O na gũtuĩka atũmwo a Jesu nĩ marathiĩ na mbere na ũtungata wao thĩinĩ wa Galili, ũrĩa wahaarĩrĩirie Jesu njĩra ndarĩ na wĩyathi ta ũcio. Johana Mũbatithania akoretwo njera ihinda ta rĩa mĩaka ĩĩrĩ.

Johana nĩ oigĩte atekũhitha atĩ Mũthamaki Herode Antipasi nĩ aahĩtĩtie nĩ kuoya Herodia, mũtumia wa Filipu, mũrũ wa ithe, atuĩke wake. Herode aatiganĩte na mũtumia wake wa mbere nĩguo ahikie Herodia. Kũringana na Watho wa Musa ũrĩa Herode oigaga atĩ nĩguo arũmagĩrĩra, kĩhiko kĩu nĩ kĩa ũtharia na ti gĩtĩkĩrĩku nĩ watho. Nĩ ũndũ wa Johana kuuga ũguo, Herode agĩathana aikio njera, hihi nĩ ũndũ wa gũtindĩkĩrĩrio nĩ Herodia.

Herode nĩ ararigwo nĩ ũrĩa egwĩka na Johana, tondũ andũ “moonaga [Johana] arĩ mũnabii.” (Mathayo 14:5) No Herodia tiguo ahaana. “Atũire na ũthũ kũmwerekera,” o na akoretwo agĩetha mweke wa kũmũũragithia. (Mariko 6:19) No rĩu mweke ũkeyumĩria.

Kahinda kanini mbere ya Pasaka ya mwaka wa 32, Herode akabanga iruga inene rĩa gũkũngũĩra mũthenya wake wa gũciarũo. Anene othe na atongoria a mbũtũ ya ita na andũ arĩa marĩ igweta mũno a Galili, magoka nĩ ũndũ wa iruga rĩu. Hĩndĩ ya gwĩkenia, Salome mwarĩ ũrĩa mũnyinyi Herodia maagĩte na mũthuri wake wa mbere Filipu, akeerũo athũngũthe akenie ageni. Arume acio magakenio mũno nĩ mũinĩre wake.

Tondũ wa gũkenio mũno nĩ mwarĩ ũcio, Herode akamwĩra: “Njĩĩra kĩrĩa gĩothe ũkwenda, na nĩ ngũkũhe.” O na akehĩta ũũ: “Kĩrĩa gĩothe ũkũhoya, nĩ ngũkũhe, o na angĩkorũo nĩ nuthu ya ũthamaki wakwa.” Salome atanacokia, akoima nja na akoria nyina atĩrĩ: “Hoe kĩĩ?”​—Mariko 6:22-24.

Kau nĩko kamweke karĩa Herodia akoretwo agĩcaria! Atekũrĩa marĩĩgu akamwĩra, “Ĩtia kĩongo kĩa Johana Mũbatithania.” O rĩo Salome agacoka kũrĩ Herode akamwĩra: “Ngwenda ũhe o rĩu kĩongo kĩa Johana Mũbatithania kĩigĩrĩirũo thani-inĩ.”​—Mariko 6:​24, 25.

Ũndũ ũcio ũgathĩnia Herode mũno, no ageni ake nĩ maiguire mwĩhĩtwa wake harĩ Salome. Akona atĩ aaga gwĩka ũguo nĩ egwĩconorithia, o na akorũo kũhingia mwĩhĩtwa ũcio nĩ kuuga orage mũndũ ũtarĩ na mahĩtia. Kwoguo Herode agatũma mũthigari njera na akamwatha arenge Johana mũtwe. Thutha wa kahinda mũthigari agacoka na mũtwe wa Johana ũrĩ thani igũrũ. Akaũnengera Salome, nake agatwarĩra nyina.

Arutwo a Johana maigua ũrĩa gwekĩka, magoka makaruta mwĩrĩ wake na makaũthika. Magacoka makamenyithia Jesu ũhoro ũcio.

Thutha ũcio, Herode aigua atĩ Jesu nĩ arahonia andũ na akaingata ndaimono, akamaka mũno. Akarigwo kana hihi Jesu ũrĩa ũreka maũndũ macio, nĩ Johana Mũbatithania ‘ũriũkĩte.’ (Luka 9:7) Kwoguo Herode Antipasi akenda mũno kuona Jesu. Hatarĩ nganja ti nĩgetha aigue Jesu akĩhunjia. No Herode arenda kuona Jesu nĩgetha one kana ũndũ ũrĩa arecirĩria nĩ wa ma.