KAPITE 51
He Faifakapo Lolotoga Ia He ʼAhotupu
MATEO 14:1-12 MALEKO 6:14-29 LUKA 9:7-9
-
ʼE FAKATOTONU E HELOTE KE TUʼUSI TE ʼULU ʼO SOANE PATITA
ʼI te lolotoga fakahoko e te kau apositolo ʼa Sesu tonatou minisitelio ʼi Kalilea, ko Soane Patita ʼae neʼe ina fakaha ko Sesu te Akeno ʼa te ʼAtua, neʼe mole ina maʼu ia te faigamalie ʼaia. Neʼe kua teitei taʼu lua tana pilisoni.
Neʼe fakaha e Soane ia muʼa ʼo te hahaʼi neʼe mole tonu ke ʼohoana te Hau ko Helote Atipasi mo Helotiate, te ʼohoana ʼo Filipo tona taʼokete. Neʼe mavete ia Helote mo tona ʼuluaki ʼohoana ke feala hana ʼohoana mo Helotiate. Kaʼe, ʼo fakatafito ki te Lao ʼa Moisese, ʼae neʼe ui e Helote ʼe mulimuli ki ai, ko te ʼohoana ʼaia neʼe ko he tono ia pea neʼe mole fakagafua ʼi te lao. ʼI tona fakatonutonuʼi e Soane, neʼe fakatotonu ai e Helote ke pilisoniʼi ia ia, lagi ʼaki te fakaneke ʼa Helotiate.
Neʼe mole iloʼi e Helote he meʼa ke ina fai kia Soane, koteʼuhi maʼa te hahaʼi ‘neʼe ko he polofeta ia.’ (Mateo 14:5) Kaʼe neʼe iloʼi lelei e Helotiate te meʼa ʼae ʼe tonu ke fai kia Soane. “Neʼe lotokovi ia Helotiate kia ia,” pea ʼi tona fakahagatonu, neʼe ina haga kumi ke ina matehi ia ia. (Maleko 6:19) Neʼe hoko mai leva te faigamalie.
ʼI muʼa ʼo te Pasikate ʼo te taʼu 32 H.T.S., neʼe teuteuʼi e Helote he fakafiafia lahi ki tona ʼahotupu. Neʼe fakatahitahi ki te fakafiafia ʼaia te hahaʼi maʼu tuʼulaga pea mo te ʼu pule solia fuli ʼa Helote, ʼo feia mo te hahaʼi maʼuhiga ʼo Kalilea. Lolotoga te fakafiafia, ko Salome, te taʼahine ʼa Helotiate ʼi tona ʼohoana ko Filipo, neʼe fekauʼi ke meʼe maʼa te kau fakaafe. Neʼe maliēʼia e te hahaʼi tagata tana meʼe.
ʼI te fiafia lahi ʼa Helote ʼi te taʼahine ʼa Helotiate, neʼe ina ui fenei ki ai: “Kole mai ia meʼa fuli ʼe ke loto ki ai, pea ʼe au foaki atu anai.” Neʼe ina fakapapau fenei age ki ai: “Ko meʼa fuli ka ke kole mai, ʼe au foaki atu anai, ʼo kaku ki te vaelua ʼo toku puleʼaga.” ʼI muʼa ʼo hana tali age, neʼe hu ia Salome ki tuʼa ʼo fehuʼi fenei age ki tana faʼe: “Kotea ʼae ʼe tonu ke au kole?”—Maleko 6:22-24.
Koʼeni la te faigamalie ʼae neʼe kumi e Helotiate. Neʼe ina foimo tali fenei age: “Te ʼulu ʼo Soane Patita.” Pea neʼe alu atu aipe ia Salome kia Helote ʼo fakaha age tana kole ʼaeni: “ ʼE au loto ke ke foimo foaki mai ʼi he pa te ʼulu ʼo Soane Patita.”—Maleko 6:24, 25.
Neʼe lahi te lotomamahi ʼo Helote, kaʼe neʼe kua logo ia te kau fakaafe ki te fakapapau ʼae neʼe ina fai kia Salome. ʼE ufiufi anai mo kapau ʼe mole ina fakahoko tana fakapapau, tatau aipe pe ʼe tonu ke ina matehi he tagata neʼe mole ina fai he meʼa ʼe kovi. Koia, neʼe fekauʼi ai e Helote he tagata leʼo ki te fale pilisoni ke ina fakahoko tana fakatotonu fakalialia. Mole tuai, pea neʼe toe liliu mai te tagata leʼo mo te ʼulu ʼo Soane ʼi he pa. Neʼe ina foaki age kia Salome, pea neʼe ʼavage leva e Salome ki tana faʼe.
ʼI te logo ʼa te ʼu tisipulo ʼa Soane ki te faʼahi ʼaia, neʼe natou ʼomai ai ʼo toʼo tona sino pea ʼave ʼo natou ʼavaifo. Pea neʼe natou fakamatala leva kia Sesu te meʼa ʼae neʼe hoko.
Ki muli age, ʼi te logo ʼa Helote ki te fakamalolo e Sesu te hahaʼi pea mo tana kapu te ʼu temonio, neʼe matataku ai. Neʼe ina feʼekeʼaki pe ko te tagata ʼae ʼe ina fai te ʼu meʼa ʼaia, ia Sesu, ʼe mole koa la ko Soane Patita “kua fakatuʼuake . . . mai te kau mate.” (Luka 9:7) Koia neʼe fakaʼamu lahi ia Helote Atipasi ke sio kia Sesu. Pea ʼe mahino ia neʼe mole ko hana fia logo ki te faifakamafola ʼa Sesu. Kaʼe neʼe fia sio ia Helote kia Sesu ke ina iloʼi ai pe ʼe tonu tana hoha peʼe kailoa.