Halwola vaposetolo jaYesu vapwile nakwambulula mujimbu muNgalileya, Yowano uze ajimbwile Yesu kapwile nalisesa lyakwambululako. Halwola kanelu, Yowano Muka-kumbapachisa apwile mukamenga kafwe hamyaka yivali.

Yowano ahanjikile hatoma ngwenyi chapwile chakuhenga kuli Mwangana Helote Andepa kumbata Helochiya pwevo lyandumbwenyi Fwilipu apwenga puwenyi. Helote alukulwile pwevo lyenyi nakumbata Helochiya. Kweseka naJishimbi jaMose jize alyongele kukavangiza Helote, ulo kanou wapwile nge hiujila, kaha nawa wakuhenga. Mazu ahanjikile Yowano kuli Helote alingishile amuhake mukamenga, pamo mwomwo yakumukunyula kuli Helochiya.

Helote katachikijile mwakulingila Yowanoko mwomwo vatu vamumwenenga “kupwa kapolofweto.” (Mateu 14:5) Oloze Helochiya atachikijile mwakumulingila. “Alaminyine Yowano koko, kaha asakilenga ngwenyi amujihe.” (Mako 6:19) Kutwala muze, vawanyine jila yakumujihilamo.

Shimbu kanda likumbi lyaPaseka yamu 32 C.E. lihete, Helote awahishile chilika chakwanuka likumbi lyakusemuka chenyi. Vilolo vavalemu vaHelote vosena, natupitau twamaswalale, navatu vavalemu vosena vamuNgalileya vejile kuchilika kana. Omu chahetele chilika, Salome mwanaHelochiya uze asemenene kuli lunga lyenyi Fwilipu vamusanyikile akine kumeso avatu vosena. Vatu vosena vaze vakungulukile vawahililile hakukina chenyi.

Hakuwana nge Helote awahililile chikuma hakukina chayou mwanenyi wakulela, ngocho ambile kuli ikiye ngwenyi: “Ngulombe cheshocho unasake, kaha nangukuhanacho.” Alishingile kuli ikiye ngwenyi: “Cheshocho naungulomba nangukuhanacho, chipwe vene chimbwa chawangana wami.” Shimbu kanda Salome akumbulule, alovokele nakuya nakuhulisa naye ngwenyi: “Chuma muka ngwatela kulomba?”—Mako 6: 22-24.

Olu lukiko lwola apwile nakutalilila Helochiya lwakujiha Yowano. Ngocho amukumbulwile washiwashi ngwenyi, lomba “mutwe waYowano Muka-kumbapachisa.” Nakushimbula chiku, Salome akindulukile kuli Helote nakwamba ngwenyi: “Ngunasake unguhane oholyapwa mutwe waYowano Muka-kumbapachisa halilonga.”—Mako 6:24, 25.

Chuma kana chakolele Helote kumuchima, oloze vangeji vapwile kuchilika kana vevwile vyuma alishingile kuli Salome. Ngocho Helote evwile sonyi kuhona kumuhana chuma kana, numba tuhu chuma kana chasakiwile kujiha mutu wakuzeneka mulonga. Ngocho Helote atumine kapitau kukamenga nakumuhana jindongi jakuya nakujiha Yowano. Nakushimbula chiku, uze kapitau akindulukile namutwe waYowano halilonga. Kaha uze mutwe auhanyine kuli Salome, ngocho Salome autwalile kuli naye.

Omu tumbaji twaYowano vevwile mazu kana, vejile nakumbata mujimba wenyi nakuya nakuufunda. Kaha vayile kuli Yesu nakumulweza mujimbu kana.

Helote evwile woma omu evwile mujimbu waYesu wakuhindula vatu nakulovola vandemone. Ashinganyekele ngwenyi ou Yesu apwile nakulinga vyuma kanevi ikiye Yowano Muka-kumbapachisa uze ‘nasanguka kufuma kuvafu.’ (Luka 9:7) Shikaho, Helote Andepa afwililile chikuma kumona Yesu. Kapwile nakusaka kwivwilila kumujimbu waYesuko, oloze apwile nakusaka kumona Yesu nge apwile Yowano Muka-kumbapachisa nyi chiku.