O loo faaauau pea le faiva a aposetolo o Iesu i Kalilaia. Peitaʻi e lē o le tulaga lenā mo Ioane le Papatiso, o lē na faalauiloaina atu Iesu. Ua toetoe nei lua tausaga o faafalepuipuiina pea o ia.

I se taimi muamua atu, sa faailoa atu ai e Ioane le sesē o le gaoioiga na faia e le tupu o Herota Anetipa. Ua tatala le faaipoipoga a Herota ma lana avā muamua, ina ia faaipoipo atu ai iā Herotia, le avā a lona ʻafa uso o Filipo. Ua faapea mai Herota, o loo ia usitaʻia le Tulafono a Mose. Peitaʻi, e tusa ua ia faia le mulilua pe a fua i le Tulafono, ma o le la faaipoipoga ma Herotia e lē faaletulafonoina. O lea, ua ia faafalepuipuiina ai Ioane atonu ona o le faatauanau ane o Herotia.

Ua lē iloa e Herota po o le ā le mea o le a fai iā Ioane, auā ua ʻmanatu tagata iā te ia o se perofeta.’ (Mataio 14:5) Peitaʻi, ua iloa lelei e Herotia le gaoioiga e manaʻomia ona ia faia. ʻUa faaauau pea ona ita o ia iā Ioane,’ ma taumafai e saʻili se avanoa e fasioti ai o ia. (Mareko 6:19) O lea, ua maua nei e Herotia le avanoa e faataunuu ai le mea ua leva ona manaʻo i ai.

A o leʻi oo i le Paseka i le 32 T.A., ua faatulaga e Herota se faigaʻai tele mo le faamanatuina o lona aso fanau. Ua potopoto uma mai nei mo lenei faatasiga alii aloaʻia, taʻitaʻiʻau, ma i latou e sili ona maualuluga o Kalilaia. A o faagasolo le faigaʻai, ua sau Salome le tama teine a Herotia i lana tane muamua o Filipo, e siva mo le ʻauvalaaulia. Ua matuā faamalieina tamāloloa o loo iai i lea faafiafiaga.

O le fiafia tele o Herota i lona afafinefai, ua ia fai atu ai iā te ia: “Taʻu mai iā te aʻu so o se mea e te manaʻo ai ona ou avatu ai lea iā te oe.” Ua tautō atu foʻi Herota iā te ia: “O so o se mea lava e te fai mai ai, o le a ou avatu iā te oe, e oo lava i le vaeluaina o loʻu malo.” A o leʻi avatu e Salome se tali, ua ia alu atu ma fesili i lona tinā: “O le ā se mea ou te talosaga atu ai?”—Mareko 6:22-24.

O le avanoa lea ua leva ona faatalitali i ai Herotia. O lea ua ia faapea atu ai iā Salome: “O le ulu o Ioane le Papatiso.” O le taimi lava lea ua alu atu ai loa Salome iā Herota, ma talosaga atu: “Ou te manaʻo e te aumai nei lava iā te aʻu le ulu o Ioane le Papatiso i se ipu.”—Mareko 6:24, 25.

Ua matuā tigā le loto o Herota i lenei mea ua talosaga atu ai Salome. Ae ona o lona mafaufau i le mea sa ia tautō ai iā Salome a o faalogologo atu le ʻauvalaaulia, ua ia faataunuuina ai pea lana talosaga, e ui o le a fasiotia ai se tagata e lē sala. O lea, ua auina atu ai e Herota se tasi o ana leoleo i le falepuipui, ma faatonuina o ia e aumai le ulu o Ioane i luga o se ipu. O le mea lea ua faia e le leoleo, ma ua ia avatu iā Salome, ona avatu lea e Salome i lona tinā.

Ua faalogo soo o Ioane i le mea ua tupu, ona latou ō atu ai lea ma ave lona tino ma tanu. Ina ua māeʻa lenā, ona latou ō ai lea ma faamatala uma atu iā Iesu le mea ua tupu.

Mulimuli ane, ua faalogo Herota i le faamālōlōina e Iesu o tagata ma le tuliesea o temoni, ma ua matuā popole ai o ia. Ua ia taumānatu pe faamata o le tagata o loo faia nei vavega, o Ioane lea ʻua toe faatūina mai i le oti.’ (Luka 9:7) O lea, ua matuā naunau ai lava Herota Anetipa e vaai iā Iesu. E lē faapea ina ia faalogo atu i le talaʻiga a Iesu, ae ina ia faamautinoa pe e saʻo ona masalosaloga pe e leai.