Vaavaa amuhuserya a Yesu anayaayano vahoolo muteko woolaleerya o Kalileya, yoole aamusuwanyeinhe Yesu ntoko epucepuche ya Muluku haanono ekari yeeyo. Inahala vakhaani waakhwana iyaakha piili Yohani Mpatisi nlelo ari mukariposo.

Yohani aahiloca vanlakani wi yaari yoonanara Mwene Herote Antipa omuthela Herotiya, yoowo aari mwaara a munneeni oomaayi, Filipi. Herote aamwalanne ni mwaariye oopacerya wi amuthele Herotiya. Mwawiiwanana ni nlamulo na Mose, nenlo Herote olonceiye wi onnachariha, othela ola oraruwa nave honeemereryiwa. Wa nthowa na yeeyo, Herote aahinwalela Yohani mukariposo, akhweya ni nceenyeryo na Herotiya.

Herote hanasuwela echu yoomweerela Yohani, ntakhara wi achu ‘anamwera Yohani mulipa a miririmu.’ (Mateu 14:5) Herotiya hanoona wi yookhalavo echu enamukacamiha. Owo “àmwitxa” Yohani, nave mweeparipari, onnaavyaavya omwiipha. (Marko 6:19) Vookuchula, ekari ennaphwanyeya.

Ehalaka elukuluku vakhaani ahaakumve Paskha a 32 E. K., Herote onnapaka efesta etokweene ya wuupuwela nihiku na oyariwa wawe. Asitokweene oocicimiheya oothene a Herote ni asitokweene a anakhoco awe, ni achu akina o Kalileya, aathukumana va efesta. Variyari va efesta, Salome mwaana a mwaamuthiyana a Herotiya yoowo omuyanreiye ni iyawe akhalai Filipi, onnarumihiwa wi iine ntakhara aleco. Alopwana aatepa ohakalala ni miinelo awe.

Atempe ohakalala ni mwanawe mwaamuthiyana oomphwanya, Herote onnaloca ni yoowo: “Okiveke onakhwelawe ni kinamovaha.” Herote onnalipela: “Itxhu sothene onerawe oveke kinamovaha ophiyerya wokawela veri omwene aka.” Ahaakumve waakhula, Nahano onnakhumela vaate nave onnaya waakoha amannya: “Ti seni kineraka kiveke?”—Marko 6:22-24.

Vano ela ekari yeeyo Herotiya onaavyeiye ovinyerya khalai! Owo onnamwaakhula mwawaakuveya: “Muru wa Yohani Mpatisa.” Mwawaakuveya Nahano onnakookela wa Herote ni yooveka awe: “Kinakhwela wi hihano vava okinnye mmusiyoni muru wa Yohani Mpatisa.”—Marko 6:24, 25.

Ela yootepa omuthananiha Herote, nyenya aleco awe ahiiwa yoororomeliha awe wa Nahano. Herote onnuuliwa muru ohiya wi aheereno yeela, naamwi ela etaphulelaka omwiipha mulopwana ohirino nthowa. Mwawiihiiha Herote onnaaruma anakhoco awe oya mukalaposo ni sooleeliherya sawoopiha. Moohilekela anakhoco annaruuha muru wa Yohani mmusiyoni. Owo onnamunnya Nahano, yoowo onaveleela wa amannya.

Vaavaa amuhuserya a Yohani aniiwaaya yeeyo yeeren’ye, awo annarwa nave annakuxa muruchu awe nave annaya ovitha. Voocharela awo annarumiha muchaka owo wa Yesu.

Ohoolo waya, vaavaa Herote oniiweiye wi achu annapenusiwa ni Yesu ni okumihiwa masololo, owo onnoova. Owo onniikoha waakhanle wi mulopwana yoowo onapaka ichu seiho—Yesu—ti Yohani Mpatisi vano “ovinyihiwe mwa alipa okhwa.” (Luka 9:7) Mwawiihiiha Herote Antipa onnakhalano nchuno ntokotoko na omoona Yesu. Hanachuna owiriyana olaleerya wa Yesu. Ohiya yeeyo, Herote onachuna omoona Yesu wi asuwele waakhanle wi wuukhuwa wawe wookhalano mathipelo naari hooye.