XOOK 51
Ku kíimsaʼal juntúul máak tiʼ junpʼéel kʼiin kʼabaʼ
MATEO 14:1-12 MARCOS 6:14-29 LUCAS 9:7-9
-
HERODESEʼ KU BEETIK U KÚULXOTʼTAʼAL U POOL JUAN BAUTISTA
Le táan u kʼaʼaytaj Jesús yéetel u apostoloʼob tu luʼumil Galileaoʼ, Juan Bautistaeʼ kʼalaʼan cárcel. Letiʼeʼ tsʼoʼok maas tiʼ dos años kʼaʼalakiʼ.
Juaneʼ tu yaʼaleʼ maʼ maʼalob úuchik u kajtal rey Herodes yéetel Herodíasiʼ, tumen u yatan Filipo, u sukuʼun. Herodeseʼ tu divorciartuba tiʼ u yatan utiaʼal u tsʼoʼokol u beel yéetel Herodías. Jeʼex u yaʼalik u Ley Moiseseʼ le baʼax tu beetoʼ adulterio, maʼ maʼalobiʼ. Le oʼolal Herodeseʼ tu beetaj u kʼaʼalal cárcel Juan, maʼ xaaneʼ Herodías aʼaltiʼ ka u kʼale.
Herodeseʼ maʼ u yojel baʼax ken u beet tiʼ Juaniʼ, tumen u maasil máakoʼoboʼ «ku yilkoʼob Juan bey juntúul profetaeʼ» (Mateo 14:5). Baʼaleʼ Herodíaseʼ maʼ bey u yilkiʼ. Letiʼeʼ «u pʼekmaj kaʼach Juan», le oʼolal táan u kaxtik bix jeʼel u beetik u kíimsaʼaleʼ (Marcos 6:19). Tak ka kʼuch u kʼiinil u beetik.
Le maʼ jach yaʼab u bin u kʼiinbesajil le Pascua utiaʼal u jaʼabil 32, Herodeseʼ tu beetaj junpʼéel nojoch kʼiinbesaj utiaʼal u kʼiin u kʼaabaʼ. Tuláakal le jalaʼachoʼob yéetel le comandanteʼob bey xan le máaxoʼob jach kʼaj óoltaʼanoʼob tu luʼumil Galileaoʼ binoʼobiʼ. Le táan le kʼiinbesajoʼ, Salomé, u hija Herodías yéetel Filipo, u yíicham kaʼacheʼ, óokʼotnaj tu táan tuláakal le muchʼukbaloʼoboʼ. Le xiiboʼob yanoʼoboʼ jach utschaj tu yichoʼob bix úuchik u yóokʼot.
Le oʼolaleʼ Herodeseʼ tu yaʼalajtiʼ: «Kʼáatten jeʼel baʼaxakeʼ, teneʼ jeʼel in tsʼáaiktecheʼ». Yéetel tu yaʼalajtiʼ: «Jeʼel baʼaxak ka a kʼáatteneʼ jach jeʼel in tsʼáaiktecheʼ, tak táanchumuk tiʼ in reino». Táanileʼ Salomeeʼ bin u kʼáat tiʼ u maama: «¿Baʼax unaj in kʼáatik?» (Marcos 6:22-24).
Lelaʼ letiʼe kʼiin táan u páaʼtik Herodíasoʼ. Letiʼeʼ tu yaʼalajtiʼ: «Kʼáat u pool Juan Bautista». Salomé túuneʼ bin u yaʼal tiʼ Herodes: «In kʼáat ka a tsʼáaten u pool Juan Bautista tiʼ junpʼéel charola jach teʼ súutukaʼ» (Marcos 6:24, 25).
Leloʼ jach tu beetaj u yaatal u yóol Herodes, baʼaleʼ uʼuyaʼab tumen u yuʼulaboʼob baʼax tu yaʼalaj u tsʼáaik tiʼ Salomé. Le oʼolal suʼlak u yilaʼal maʼ u beetik le baʼax tu yaʼalaj, kex ka yanak u kíimsik juntúul máax maʼ u beetmaj baʼax kʼaasiʼ. Herodes túuneʼ tu túuxtaj juntúul soldado utiaʼal u kúulxotʼtik u pool Juan. Maʼ sáam tiʼ leloʼ tu taasaj u pool Juan tiʼ junpʼéel charola. Letiʼeʼ tu tsʼáaj tiʼ Salomé, ka tu bisaj tiʼ u maama.
Ka uʼuyaʼab tumen u disipuloʼob Juan tsʼoʼok u kíimsaʼaleʼ, taal u chʼaʼob u wíinklileʼ ka tu bisaj u mukoʼob. Letiʼobeʼ tu túuxtoʼob aʼalbil tiʼ Jesús.
Ka tsʼoʼokeʼ Herodeseʼ tu yuʼubaj u yaʼalik le máakoʼoboʼ Jesuseʼ ku tsʼakik le kʼojaʼanoʼoboʼ yéetel ku jóoʼsik le demonioʼoboʼ, lelaʼ tu beetaj u sajaktal. Letiʼeʼ tu kʼáataj wa «tsʼoʼok u líiʼsaʼal Juan ichil le kimenoʼoboʼ» (Lucas 9:7). Le oʼolal Herodes Antipaseʼ jach taakchaj u yilik Jesús. Baʼaleʼ maʼ tumen wa taak u yuʼubik u kʼaʼaytajiʼ. Baʼaxeʼ chéen taak u yilik tumen sajak yoʼolal baʼax ku yuʼubik u yaʼalaʼal.