khamphwanela okhala awaka”.​—Matheyo 10:34, 37.

Tthiri, atthu akina yanwaakhelaka saana awiixutti ale. Maana Yesu aahimmye so: “Kinohimeryani ekhweli wira: ole onvaha màsi òrirya, hatá ekhalé ekopho emosá pahi, anvahaka mmosá àxikhani ala mwaha w’okhala mwixutti aka, onotthuveliwa khuluwi”.​—Matheyo 10:42.

Yiixuttihiwe ene oratteene, olopoliwa ni olipihiwa ni Yesu, awiixutti ale “yahivenya, khuvira mittetthe sothene, elaleyaka ehapari yorera, yavonihaka aretta mipantte sothene”.​—Luka 9:6.