Pa nyengu yo akutumika aku Yesu apharazganga ku Galileya, Yohane Mubatizi yo wangwamba kupharazga zakuza kwaku Yesu, wenga weche mujeri. Pa nyengu iyi ndipu waja mujeri vyaka pafufupi viŵi.

Yohane wangukamba pakweru kuti Fumu Herodi Antipasi wangunanga ukongwa kuto Herodiya yo wenga muwolu wa mku waki Filipu. Herodi wangumalisa nthengwa ndi muwolu waki wakwamba kuti wato Herodiya. Herodi wakambanga kuti walondonga Dangu laku Mozesi. Kweni vo iyu wanguchita wenga ureŵi ndipuso venga vakukanizgika mwakukoliyana ndi vo Dangu lakambanga. Herodi wati wavwa venivi, wangulamula kuti Yohane waŵikiki mujeri ndipu watenere kuti wanguchichizgika ndi Herodiya.

Herodi waziŵanga cha vo wangachita ndi Yohane chifukwa ŵanthu “awonanga kuti Yohane ndi mchimi.” (Mateyu 14:5) Kweni Herodiya wamuwonanga kuti ndi mchimi cha. Iyu “wangumusungiya vifukwa Yohane” ndipu wakhumbisiskanga kuti wabayiki. (Mariko 6:19) Pakumaliya, wangusaniya mwaŵi wakubayiya Yohane.

Kwati kwaja nyengu yimanavi kuti phwandu la Pasika wa mu 32 C.E. lichitiki, Herodi wangunozga phwandu likulu lakukondwere zuŵa lo wanguwiya. Pa phwandu lenili, Herodi wangudana nduna zaki, ŵara ŵa asilikali ndipuso ŵanthu akutchuka a mu Galileya. Phwandu le mkati, Salomi mwana munthukazi waku Herodiya yo angubaliyana ndi Filipu, wanguza ko kwenga Herodi kweniso alendu wo angudanika ndipu wangwamba kuvina. Ŵanthu wosi wo ŵenga pa phwandu lenili angukondwa ukongwa.

Herodi wangukondwa ukongwa ndi mwana waki mwenuyu, ndipu wangumukambiya kuti: “Pempha chechosi cho ukhumba ndipu ndikupaskengi.” Ndipu wanguchita kumulapizgiya kuti: “Chechosi cho ungandipempha ndikupaskengi, chinanga yingaŵa hafu ya ufumu wangu.” Salomi wechendamuki, wanguluta kwa anyina ndipu wanguŵafumba kuti: “Kumbi nkhapemphenji?”—Mariko 6:22-24.

Wenuwu, wenga mwaŵi wo Herodiya wawupenjanga kwa nyengu yitali. Mwaliŵiliŵi, iyu wangumuka kuti: “Mutu waku Yohane Mubatizi.” Mwaviyo, Salomi wanguluta kwaku Herodi nyengu yeniyo, ndipu wangumukambiya kuti: “Ndikhumba kuti mundipaski mutu waku Yohane Mubatizi mumbali, sonu viyo.”—Mariko 6:24, 25.

Herodi wangutimbanyizika maŵanaŵanu ndi vo Salomi wangupempha kweni pa nyengu iyi alendu wosi pa phwandu ili ndipu ŵavwa kali vo Herodi wangulayizga. Iyu watingi wachitengi soni ukongwa asani wanguleka kupaska msungwana mwenuyu vo wangupempha chinanga kuti venivi vang’anamuwanga kuti wakhumbikanga kubaya munthu wambula kunanga. Mwaviyo, Herodi wangutuma msilikali kuti waluti ku jeri kuti wakadumuwi mutu waku Yohane. Pati pajumpha nyengu yimanavi, msilikali yo wanguza ndi mutu waku Yohane mumbali. Iyu wanguwupereka kwaku Salomi yo wanguchipaska anyina.

Akusambira aku Yohane ŵati ŵavwa vo vinguchitika, anguza ndi kutuzgaku liŵavu laku Yohane ndipu anguliŵika. Pavuli paki, anguchikamba nkhani iyi kwaku Yesu.

Pavuli paki, Herodi wanguchita mantha wati wavwa kuti Yesu wachizga ŵanthu kweniso watuzga viŵanda. Iyu wawonanga nge kuti Yesu yo wachitanga vinthu venivi wenga Yohane Mubatizi yo sonu “wayuskika.” (Luka 9:7) Mwaviyo, Herodi wakhumbisiskanga kuwona Yesu. Iyu wakhumbanga kuvwa uthenga wo Yesu wapharazganga cha. M’malu mwaki wakhumbanga kuwona Yesu kuti wasimikiziyi asani wenga nadi Yohane.