Mantang isinasagibo kan mga apostol an ministeryo ninda sa Galilea, an saro na nagpamidbid ki Jesus, si Juan Bautista, mayo nin arog kaiyan na libertad. Nakapreso pa man giraray ini dawa haros duwang taon na an uminagi.

Hayagan na sinabi ni Juan ki Hading Herodes Antipas na salang kuanon niya si Herodias bilang agom huling agom ini ni Felipe na tugang niya sa ama. Diniborsiyo ni Herodes an inot niyang agom para agumon si Herodias. Sigun sa Katugunan ni Moises, na hinihingakong sinusunod ni Herodes, an pag-aguman na ini pagsambay saka ilegal. Huling sinagwi ni Juan si Herodes, ipinapreso siya kaini, na posibleng huli sa sutsut ni Herodias.

Dai aram ni Herodes kun ano an gigibuhon niya ki Juan, huling an mga tawo ‘ibinibilang siyang propeta.’ (Mateo 14:5) Pero si Herodias bakong arog ni Herodes na dai makapagdesisyon. “May raot nin buot” siya ki Juan asin sa katunayan, nagpaparahanap siya nin paagi para ipagadan ini. (Marcos 6:19) Sa katapos-tapusi, nagkaoportunidad siya.

Kan madali na an Paskuwa kan 32 C.E., nag-andam si Herodes nin sarong enggrandeng selebrasyon para sa aldaw kan saiyang pagkamundag. Yaon sa selebrasyon an gabos niyang mga panginot na opisyal asin mga komandante militar, pati na an pinakamaimpluwensiyang mga tawo sa Galilea. Durante kan selebrasyon, si Salome, an hoben na aking babayi ni Herodias sa inot niyang agom na si Felipe, pinalaog tanganing magbayle para sa mga bisita. Naugma an mga bisita sa ginibo niya.

Huling naugmang marhay si Herodes sa aki ni Herodias, nagsabi siya digdi: “Hagadon mo an ano man na gusto mo. Itatao ko iyan sa saimo.” Nagsumpa pa ngani siya: “Dawa ano an hagadon mo sa sako, itatao ko iyan sa saimo, sagkod sa kabanga kan sakuyang kahadian.” Bago magsimbag, nagluwas si Salome asin nagsabi sa saiyang ina: “Ano an hahagadon ko?”—Marcos 6:22-24.

Ini na nanggad an pagkakataon na pighahalat ni Herodias! “An payo ni Juan na Parabawtismo,” an simbag tulos niya. Insigidang nagbalik si Salome ki Herodes asin nagsabi: “Gusto kong itao mo sa sako ngunyan tulos sa bandehado an payo ni Juan Bautista.”—Marcos 6:24, 25.

Dai nanggad ini nagustuhan ni Herodes, pero nadangog na kan mga bisita na nagsumpa siya ki Salome. Nasusupog siyang sayumahan iyan, dawa nangangahulugan ini nin paggadan sa sarong inosenteng tawo. Kaya, nagsugo siya nin guwardiya sa presuhan para gibuhon an nakakapanggirabong pagbuot. Dai nahaloy nagbalik an guwardiya dara an payo ni Juan na nasa bandehado. Itinao niya iyan ki Salome, na nagdara kaiyan sa saiyang ina.

Kan mabaretaan kan mga disipulo ni Juan an nangyari, nagduruman sinda asin kinua an saiyang hawak saka ilinubong iyan. Dangan isinaysay ninda ki Jesus an nangyari.

Dai nahaloy, kan mabaretaan ni Herodes na nagpapaumay si Jesus nin mga tawo asin nagpapalayas nin mga demonyo, natakot siya. Pig-iisip-isip niya kun baga an naggigibo kaini—si Jesus—iyo si Juan Bautista na ngunyan ‘ibinangon na hali sa mga gadan.’ (Lucas 9:7) Kaya gustong-gusto ni Herodes Antipas na mahiling si Jesus pero siyertong bako para magdangog sa ihuhulit kaini. Imbes, gusto niyang mahiling si Jesus para masigurado kun baga totoo o bako an iniisip niya.