E apòstelnan di Hesus tabata predikando na Galilea. Pero Huan Boutista, kende a introdusí Hesus, no tabatin e libertat pa hasi esei. E tabatin kasi dos aña den prizòn.

Huan a deklará públikamente ku Rei Heródes Antipas a hasi malu di kasa ku Herodías, esposa di Felipe, Heródes su ruman hòmber part’i tata. Heródes a divorsiá di su promé kasá pa e por a kasa ku Herodías. Awor, segun e Lei di Moises, e Lei ku Heródes tabata pretendé di kumpli kuné, Heródes no tabatin mag di kasa ku Herodías pasobra esei tabata adulterio. P’esei, no tabata nada straño ku Huan a reprendé Heródes. Pa e motibu ei, Heródes, kisas bou di instigashon di Herodías, a laga tira Huan den prizòn.

Awor, Heródes no tabata sa kiko pa hasi ku Huan pasobra e pueblo “tabata konsiderá Huan un profeta.” (Mateo 14:5) Pero Herodías sí tabata desididu. E tabatin asina tantu rabia riba Huan ku e tabata buska tur manera pa laga mat’é. (Marko 6:19) Por fin un oportunidat a presentá.

Un poko promé ku e Pasku Hudiu di aña 32 di promé siglo, Heródes a hasi un fiesta grandi pa selebrá su kumpleaño. El a invitá tur su funshonarionan di alto rango i komandantenan militar i tambe e hendenan mas prominente di Galilea. Durante e fiesta, Salomé, yu muhé di Herodías i Felipe, eks-kasá di Herodías, a baila pa e invitadonan. I e hòmbernan a keda masha enkantá.

Heródes a keda asina kontentu ku su yu di kriansa Salomé ku el a bis’é: “Pidi mi kiko ku bo ke, i lo mi duna bo.” El a asta hura: “Kiko ku bo pidi mi, lo mi duna bo, asta mitar di mi reino.” Salomé no a kontest’é mesora. El a bai pafó i a puntra su mama: “Kiko mi mester pidi?”—Marko 6:22-24.

Esaki tabata e chèns ku Herodías tabata buska. Mesora el a kontestá: “Kabes di Huan Boutista.” Salomé a bai purá serka Heródes i a bis’é: “Mi ke pa bo duna mi aworakí mes riba un skalchi e kabes di Huan Boutista.”—Marko 6:24, 25.

Heródes a bira masha tristu, pero tur su invitadonan a tend’é hura e mucha muhé ku lo el a dun’é loke e pidi. Pa evitá bèrgwensa, no a keda Heródes nada otro ku kumpli ku loke el a hura Salomé maske esei a enserá mata un hòmber inosente. Di manera ku Heródes a manda un wardaespalda na e prizòn ku e òrdu kruel pa kita kabes di Huan afó. Un ratu despues, e wardaespalda a trese kabes di Huan riba un skalchi i a duna esaki na Salomé, kende na su turno a hib’é pa su mama.

Ora e disipelnan di Huan a tende kiko a pasa, nan a bai buska e kurpa i der’é. Despues, nan a bai konta Hesus loke a pasa.

Mas despues, ora Heródes a tende ku Hesus tabata kura hende i saka demoño, el a haña miedu. E tabata puntra su mes si e hòmber ku tabata hasi e kosnan akí, esta, Hesus, tabata Huan Boutista ku lo “a lanta for di morto.” (Lukas 9:7) P’esei Heródes Antipas tabata ansioso pa topa ku Hesus. Pero esei sigur no tabata pasobra e tabata interesá den Hesus su predikashon; mas bien, e tabata ke topa ku Hesus pa sa si loke e tabata pensa ta bèrdat òf nò.