Sama joote Yesu dhi nyime gi tij yalo e alwora mar Galili, Johana Jabatiso, jal ma ne ohulo Yesu ayanga to onge gi thuolo mar yalo. Pod en e jela chiegni higni ariyo nyaka ne tueye.

Johana nowacho ayanga ne Ruoth Herode Antipa ni ok en gima kare kawo Herodia chi Filipo owadgi mondo obed chiege. Noyudo Herode oseketho kendne gi chiege mokwongo mondo okend Herodia. Kend ma kamano en chode kendo ok owinjore ka luwore gi Chik Musa ma Herode oketore ni luwo. Nikech Herode ne ok mor gi siem ma Johana nomiyeno, nowito Johana e jela. Nyalo bedo ni Herodia e ma ne ojiwe mondo owit Johana e jela.

Herode odhier nono gi gima dotim ne Johana nimar ji ‘kawo Johana kaka janabi.’ (Mathayo 14:5) Kata kamano, Herodia to ong’eyo gima odwaro ni otimne. Herodia ‘omako sadha kode,’ kendo osiko omanyo thuolo mar miyo onege. (Mariko 6:19) Gikone, thuolono neno.

Kodong’ ndalo manok to itimo sawo mar Pasaka ma higa mar 32, Herode loso nyasi maduong’ mar paro chieng’ nyuolne. Jotelo madongo kod jotend-lweny duto kaachiel gi jotelo mag Galili, chokore ne nyasino. Sama nyasino dhi nyime, iluongo Salome nyar Herodia mondo odhi omiel ne welo. Herodia ne onyuolo Salome gi Filipo chwore machon. Welo mor ahinya gi yo ma omielgo.

Nikech Herode mor ahinya gi nyareno, owacho ne nyakono niya: “Kwaya gimoro amora midwaro to abiro miyigo.” Okuong’ore bende kama: “Gimoro amora ma ikwaya anamiyigo, kata mana nus pinyruodha.” Ka Salome pok oduoke, odhi kendo openjo min mare niya: “Ang’o monego akwa?”​—Mariko 6:22-24.

Koro ma e thuolo makende ma Herodia osegabedo ka gombo ahinya! Omiyo, odwoko mapiyo niya: “Wi Johana Jabatiso.” Gikanyono, Salome dok ir Herode kendo okwaye kama: “Adwaro ni imiya wi Johana Jabatiso e san gie sani.”​—Mariko 6:24, 25.

Wachno chando chuny Herode ahinya, kata kamano welo to oa winjo ka okuong’ore ne Salome. Wiye kuot, omiyo ok onyal tamore kata ka timo kamano dhi miyo oneg ng’at ma onge gi ketho. Kuom mano, Herode oro jarit moro e jela mondo odhi ong’ad wi Johana. Mapiyo nono jaritno duogo koting’o wi Johana e san. Omiye Salome, kae to Salome tero wijno ne min mare.

Ka jopuonjre Johana winjo gima otimoreno, gibiro, gikawo ringre Johana, kendo giyike. Kae to gidhi ginyiso Yesu wachno.

Bang’e, chuny Herode chandore kowinjo ni Yesu chango ji kendo golo jochiende. Oparore kabe Yesu, ma timo honnigo en Johana Jabatiso ma dibed ni “osechier oa kuom joma otho.” (Luka 9:7) Omiyo, Herode Antipa gombo ahinya mar neno Yesu. Kuom adier, gomboneno ok en mar winjo weche ma Yesu yalo. Kar mano, Herode dwaro mana neno Yesu mondo obed gadier kabe paro ma en-gono en adier.